मत्ती 26 - राना थारु नयाँ नियम

येशूको हत्याको षड़यंत्र

¹ जब येशू जे सब बात कहेडारी तओ अपन चेलनसे कही,

² “तुमके पता नैयाँ, अबको दुई दिन पिच्छु यहूदीनको निस्तार तेवहार होबैगो, और आदमीको लौंणा क्रूसमे टाँगनके ताहीं पकणो जएहए।”

³ तओ कैयाफा नाउँको प्रधान यहूदी पुजारीके दरबारमे मुखिया यहूदी पुजारी और जनताके यहूदी अगुवनको समुह इकट्ठा भए।

⁴ और बे येशूके कैसे पकणएं और मारएं करके सल्लाह करन लागे।

⁵ तओ बे कहीं, “तेवहारमे नाए, नत आदमीनमे हलचल हुइजएहए।”

येशूके उपर बहुमूल्य जटामसीको तेल अख्नाइ

⁶ येशू बेथानियामे सिमोन, जौनक येशू कोढ रोगसे अच्छो करि रहए, बहेके घरमे रहए,

⁷ एक बैयर सिङ्ग मरमरको एक शीशीमे बहुमूल्य जटामसीको तेल लैके बाके ठिन आइ, और बा खानके बैठो रहए, तओ बो बाके मुणमे अख्नाए दइ।

⁸ जा देखके चेला दिक्काइगए, और बे कहीं, “काके ताहीं जा इत्तो नुकसान करीहए?

⁹ काहेकी जा जटामसीको तेल बहुत रुपैयामे बेँचके बो पैसा गरीबके दओजाए सकत रहए।”

¹⁰ तओ येशू जा बात पता पाएके बिनसे कही, “तुम जा बैयरके काहे दु:ख देत हओ? बो त मिर ताहीं एक अच्छो काम करीहए।

¹¹ काहेकी गरीब तुमर सँग सब दिन हुइहएं। पर मए तुमर सँग सब दिन नाए हुइहओं।

¹² बो जा जटामसीको तेल मिर शरीरमे अख्नाएके दफ्नके ताहीं मोके तयार करीहए।

¹³ नेहात्तओ, मए तुमसे कहात हओं, सारा दुनियामे जहाँ जा अच्छो समाचार परचार हुइहए, जा बैयर जो करीहए, बोको चर्चा बक सम्झनाके ताहीं करोजएहए।”

यहूदा इस्करियोतको बिश्वासघात

¹⁴ तओ बाह्र चेला मैसे एक जनै यहूदा इस्करियोत कहान बारो मुखिया यहूदी पुजारी ठिन गओ,

¹⁵ और कही, “अगर मए येशूके तुमर हातमे सौँप देहओं तओ, मोके का देहओ?” बे बोके चाँदीके तीस सिक्का दइं।

¹⁶ बहे बखतसे यहूदा बाके पकणानके मौका ढुँणन लागो।

अन्तिम भोज

¹⁷ जब अखमिरी रोटीको तेवहारको पहिलो दिन रहए तओ चेला येशू ठिन आएके कहीं, “तुमर ताहीं यहूदीनको निस्तार तेवहारको भोज खानके तयारी हम कहाँ करएं?”

¹⁸ येशू कही, “सहरमे एक आदमी ठिन जाओ, और बोसे कहाओ, ‘महान गुरु कही हए, मिर समय ढिँगै आइगओ हए। मए अपन चेला सँग तुमर घरमे यहूदीनको निस्तार तेवहार मनएहओं।’ ”

¹⁹ तओ येशूको हुकुम अनुसार चेला करीं और बे यहूदीनको निस्तार तेवहारको भोजको तयारी करीं।

²⁰ जब संझा भओ तओ येशू बाह्रऔ चेलनसँग बैठो।

²¹ बा खात पेती कही, “नेहात्तओ, मए तुमसे कहात हओं, तुम मैसे एक जनै मोके पकणाए देहए।”

²² तओ बे बहुत दुखी हुइके सब येशूसे पुछन लागे, “प्रभु, का बो मए हओं?”

²³ और येशू कही, “जौन मिर थरियामे रोटी बोरीहए, बहे मोके पकणाए देहए।

²⁴ आदमीको लौंणाके त बोके बारेमे पबित्र धर्मशास्त्रमे लिखेबमोजिम हुइहए। पर बो आदमी डर लागन बारो सजाय पबैगो, जौन आदमीको लौंणाके धोखा देबैगो। बो आदमीके नाएजन्मनो बोके ताहीं असल रहए।”

²⁵ तओ येशूके पकणाए देन बारो यहूदा इस्करियोत पुछी, “महान गुरु, का बो मए हओं?” येशू बोसे कही, “तए अपनए कहात हए।”

प्रभुभोज

²⁶ बे खानु खात पेती येशू रोटी लइ और आशिष दइके बा रोटी तोरी और चेलनके दइके कही, “लेओ, खाओ, जा मिर शरीर हए।”

²⁷ तओ कटोरा फिर लइ तओ येशू धन्यबाद दइके चेलनके अइसे कहिके दइ, “तुम सब जासे पिबओ।

²⁸ काहेकी जा नयाँ करारको बलिदानको खुन हए, जा बहुतके ताहीं पापनको क्षमाके ताहीं बहोहए।

²⁹ पर मए तुमसे कहात हओं, कि अंगुरको रसा मए तबतक नाए पिइहओं जब तक अप्नो दौवाको राज्यमे तुमरसँग नयाँ अंगुरको रसा नाए पिइलेओं”

³⁰ एक भजन गाएके पिच्छु बा जैतून डँगा घेन निकरके गओ।

पत्रुसको इन्‍कारके बारेमे येशूको अगमबाणी

³¹ तओ येशू बिनसे कही, “आज रातके मिर कारणसे तुम पच्छु हटके जएहओ। काहेकी अइसो लिखो हए, ‘मए बकरेहेराके मारंगो, और बगालके भेंणा तितरबितर हुइजए हएं।’

³² पर मए मरके जिन्दा हुइके तुमसे अग्गु गालीलमे जएहओं।”

³³ पत्रुस येशूके जबाफ दइके कही, “तुमर कारणसे सब जनै पिच्छु हटजएहएं पर मए कभु पिच्छु नाए हटंगो।”

³⁴ येशू बोसे कही, “नेहात्तओ, मए तोसे कहात हओं, आज रातके मुर्गा बासनेसे अग्गु तए मोके तीन चोटी इन्कार करैगो।”

³⁵ पत्रुस येशूसे कही, “मोए तुमर सँग मरन पणेहए, तहुँफिर मए तुमके इन्कार नाए करंगो।” और बाँकी सब चेला अइसीयए कहीं।

गेतसमनीके बगियामे येशूको प्रार्थना

³⁶ तओ येशू गेतसमनी कहान बारो ठाउँमे बिनके सँग गओ, और चेलनसे कही, “तुम हियाँ बैठओ, मए थुरदुर जाएके परमेश्वरसे प्राथना करंगो।”

³⁷ और अपने सँग पत्रुस और जब्दियाके दुई लौंणनके लैके येशू शोकित और व्याकुल होन लागो।

³⁸ तओ येशू बिनसे कही, “मिर प्राण गहिरो शोकसे अध्मरा हुइगओ हए। तुम हियाँ बैठियओ, और मिर सँग जगे रहियओ।”

³⁹ और येशू थुरदुर जाएके मुँहुँके बल गिरके परमेश्वरसे अइसे प्राथना करी, “हे मिर दौवा, हुइ सकत हए तओ, जा कटोरा मोसे हटाए देओ। तहुँफिर जैसे मए चाँहत हओं उइसे नाए पर जैसी तुम चाँहत हओ उइसीयए होबए।”

⁴⁰ फिर येशू चेलनके ठिन आओ और बिनके सोत पाइ, और पत्रुससे कही, “का तुम मिर सँग एक घण्टा फिर जगके नाए बैठ पाए?

⁴¹ जगे रहओ, परमेश्वरसे प्राथना करओ और सतावटमे मतपणओ। आत्मा त नेहात्तओ तयार हए, पर शरीर कमजोर हए।”

⁴² फिर दुस्रो चोटी येशू परमेश्वरसे प्राथना करन गओ और अइसे कही, “हे मिर दौवा, मोए जा नाए पिएसे नाए हुइहए कहेसे तुमरी इच्छा पुरा होबए।”

⁴³ येशू फिरसे आएके उनके सोत पाइ, काहेकी बे बहुत निँधाने रहएं।

⁴⁴ जहेमारे येशू फिर बिनके छोडके गओ, और जाएके बेहीं बात दोहोराएके तिसरो चोटी परमेश्वरसे प्राथना करी।

⁴⁵ तओ येशू चेलनके ठिन आएके बिनसे कही, “तुम हबएतक सोए रहेहओ और अराम कर रहेहओ? देखओ, समय ढिँगै आइगओ हए। आदमीको लौंणा पापीनके हातमे पणनलागो हए।

⁴⁶ उठओ, चलएं। देखओ, पकणाए देन बारो ढिँगै आइगओ हए।”

येशूके बन्दी बनानो

⁴⁷ येशू मसकतए-मसकत बाह्र चेला मैसे एक चेला आओ जो यहूदा इस्करियोत रहए। बोकेसँग मुखिया यहूदी पुजारी और जनताके यहूदी अगुवनको समुहके द्वारा पठाइभइ एक बडी भिड तरबार और लठ्ठु लैके आए।

⁴⁸ बाके पकणाए देन बारो उनके एक संकेत दइ रहए, “जौन आदमीके मए चुमंगो, बा बहे हए, बहेके पकणीयओ।”

⁴⁹ तुरन्त येशू ठिन जाएके यहूदा इस्करियोत कही, “हे महान गुरु प्रणाम!” और बो बाके चुमी।

⁵⁰ येशू बोसे कही, “सँगी, तुम जो करन आए हओ, बो करी डारओ।” तओ बे अग्गु आएके येशूके पकण लइं।

⁵¹ येशूके सँगमे होन बारे मैसे एक जनै अपनो हात बढाएके तरबार निकारी। और प्रधान यहूदी पुजारीको कमैयाको कान काटके अलग करदइ।

⁵² तओ येशू बोसे कही, “अपन तरबार खोलमे डार, काहेकी तरबार चलान बारे सब तरवारसे नष्ट हुइहएं।

⁵³ तुम का मानत हओ, का मए अपन दौवासे बिन्ती नाए करपए हओं, और का बा तुरन्त स्वर्गदूतनको बाह्र पल्टनसे जद्धा मिर ताहीं नाए पठाए देहए?

⁵⁴ पर अगर मए मागो कहेसे त पबित्र-शास्त्रमे अइसीयए होन पणैगो करके लिखीभइ बात कैसे पुरो हुइपए हए?”

⁵⁵ बो समय येशू भिडसे कही, “डाँकुके पकणन कता मोके पकणन तरबार और लठ्ठु लैके तुम काहे आए? मए सब दिन यरूशलेमको मन्दिरमे शिक्षा देत बैठत रहओं, तओ तुम मोके नाएपकणे।

⁵⁶ पर अगमबक्तनको पबित्र-शास्त्रको बचन पुरा होए करके जा सब भओ हए।” तओ सब चेला बाके छोडके भाजे।

यहूदी सभाघरके ठिन येशू

⁵⁷ येशूके पकणके बाके प्रधान यहूदी पुजारी कैयाफाके ठिन लैगए। हुवाँ मोशाको नियम कानुन सिखान बारे और यहूदी अगुवनको समुह इकट्ठा भए रहएं।

⁵⁸ पर पत्रुस दुरएसे प्रधान यहूदी पुजारीको घरको भवनको आँगन तक बाके पिच्छुपिच्छु गओ, और अन्तमे का हुइहए, सो देखनके ताहीं भितर घुसके चौकीदार सँग बैठो।

⁵⁹ अब मुखिया यहूदी पुजारी और जम्मए यहूदी सभाघरके येशूके दण्ड देनके ताहीं बाके बिरुद्धमे झुठी गवाही ढुँणन लागे।

⁶⁰ बहुत झुठी गवाही देन बारे आए, पर बे कोइ प्रमाण नाए पाइं। आखिरमे दुई जनै अग्गु आए,

⁶¹ और कहीं, “जा आदमी कही हए, ‘मए परमेश्वरको मन्दिरके उजाणके जाके तीन दिनमे बनाए देहओं।’”

⁶² तओ प्रधान यहूदी पुजारी उठके कही, “का तए कुछ जबाफ नाए देहए? जे आदमी तेरे बिरुद्धमे दइभइ गवाही का हए?”

⁶³ पर येशू चुप रहो। प्रधान यहूदी पुजारी येशूसे कही, “जिन्दा परमेश्वरको नाउँमे कसम खाएके कहो, हमके बता, का तए परमेश्वरको लौंणा ख्रीष्ट हए?”

⁶⁴ येशू बोसे कही, “तुम अपनए कहीदए: तहुँफिर मए तुमसे कहात हओं, पर अबसे तुम आदमीको लौंणाके सर्बशक्तिमानके दहिना हात घेन बैठो, और बादरके बद्रिमे आत देखैगे।”

⁶⁵ तओ प्रधान यहूदी पुजारी अपन कुर्ता फारी और कही, “जा त परमेश्वरको निन्दा करी हए। हमके अब औ गवाहीको का जरुरत? तुम हबए जाके परमेश्वरको बदनाम करत सुनलए हओ।

⁶⁶ तुमर का बिचार हए?” बे जबाफ दइं, “जा मृत्युदण्डको लायक हए।”

⁶⁷ तओ बे येशूके मुँहुँमे थुकके मुक्का मारीं, और कोइ-कोइ अइसे कहात थप्पड मारीं,

⁶⁸ “हे ख्रीष्ट हमसे अगमबाणी करके कहो! तोके मारन बारो कौन हए?”

पत्रुस येशूके इन्कार करी

⁶⁹ पत्रुस बाहिर आँगनमे बैठो रहए। एक नोकरनी बोके ठिन आएके कही, “तए फिर गालील परदेशके निबासी येशू सँग रहए।”

⁷⁰ तओ पत्रुस उनके सबके अग्गु इन्कार करके कही, “तए का कहात हए, मए नाए जानत हओं।”

⁷¹ जब बो आँगनको फाटकमे चलोगओ तओ दुस्री नोकर्नी बोके देखी, और हुवाँ बैठन बारे कहीं, “जा आदमी फिर नासरत गाउँमे बैठन बारो येशू सँग रहए।”

⁷² बो फिर कसम खाएके कही, “मए बो आदमीके नाए चिनत हओं।”

⁷³ थोरी देरमे हुवाँ भए आदमी फिर पत्रुससे कहीं, “नेहात्तओ, तुम फिर बिन मैसे एक हओ, काहेकी तुमर बोलीसे जा पता चलत हए।”

⁷⁴ तओ पत्रुस अपनएके सरापत कसम खान लागो “मए बा आदमीके चिन्तए नैयाँ।” और तुरन्त मुर्गा बासदइ।

⁷⁵ तओ पत्रुसके येशूकी कहीभइ बात याद आइगइ, “मुर्गा बासनेसे अग्गु तए मोके तीन चोटी इन्कार करैगो।” तओ बो बाहिर जाएके धरधरहुँस रोइ।