मर्कूस 16 - राना थारु नयाँ नियम

येशू मरके जिन्दा भओ

¹ संझाके जब पबित्र दिन बितिगओ रहए, तओ मरियम मग्दलिनी और छोटो याकूब और योसेफकी अइया मरियम और सलोमी, सुगन्धित मलम खरिदीं ताकी येशूको मरो भओ शरीरमे लगाएके बाके आदर कर सकएं।

² हप्ताको पहिलो दिनमे, सुबेरे दिन निकरतए खिना बे गड्डामे पुग्गइं।

³ डगरमे बे आपसमे कहीं, “हमर ताहीं गड्डाको पत्थर कौन हटाएदेबए?”

⁴ पर जब बैयर गुफा घेन देखीं, तओ बे देखीं, कि हुवाँ बडो पत्थर, गुफा भितर घुसन बारो ठाउँसे पहिलीयएसे लुणको रहए।

⁵ जब बैयर गड्डा भितर पुगीं और भितर गइं, तओ बे देखीं, कि एक लोग चमकदार सेतो कुर्ता पैधो भओ बिनके दहिना घेन बैठो रहए और बे डराइ गइं।

⁶ बो लोग बैयरनसे कही, “मत डराबओ, तुम नासरत गाउँको येशूके ढुणत हओ, जौनके क्रूसमे टँगाओ गओ रहए। बा मरे मैसे जिन्दा हुइके उठीगओ हए, बा हियाँ नाए हए। बाके धरो भओ ठिहा देखओ।

⁷ अब जाओ और पत्रुस और बाके चेलनके जा खबर दइके बताओ, येशू तुमसे पहिले गालील परदेशमे जाए रहो हए, और तुम बाके देखैगे, जैसे कि बा पहिलीयए तुमके बताइ रहए।”

⁸ जा सुननके, बे येशूके दफ्नान बारो ठिहासे बाहिर आइं और भागीं, काहेकी बे डरके मारे काँपत रहएं। डगरमे, बे कोइके कछु नाए बताइं काहेकी बे डराइगइ रहएं।

मरियम मगदलीनी येशूके देखी

⁹ इतबारके सुबेरे, जब येशू मरे मैसे जिन्दा हुइगओ, तओ सबसे पहिले जौन आदमीके बा दिखाइ दइ, बो मरियम मग्दलिनी रहए। जा बहे मरियम हए, जोके येशू एकदाओं सात भुतनको कब्जा मैसे छुटाइ रहए।

¹⁰ मरियम येशूके चेलनके ठिन गइ और बिनके बताइ, कि का भओ रहए। बे येशूके ताहीं बिलकत रहएं।

¹¹ पर मरियम बिनसे कही, “येशू जिन्दा हए, और मए हबए बाके देखो हओं!” तओ बे सोचीं, “जा सच नाए होन सकत हए।”

येशू दुई चेलनके दिखाइ दइ

¹² बो दिन पिच्छु, येशू अपने दुई चेलनके दिखाइ दइ, जब बे यरूशलेमसे आस-पासके इलाकामे अपने घर जात रहएं। पर बे बाके तुरन्त नाए चिन पाइं, काहेकी बा बहुत दुस्रो हानी दिखात रहए।

¹³ जब बे बाके चिनलैं, तओ दुनौ चेला यरूशलेममे लौटके चलेगए। बे बाके और चेलनके बताइं, कि का भओ रहए, पर बे जामे बिश्वास नाए करीं।

महान आदेश

¹⁴ जाके पिच्छु, येशू एघार चेलनके फिर दिखाइ पणो, जब बे खानु खानके बैठे रहएं। येशू बिनके डाँटी काहेकी बे आदमीनके गवाहीमे बिश्वास करनके ताहीं बहुत जिद्दी रहएं जौन बाके मरे मैसे जिन्दा होनके पिच्छु देखी रहएं।

¹⁵ तओ येशू उनसे कही, “संसारमे हर ठिहामे जाओ और सब आदमीनके बीच अच्छो समाचार परचार करओ।

¹⁶ जो कोइ फिर अच्छो समाचारमे बिश्वास करैगो और एक चिन्हाके रुपमे बप्तिस्मा लेबैगो, बो परमेश्वरसे अपने पापनके ताहीं दण्ड पानसे बचाओ जएहए। पर हरकोइ, जो मोएमे बिश्वास करनसे मनाही करैगो, बो परमेश्वरद्वारा अपन पापके ताहीं दण्ड पाबैगो।

¹⁷ और जौन आदमी बिश्वास करत हए, बे जे शक्तिशाली चमत्कारके प्रमाणके रुपमे करपामंगे: मिर नाउँमे बे भुतके बाहिर निकारंगे, और मए बिनके नयाँ भाषा मस्कन बारे बनामंगो,

¹⁸ अगर बे बिष बारे साँपन्के पकडंगे, तहुँफिर साँप बिनके नुक्सान नाए पुगाबैगो। और अगर कुइ बिषालु चीज पिमंगे, तओ जासे बिनके कोइ हानी नाए हुइहए। बे रोगीनके उपर हात धरंगे और बे अच्छे होमंगे।”

येशूके स्वर्गमे उठाए लैगओ

¹⁹ जब प्रभु येशू चेलनके जे सब बात कहेडारी, तओ परमेश्वर बाके स्वर्गमे उठाए लइ और बा परमेश्वरके सँग शासन करनके ताहीं परमेश्वरके दहिना घेन बैठिगओ।

²⁰ और चेला सब ठिहामे गए और जाएके आदमीनके बीच अच्छो समाचारको परचार करीं। प्रभु बिनके मदत करी और जा शक्तिशाली चमत्कारके दिखाइ, कि बाको बचन सच्चो रहए। आमेन।