फिलेमोन 1 - राना थारु नयाँ नियम

शुभकामना

¹ मए पावल, जा चिट्ठी लिखरहो हओं, मए जेलमे हओं, काहेकी मए येशू ख्रीष्टके बारेमे परचार करत हओं। हे फिलेमोन, हमर बिश्वासी भइया तिमोथी और मिर घेनसे तोके नमस्कार हए। तए हमर प्रिय सँगी हए, और तए ख्रीष्टके ताहीं उइसियए काम करत हए जैसे हम करत हएं।

² और हमरी बिश्वासी बहिनीया अप्फिया और हमर बिश्वासी सँगी अर्खिप्पस, जो एक योद्धाके जैसो परमेश्वरको सेवा करत हए, और बहे मण्डलीमे जो तुमर घरमे इकट्ठा होत हएं।

³ मए प्राथना करत हओं, कि हमर दौवा परमेश्वर और हमर प्रभु येशू ख्रीष्ट तिर उपर अनुग्रह करए, और तोके शान्ति देबए।

धन्यबाद और प्राथना

⁴ मए जब फिर तेरे ताहीं प्राथना करत हओं, मए हमेसा तेरे ताहीं परमेश्वरके धन्यबाद देत हओं।

⁵ काहेकी आदमी मोके बतातहएं, कि तए प्रभु येशूमे बिश्वास लगातार करत आओ हए, और तए परमेश्वरके सब आदमीनसे प्रेम करत हए।

⁶ मए प्राथना करत हओं, कि बिश्वासीन सँगको तिर संगती बढतए जाबए, ताकी तए बे सब अच्छी चीजके बुझ पाबए, जौन चीज परमेश्वर हमके दइ हए। और जाको नतिजा जा होबए, कि आदमी ख्रीष्टके महिमा करएं।

⁷ हे मेरो प्यारे भइया, दुस्रे जनैनके तए करोभओ प्रेमके देखके मए बहुत आनन्दित और उत्साहित हओं। काहेकी तेरे द्वारा परमेश्वरके आदमी उत्साहित हुइगए हएं।

ओनेसिमसके ताहीं पावलको बिन्ती

^8-9 जहेमारे मए तोके ख्रीष्टमे एक बिश्वासीके रुपमे सही काम करनके ताहीं कहात हओं। मए ख्रीष्टके चेलाके रुममे सहासी हुइके, मए तोके अइसो करनको आदेश दए सकत हओं। पर मए सिरफ तोसे कहानडटो हओं, काहेकी मए जानतहओं, कि तए मोके और सँगी बिश्वासीनसे प्रेम करत हए। मए पावल, एक बुढो आदमीके घेनसे हओं, जो एक कैदी फिर हओं, काहेकी मए ख्रीष्ट येशूको सेवा करत हओं।

¹⁰ मए ओनेसिमसके ताहीं बिन्ती करत हओं, जो मेरे लौंणाके बराबर हए। जब मए जेलमे रहओं, तओ बो ख्रीष्टमे मिर लौंणा बनिगओ।

¹¹ बो त एक समयमे तेरे ताहीं कुछ कामको नाए रहए, पर अब तेरे और मेरे दुनौके ताहीं काम लागन बारो भओ हए।

¹² मए ओनेसिमसके तेरे ठिन लौटानडटो हओं, जौनके मए पुरो दिलसे प्रेम करत हओं।

¹³ मए ओनेसिमसके मिर मदत करनके ताहीं रखान चाँहत रहओं, जबकी मए येशू ख्रीष्टके बारेमे अच्छो समाचार सुनानके कारण जेलमे हओं। बो हियाँपर मोके मदत करनके ताहीं तेरो ठिहा लए सकत रहए। काहेकी मए जानत हओं, कि तए मिर मदत करन चाँहत हए।

¹⁴ पर जब तक तए सहमत नाए हुइहए, तबतक मए अइसो नाए करन चाँहत हओं। मए चाँहत हओं, कि तए हियाँ मदत जाकेमारे करए, ताकी तए अइसो करके खुसी होबए, जाकेमारे नाए कि मए तेरे उपर अइसो करनके ताहीं जबरजत्ती करओं।

¹⁵ शायद जहे कारण रहए, कि परमेश्वर ओनेसिमसके थोरी समयके ताहीं तेरे ठिनसे दुर भाजनके ताहीं अनुमति दइ, ताकी बो ख्रीष्ट उपर बिश्वास करपाबए, और जहेमारे तए बोके हमेसाके ताहीं अपने सँग धरपाबए।

¹⁶ पर फिलेमोन सिरफ तिर दास नाए होबैगो, बल्कि बो एक दाससे जद्धा हए। अब बो तिर प्रिय बिश्वासी भइया हए, मए बोसे बहुत प्रेम करत हओं, पर तोए ओनेसिमसके दुनौ रुपमे बहुत जद्धा प्रेम करनके चाहो, अर्थात् अपनो दासके रुपमे, और ख्रीष्टमे एक भइयाके रुपमे।

फिलेमोनको आज्ञाकारीतासे उत्साहित

¹⁷ अगर तए मोके अपने सँग काम करन बारो सँगी मानत हए कहेसे जब ओनेसिमस तेरे ठिन लौटके आबैगो। तओ बोकेसँग बहे खुसीसे ब्यबहार करिए, जैसे तए मिर स्वागत करो।

¹⁸ और अगर बो कुछु फिर चीजके ताहीं, तेरो कर्जीदार हए, तओ मए तोए चुकाए देमंगो।

¹⁹ मए पावल, अपन हातसे जा लिखत हओं, कि मए जा कर्जाके चुकाए देमंगो। और तए पहिलीयए जानतहए, कि अगर मए तेरो मदत नाए करतो, तओ तए अपनएसे जा नयाँ जीबनके नाएपैतो, जहेमारे तए अपनो जीबनके ताहीं मिर ऋणी हए।

²⁰ हे मिर प्यारो बिश्वासी भइया, जा आनन्द मोके प्रभुमे तेरे तरफसे मिलो हए, ख्रीष्टमे एक सँगी बिश्वासीके रुपमे अइसे करके मोके उत्साहित कर।

²¹ मए तोके जा चिट्ठी जहेमारे लिखो हओं, काहेकी मोके बिश्वास हए, कि तए बहे करैगो, जो मए तोसे करनके बिन्ती कररहो हओं। पर मोके पता हए, कि तए बोसे फिर जद्धा करैगो, जो मए तोसे करनके बिन्ती कररहो हओं।

²² एक औ बात, कि मेरे ताहीं अपन घरमे एक कोठा तयार कर, काहेकी मोके आसरा हए, कि परमेश्वर तिर प्राथनाको जबाफ देबैगो, और परमेश्वर मोके जेलसे छुटाबैगो, और मए आएके तोके फिरसे देखनके पामंगो।

अन्तिम अभिबादन

²³ इपाफ्रास, जो मिर सँग जेलमे हए, काहेकी बो येशू ख्रीष्टको सेवा करत हए, बो तोके अभिबादन पठाइ हए।

²⁴ और मर्कूस, अरिस्‍तार्खस, डेमास और लूका जो मेरे सँग प्रभुको काम करत हएं; जे अभिबादन पठाइ हएं।

²⁵ मए प्राथना करत हओं, कि प्रभु येशू ख्रीष्टको अनुग्रह तिर उपर रहातए रहाबए।