मत्ती 3 - राना थारु नयाँ नियम

बप्तिस्मा देन बारो यूहन्ना और बोको सन्देश

¹ बहे समयमे बप्तिस्मा देन बारो यूहन्ना यहूदिया परदेशको जंगली इलाकामे आओ, और अइसो कहात परचार करन लागो,

² “पाप करन छोडके परमेश्वर घेन घुमओ, काहेकी स्वर्गको राज्य ढिँगै आइगओ हए।”

³ काहेकी जा बहे हए, जौनके बारेमे यशैया अगमबक्ता आदमीसे अइसे कही रहए: “जंगली इलाकामे एक आदमी अइसो चिल्लत कहात रहए, प्रभुके आगमनके ताहीं अपनएके तयार करके डगर सुधारओ जौन हुइके बा आबैगो।”

⁴ बप्तिस्मा देन बारो यूहन्ना ऊँटको बारसे बिनो साधारण कुर्ता लगात रहए, और करह्याँओँमे खालको फेंटा बाँधत रहए, और टिंण्हा और बनको सहात खात रहए।

⁵ यरूशलेम सहर और सब यहूदिया परदेशके, और यर्दन नदीयाके आसपिसके इलाकाके सब आदमी बिनके ठिन गए,

⁶ और अपन गलत काम स्वीकार करत यर्दन नदीयामे बिनसे बप्तिस्मा लेन लागे।

⁷ तओ फरिसीनको समुह और सदुकीनको समुह मैसे बहुत जनै बप्तिस्मा लेन आत देखके बिनसे बो कही, “तुम आदमी जहेरिले साँप कता दुष्ट हओ, आन बारो दण्डसे भाजन कौन तुमके चेतावनी दइ?

⁸ जहेमारे पाप करन छोडके परमेश्वर घेन घुमओ और सुहान बारो फरा फराओ।

⁹ अब्राहाम हमर दौवा हए करके आपसमे मत् कहाओ। काहेकी मए तुमसे कहात हओं, परमेश्वर जा पत्थरसे अब्राहामके ताहीं सन्तान उत्पन्न कर सकत हए।

¹⁰ और हबए रुखाके जरमे कुढाहरी पणिगओ हए। और जौन रुखा अच्छो फरा नाए फराए रहएं, बेहीं रुखा काटके आगीमे फेके जामंगे।

¹¹ जौन मोसे पिच्छु आबैगो, बा मोसे बहुत शक्तिशाली हए, और कमैया बनके लोहोकके बाको जुत्ताको तनि खोलनको लायकको मए नाए हओं। मए तुमके पानीसे बप्तिस्मा दओ हओं। पर बा तुमके पबित्र आत्मासे बप्तिस्मा देबैगो और आगीको बप्तिस्मा देहए।

¹² बाको, फटकन बारो सुपो बाके हातमे हए, और बा अपनो आँगनमे अच्छेसे सफा करेहए, और गेहुँके कुठियामे इकट्ठा करैगो, पर भुसाके नाए बुतन बारी आगीमे जलाबैगो।”

यूहन्नासे येशूको बप्तिस्मा

¹³ बे दिनमे जब बप्तिस्मा देन बारो यूहन्ना बप्तिस्मा देत रहए, तओ येशू गालील परदेशके नासरत गाउँसे आओ, और यूहन्नासे यर्दन नदीयामे बप्तिस्मा लइ।

¹⁴ तओ बप्तिस्मा देन बारो यूहन्ना अइसे करके बाके रोकन लागो, “बरु मोके त तुमसे बप्तिस्मा लेनके जरुरी हए, और तुम मेरे ठिन आए?”

¹⁵ तओ येशू बिनसे कही, “अइसियए होनदेओ, परमेश्वरको हरेक इच्छा पुरा करन हमके हबए अइसियए करन पणैगो।” जा बात मानके यूहन्ना येशूके बप्तिस्मा दइ।

¹⁶ और येशू बप्तिस्मा लैके तुरन्त पानीसे निकरके आतए खीना येशू स्वर्ग उघरो देखी, और परमेश्वरको आत्मा कबुतरके रुपमे अपन उपर उतरत देखी।

¹⁷ तओ स्वर्गसे परमेश्वरको अबाज आओ, “तए मिर प्यारो लौंणा हए, तोसे मए गजब खुसी हओं।”