मत्ती 27 - राना थारु नयाँ नियम

पिलातसके अग्गु येशू

¹ जब भुकभुको सुबेरे भओ रहए, तओ सब मुखिया यहूदी पुजारी और जनताके यहूदी अगुवनको समुह येशूके मृत्युदण्ड देन करके येशूके बिरुद्धमे सरसल्लाह करीं

² और बे येशूके बाँधके लैगए, और हाकिम पिलातस ठिन सौँपदइं।

यहूदा इस्करियोतको आत्महत्या

³ तओ बाके पकणान बारो यहूदा इस्करियोतके पता चलो, कि बाके मरबान बारो दोषी ठहिरैगो। तओ बो पछतानो और बे तीस चाँदीको सिक्का मुखिया यहूदी पुजारी और यहूदी अगुवनको समुहके ठिन फिरके घुमानके आओ।

⁴ और कही, “मए निर्दोष आदमीके पकणाएके पाप करो हओं।” पर बे कहीं, “जासे हमए का मतलब? तए अपनए जान।”

⁵ तओ बो बे चाँदीके सिक्काके यरूशलेमको मन्दिरके आँगनमे फेकके गइभओ, और बाहिर जाएके अपनए फासी लैके आत्माहत्या करलै।

⁶ पर मुखिया यहूदी पुजारी चाँदीके सिक्का लैके कही, “इनके मन्दिरको तिजोरीमे धरनके ठिक नाए हए, काहेकी जा कोइ आदमीको खुनको मोल हए।”

⁷ जहेमारे बे आपसमे सल्लाह करके, बो पैसासे परदेशीनके मट्टी देनके ताहीं कुम्णक जमिन किनीं।

⁸ जहेमारे बो जमिनके आजतक फिर खुनको जमिन कहात हएं।

⁹ हियाँ यर्मिया अगमबक्ताको कहो भओ बचन पुरो भओ, “बे बो चाँदीके तीस सिक्का अथवा बो किमत, जौन इस्राएल देशके आदमी बोके देनके ताहीं सहमत भए रहएं।

¹⁰ और परमप्रभु मोके अढाइ अनुसार, कुम्णाके खेत खरीदनके ताहीं बे बो सिक्काको प्रयोग करीं।”

पिलातसको येशूसे प्रश्न

¹¹ येशू हाकिमके अग्गु ठाणो रहए, और बे येशूसे पुछीं, “का तए यहूदीको राजा हए?” येशू बिनसे कही, “तुमहीं अइसो कहात हओ।”

¹² तओ मुखिया यहूदी पुजारी और यहूदी अगुवनको समुह येशूके उपर दोष लगाइं, तओ येशू कोइ जबाफ नाए दइ।

¹³ तओ पिलातस येशूसे कही, “तुमर बिरुद्धमे बहुत बातको गवाही देत हएं, का तुम नाए सुन्त हओ?”

¹⁴ पर येशू बिनके एकु बातक फिर जबाफ नाए दइ। हाकिम फिर जा बातमे गजब अचम्मो मानी।

येशूके छोडनके पिलातसको असफलता

¹⁵ निस्तार तेवहारको बेरा बडो हाकिम आदमीनको रोजो भओ एक जनै कैदीके छोडेकर्त रहए।

¹⁶ बो समय बारब्बा नाउँको एक नामी कैदी रहए।

¹⁷ जब आदमी इकट्ठा भए, पिलातस बिनसे पुछीं, “तुम कौनके चाँहत हओ? मए तुमर ताहीं कौनके छोडदेओं? ‘बारब्बाके’ कि ‘ख्रीष्ट कहान बारो येशूके?’”

¹⁸ काहेकी बो जानत रहए कि बे बाके दिक्कसे सौंपी रहएं।

¹⁹ तओ जब बो न्याय-आसनमे बैठो रहए, तओ बहे समयमे बोकी बैयर अइसे कहिके खबर पठाइ, “येशू निर्दोष आदमी हए बाके कुछु मत् करीयओ, काहेकी आज सपनामे येशूके मारे मए बहुत दु:ख भोगो हओं।”

²⁰ तओ मुखिया यहूदी पुजारी और यहूदी अगुवनको समुह बारब्बाके छोडदेन और येशूके मृत्युदण्ड देनके माग करन आदमीके उकसाइं।

²¹ हाकिम फिरसे बिनसे पुछी, “दुई मैसे कौनके मए तुमर ताहीं छोडदेओं करके तुम चाँहत हओ?” बे कहीं, “बारब्बाके।”

²² पिलातस बिनसे कही, “तओ ख्रीष्ट कहान बारो येशूके मए का करओं?” बे पिलातसके जबाफ दइके कहीं, “येशूके क्रूसमे टाँगओ।”

²³ बो कही, “काहे? येशू का अपराध करीहए?” तओ बे और जोडसे चिल्लाइं, “येशूके क्रूसमे टाँगओ।”

²⁴ पर कोइ सीप नाए लगो देखके, झन् हलचल मचिजएहए करके डराएके पिलातस पानी लैके भिडके अग्गु अपन हात धोएके कही, “तुम अपनए जानओ, मए जा आदमीको खुनसे निर्दोष हओं।”

²⁵ सब आदमी जबाफ दइं, “येशूको खुन हमके और हमर सन्तानके उपर पणए।”

येशूके क्रूसमे चढानके सौपी

²⁶ तओ पिलातस बिनके ताहीं बारब्बाके छोड दइ, और येशूके कोर्रा लागएके क्रूसमे टाँगनके सौँपदइ।

येशूको अपमान

²⁷ तओ हाकिमके सिपाही येशूके महलमे लैगए, और जम्मए पल्टन बाके चारौ तरफ इकट्ठा हुइगए।

²⁸ बे येशूको कुर्ता खोलके येशूके लाल कुर्ता लगाए दइं।

²⁹ बे काँटोको मुकुट बनाएके येशूके मुणमे लगाए दइं, और येशूके दहिना हातमे लकणी दइं, और येशूके अग्गु घुँटो टेकके येशूसे अइसे कहिके गिल्ला करीं, “हे यहूदीनको राजा, प्रणाम।”

³⁰ तओ बे येशूके उपर थुकीं, और बो लकणी लैके येशूके मुणमे मारीं।

³¹ जब बे येशूके गिल्ला करडारीं तओ बे बाको कुर्ता खोलदइं और येशूके अपनो कुर्ता पैँधाएके येशूके क्रूसमे टाँगन लैगए।

येशूके क्रूसमे टाँगीं

³² जातएजात बे सिमोन नाउँ भओ कुरेनी सहरको एक आदमीके पाइं, और बे बोके येशूको क्रूस बोकनके कर लगाइं।

³³ जब बे गलगथा कहान बारो ठिहामे आएपुगे, जौनके खोपडीको ठिहा कहात हएं,

³⁴ तओ बे येशूके पित मिलो भओ अंगुरको रसा पिनके दइं, पर येशू चाखके बो पिन नाए चाही।

³⁵ तओ बे येशूके क्रूसमे चढाइं, और चिट्ठा डारके बाको कुर्ता आपसमे बाँटलैं।

³⁶ और हुवाँ बैठके बे बाको चौकीदारी करन लागे।

³⁷ “जा येशू, यहूदीको राजा हए” कहिके बाके बिरोधमे दोष-पत्र बनाइं और बे बाके मुणसे उपर टाँगदइं।

³⁸ येशूके सँग दुई डाँकु फिर क्रूसमे टाँगेगए रहएं, एक येशूके दहिना घेन और दुस्रो दिबरा घेन।

³⁹ बो डगर हुइके आनजान बारे अपन-अपन मुण हलाएके बाको गिल्ला करीं,

⁴⁰ और कहीं, “ए मन्दिर उजाणन बारो और बोके तीन दिनमे बनान बारो, अपनएके बचा, और परमेश्वरको लौंणा हए तओ, क्रूससे उतरके तरे आएजा।”

⁴¹ मुखिया यहूदी पुजारी फिर मोशाको नियम कानुन सिखान बारे और यहूदी अगुवनको समुह सँगए मिलके येशूको गिल्ला करत कहीं,

⁴² “जा औरेनके त बचाइ, पर अपनएके नाए बचाए पाइ। जा इस्राएल देशको राजा हए कहेसे हबए क्रूससे तरे उतरके अबए, तओ हम बिश्वास करंगे।

⁴³ जा परमेश्वरमे भरोसा करत रहए और परमेश्वर जाके चाँहत हए कहेसे बा जाके अभइ छुटकारा देबए, काहेकी जा ‘मए परमेश्वरको लौंणा हओं,’ करके कहात रहए।”

⁴⁴ और बाके सँग क्रूसमे टँगे बे डाँकु फिर अइसीयए बोको अपमान करीं।

येशूको मृत्‍यु

⁴⁵ अब दुपहारसे लैके तीन बजेतक सारा देशमे अंधियारो छैगओ।

⁴⁶ तीन बजे घेन येशू अइसे करके बडो जोडसे चिल्लाइ, “इलोई, इलोई, लामा सबखथनी?” अर्थात्, “हे मिर परमेश्वर, हे मिर परमेश्वर, तुम मोके काहे छोडदए?”

⁴⁷ हुवाँ ठाणेभए मैसे कित्तो जनै जा सुनके कहीं, “जा आदमी एलियाके बुलातहए।”

⁴⁸ बिन मैसे एक जनै झट्ट दौडके गओ और एक स्पन्ज लैके सिर्कामे डुबाएके डण्डामे धरके बाके पिन दइ।

⁴⁹ पर औ आदमी कहीं, “देखएं, कोइ एलिया यिनके बचान आत हए कि?”

⁵⁰ तओ येशू फिर बडो जोडसे चिल्लाइ और अपन आत्मा त्याग दइ।

⁵¹ तओ बो समयमे यरूशलेमको मन्दिरको पर्दा उपरसे लैके तरे तक फटके दुई भाग हुइगए और जमिन काँपन लागी और चट्टान फुटे।

⁵² तओ चिहान खुलीगए, और मरे भए बहुत सन्तनके मृत शरीर जिन्दा हुइके उठे,

⁵³ और बे चिहानसे निकरे, और जब येशू मरके जिन्दा भओ तओ बे पबित्र सहरमे गए और बहुतनके दिखाइ पणे।

⁵⁴ जब कप्तान और जो बोके सँग चौकीदारी करत रहए, तओ भुकम्प और जो कुछ भओ रहए, बो देखके बहुत डराइगए, और कहीं, “नेहात्तओ जा परमेश्वरको लौंणा रहए।”

⁵⁵ हुवाँ गालील परदेशसे आएभए बहुत बैयर फिर रहएं, बे दुरसे जा सब देखनडटि रहएं। बे येशूको सेवा-सत्कार करत गालील परदेशसे येशूके पिच्छुपिच्छु आइ रहएं।

⁵⁶ बे मैसे मरियम मग्दलिनी, और छोटो याकूब और योसेफकी अइया मरियम, और जब्दियाके लौंणनकी अइया रहए।

येशूको दफन

⁵⁷ संझा हुइगओ रहए तओ अरिमाथियाको योसेफ नाउँ भओ एक जनै धनी आदमी आओ। बो अपनए फिर येशूको चेला रहए।

⁵⁸ बो पिलातसके ठिन जाएके येशूको मृत शरीर मागी, और पिलातस फिर बोके लहास लेनके अनुमति दइ।

⁵⁹ योसेफ मृत शरीर लैजाएके सफा मलमलको लत्तामे लपेटी,

⁶⁰ और बो चट्टानमे खोपके बनाइ भइ अपनो नयाँ चिहानमे धरी, और चिहानके द्वारमे एक बहुत भारी पत्थर लुढकाएके चलोगओ।

⁶¹ चिहानके अग्गु मरियम मग्दलिनी और दुसरी मरियम फिर बैठी रहएं।

येशूके मरघटमे पहरेदार

⁶² तओ आन बारो कलके दिन, पबित्र दिन रहए, मुखिया यहूदी पुजारी और फरिसीनको समुह पिलातससे मिलनके गए।

⁶³ “हजुर, हमके याद हए, कि बो ठगहा जिन्दा रहन पेती कही रहए, ‘मिर मरनके तीन दिन पिच्छु मए फिर जिन्दा हुइ जामंगो।’

⁶⁴ बहेमारे आज्ञा देओ, कि तिसरो दिनतक बे बो चिहानके ध्यानसे लख्बारी करएं, अगर तुम अइसे नाए करैगे तओ बिनके चेला आएके बाको लहास चुराएके लैजामंगे, और आदमीनसे झुठ कहान लगंगे, कि ‘येशू मरो भओ मैसे जीइउठो हए’ और जा अभएको झुठ पहिलेको झुठसे खराब हुइ जाबैगो, जैसे येशू ‘ख्रीष्ट हओं’ करके दाबी करे रहए।”

⁶⁵ तओ पिलातस बिनसे कही, “सिपाहिनके लैजाएके जित्का सिकैगे अच्छेसे चिहानको चौकीदारी लग्बाबओ।”

⁶⁶ और बे सिपाहिनके सँगमे लैके गए, और पत्थरमे लाल मोहर लगाइं ताकी कोइ फिर बो पत्थरके नाए हटाबए।