मत्ती 25 - राना थारु नयाँ नियम

दश कन्याकी कहानी

¹ फिर येशू अपने चेलनसे कही, जब मए, आदमीको लौंणा घुमके आमंगो, तओ स्वर्गको राज्य अइसो होबैगो: बे दश कन्या रहएं, जौन अपने दिया लैके दुलहाके भेँट करनके निक्रीं।

² बे मैसे पाँच जनै मुरख और पाँच समझदार रहएं।

³ काहेकी मुरख कन्या अपन दिया लैगइं, और बे अपने सँग अगरो जैतूनको तेल नाए लैगइं।

⁴ पर समझदार कन्या अपन दियाके सँगए-सँग भुलरामे अगरो जैतूनको तेल फिर लैके गइ रहएं।

⁵ दुलहाके आन देर हुइके कारण बे सब निँधके मारे सोइगइं।

⁶ तओ आधि रातमे “देखओ, दुलहा आएरहो हए!” करके अबाज आओ।

⁷ तओ बे सब कन्या जग्गइं, और अपन-अपन दिया ठिकठाक करीं।

⁸ मुरख कन्या समझदार कन्यासे कहीं, “तुमर जैतूनको तेलसे हमके थोरी तेल देबओ, काहेकी हमर दिया त बुतन लागी।”

⁹ तओ समझदार कन्या अइसे करके जबाफ दइं, “हमर और तुमर दुनौके पुगनके ताहीं इत्तो तेल नाए हए, बरु दुकान बारे ठिन जाओ और अपन ताहीं तेल किनओ।”

¹⁰ जब बे तेल किननके गइं तओ दुलहा आइगओ, और तयार होन बारे उनके सँग बेहाके भोजमे भितर घुसीगइं और फाटक बन्द हुइगओ।

¹¹ तओ पिच्छु और कन्या घुमके आइं और रोतए रोत दुलहाके बुलाइं, “हे प्रभु, हे प्रभु, हमर ताहीं फाटक खोलदेओ।”

¹² तओ दुलहा जबाफ दइके कही, नेहात्तओ मए तुमसे कहात हओं, मए तुमके नाए चिनत हओं।

¹³ जहेमारे जगे रहाबओ, काहेकी मए घुमके आन बारो दिन, और बो समय तुम पता नाए पएहओ।

सोनोको सिक्काकी कहानी

¹⁴ “एक मालिक लम्मो यात्रामे जात रहए, और अपने नोकरनके बुलाएके अपन धनसम्पति मैसे कुछ बिनके सौँपदइ।

¹⁵ बो नोकरनको खुबी अनुसार एकके पाँच सोनोको सिक्का, दुस्रेके दुई और तिसरेके एक दइके बो लम्बो यात्रामे चलो गओ।

¹⁶ तओ पाँच सोनोको सिक्का पान बारो तुरन्तए जाएके बो व्यापारमे लागएके और पाँच सिक्का कमाइ।

¹⁷ उइसी दुई सिक्का पान बारो फिर और दुई सिक्का कमाइ।

¹⁸ पर एक सिक्का पान बारो जाएके धर्तीमे खोदके अपन मालिकको धन लुकाएदइ।

¹⁹ बहुत दिन पिच्छु बो नोकरको मालिक आओ, और बो बिनसे हिसाब मागी।

²⁰ तओ पाँच सोनोको सिक्का पान बारो नोकर और पाँच सिक्का लाएके अग्गु आएके अइसे कही, ‘हे मालिक, तुम मोके पाँच सिक्काको जुम्मा दएरहओ, देखओ, मए और पाँच सिक्का कमाओ हओं।’

²¹ मालिक बोसे कही, ‘स्याबास! तए असल और बिश्वासयोग्य नोकर हए, तए थोरी धनमे बिश्वासयोग्य भओ, मए तोके बहुत चीजको जुम्मा देहओं। तए अप्नो मालिकको आनन्दमे सहभागी हो।’

²² दुई सिक्का पान बारो फिर आएके कही, ‘हे मालिक तुम मोके दुई सिक्का दएरहओ। देखओ, मए और दुई सिक्का कमाओ हओं।’

²³ बो मालिक बोसे कही, ‘स्याबास, असल और बिश्वासयोग्य नोकर, तए थोरी धनमे बिश्वासयोग्य भओ, अब मए तोके बहुत चीजको जुम्मा देहओं। तए अप्नो मालिकको आनन्दमे सहभागी हो।’

²⁴ तओ एक सोनोको सिक्का पान बारो फिर आएके कही, ‘हे मालिक मए तुमके जानत रहओं, तुम कठोर आदमी हओ, तुम एक अइसे आदमी हओ जहाँ बीज नाए बोत हओ, पर फसल इकट्ठा करनके आसरा करत हओ।’

²⁵ तभीमारे मए तुमर सिक्का हरबाए डरहओं तओ तुम मोके सजय देबैगे कहिके जहेमारे मए जाएके तुमर सिक्का धर्तीमे गाडके लुकाए दओ हओं। ‘देखओ, जो तुमर हए, बो जहेहए।’

²⁶ बोको मालिक बोके जबाफ दइ, ‘ए दुष्ट, और अल्छी नोकर: जब तए जा जानत रहए, कि मए एक अइसो मालिक हओं जौन बीज नाए बोत हओं पर फसल इकट्ठा करनके आसरा करत हओं।

²⁷ तओ तोके मिर सिक्का लैजाएके ब्याजमे लगानके रहए। तओ मए घुमके आएके कुछ नाए होएसे फिर ब्याज त पातो!’

²⁸ तओ मालिक बेहीं दुई नोकरनसे कही, बो सिक्का बोसे लैलेओ, और जौनकेसँग दश सिक्का हए, बोके देओ।

²⁹ काहेकी जौनकसँग समझ हए, बोके और मिलैगो, और बोकेसँग बहुत हुइहए। पर जौनसँग समझ नैयाँ, बोकेसँग भओ फिर छिनो जएहए।

³⁰ बो बेकामको नोकरके बाहिर अन्धकारमे फेकदेओ, जहाँ आदमी रुइहएं और दाँत किटकिटए हएं।”

येशू दुनियाको न्याय करैगो

³¹ “जब मए, आदमीको लौंणा फिरसे आमंगो, तओ मए अपन महिमामे आमंगो और सब स्वर्गदूतके अपने सँग लामंगो। तओ मए सब आदमीनको न्याय करनके ताहीं अपन महिमामय सिंहासनमे बैठंगो।

³² और बे सब जाति-जातिके आदमी मिर अग्गु इकट्ठा हुइहएं, और जैसी बकरेहेरा, भेंणा और बकरीयाके अलग करदेत हए, उइसी मए बिनके एकदुस्रेसे अलग करंगो।

³³ और मए भेंणनके अपने दहिने घेन धरंगो, जौन धर्मी हएं। और बकरीयनके दिब्रा घेन धरंगो, जौन अधर्मी हएं।

³⁴ तओ मए राजा, मिर दहिना घेन होन बारेनसे कएहओं, ‘आओ, हे मिर दौवाके धन्यके आदमी, बो राज्यके अधिकारी हुइजाओ, जो दुनियाको उत्पत्तिसे तुमर ताहीं तयार करोगओ हए।

³⁵ काहेकी जब मए भुखानो रहओं, तुम मोके खानके खानु दए, जब मए प्यासो रहओं, तुम मोके पिनके पानी दए; जब मए परदेशी रहओं, तओ तुम मोके अपने घरमे बुलाए।

³⁶ जब मए नंग्बा रहओं, तओ तुम मोके पैँधनके ताहीं कपडा दए; जब मए बिमार रहओं, तओ तुम मोके वास्ता करे; जब मए जेलमे रहओं, तओ तुम मेरे ठिन आए और मोसे मिले।’

³⁷ तओ धर्मी जन बाके जबाफ देहएं, ‘हे प्रभु, कब हम तुमके भुखो देखे, और खानके दए, और कब प्यासो देखे, और कब पिन दए?

³⁸ कब हम तुमके परदेशी देखे, और तुमके अपने घरमे बुलाए? और नंग्बा देखे और पैधनके ताहीं कपडा दए?

³⁹ और कब हम तुमके बिमार और जेलमे देखे, और तुमर ठिन आए और तुमसे मिले?’

⁴⁰ तओ मए राजा, बिनके जबाफ दइके कएहओं, ‘नेहात्तओ, मए तुमसे कहात हओं, तुम जे छोटेसे छोटे मिर बिश्वासी ददाभइया मैसे एक जनैके ताहीं करे, बो मिर ताहीं करे।’

⁴¹ तओ मए दिब्रा घेनके आदमीनसे कएहओं, ‘हे सरापित आदमी, मिर अग्गुसे बो कभी फिर अन्त नाए होन बारो आगीमे चलेजाओ, जो शैतान और शैतानको दूतनके ताहीं परमेश्वर तयार करीहए।

⁴² काहेकी जब मए भुखानो रहओं, तओ तुम मोके खान नाए दए, जब मए प्यासो रहओं, तओ तुम मोके पिनके नाए दए।

⁴³ मए परदेशी रहओं, तुम मोके बैठन नाए दए। मए नंग्बा रहओं, और तुम मोके कपडा नाए लागए दए। मए बिमार और जेलमे रहओं, और तुम मोसे मिले नाए।’

⁴⁴ बे फिर अइसे कहिके जबाफ देहएं, ‘प्रभु, कब हम तुमके भुखानो और प्यासो देखे, परदेशी और नंग्बा और बिमार देखे, और जेलमे देखे, और तुमर सेवा नाए करे?’

⁴⁵ तओ मए बिनके जबाफ देहओं, ‘नेहात्तओ, मए तुमसे कहात हओं, जा सबसे छोटे मैसे कोइ एककेसँग नाए करे, बो तुम मेरे ताहीं फिर नाए करे।’

⁴⁶ और जौन दिब्रा घेन हएं जे कभी फिर अन्त नाए होन बारो दण्ड भोगंगे पर धर्मी आदमी कभी फिर नाश नाए होन बारो जीबनमे प्रबेश करंगे।”