मत्ती 20 - राना थारु नयाँ नियम

अंगुरकी बारीमे देहाणी करन बारे

¹ स्वर्गको राज्य जा कहानी कता हए: एक दिन सुबेरे एक जमिनदार अपनो अंगुरको बारीमे देहाणीमे काम लगानके ताहीं आदमी ढुँणन बाहिर निकरो।

² और जमिनदार बिनके एक सिक्का देहओं कहिके, जमिनदार अपन अंगुरको बारीमे काम करनके पठाइ।

³ फिर सुबेरे नौ बजे घेन बाहिर निकरो, तओ औरनके फिर बाहिर बिनाकामके ठाणे देखी,

⁴ और जमिनदार कही, “तुम फिर अंगुरको बारीमे काम करनके जाओ, और जो ठिक देहाणी हए बो मए तुमके देमंगो।”

⁵ तओ बे फिर काम करनके गए। फिर जमिनदार दुपाहरके और संझाके तीन बजे घेन आएके उइसी करके आदमीनके फिर काममे लगाइ।

⁶ और लगभग पाँच बजे घेन निकरके दुस्रेनके फिर ठाणो पाइ, और बिनसे कही “तुम काहे दिनभर बिना कामके ठाणे हओ?”

⁷ बे जमिनदारसे कहीं, “काहेकी, कोइ फिर हमके देहाणीमे नाए लैगाओ।” जमिनदार बिनसे कही, “तुम फिर मिर अंगुरको बारीमे जाओ और हुवाँ काम करओ।”

⁸ संझाके अंगुरको बारीको जमिनदार अपने मुन्सीसे कही, “मजदुरनके बुलाएके सबसे पिच्छु काम करन आन बारेनसे लैके सुरुसे काम करन आन बारेनके सबके उनको देहाणी देओ।”

⁹ जब बे आए, जो लगभग पाँच बजे काम करन सुरु करी रहएं; बे सब, पुरा दिनको देहाणी पाइं।

¹⁰ और जौन सुबेरे आए रहएं, बे जा सम्झीं, कि हमके और जद्धा मिलैगो; पर बे फिर एकए दिनको देहाणी पाइं।

¹¹ जब देहाणी मिली, तओ बे जमिनदारके बारेमे बरबरात कहान लागे।

¹² बे कहान लागे “बे पिच्छु आन बारे एकए घण्टा काम करीं, और तुम बिनके उतनुवए देहाणी दएहओ, जितनो तुम हमके दए हओ। और हम गजब कर्रो घामुमे पुरो दिन कडा महेनत करे।”

¹³ तओ जमिनदार बिन मैसे एक जनैके जबाफ दइ, “ए सँगी, मए तुमर उपर कुछु अन्याय नाए करोहओं; का तुम मिर सँग एक पुरा दिनको देहाणीमे काम करनके ताहीं कबुल नाए करे रहओ?

¹⁴ तुमरी देहाणी लैजाओ, और चलेजाओ; मिर इच्छा हए कि जित्नो तुमके दओ, उत्नुवए जे पिच्छु बारेके फिर देहओं।

¹⁵ पक्का मोके हियाँ अधिकार हए कि मए अपने पैसा अपनी इच्छाके अनुसार खर्च करेहओं। तुमके जलन नाएहोनके चाहो काहेकी मए दुस्रे प्रति दानी हओं।

¹⁶ अइसियए पिच्छु बारे अग्गु हुइहएं और अग्गु बारे पिच्छु हुइहएं।”

येशू तिसरो चोटी अपन मृत्‍यु कि भबिष्यबाणी करी

¹⁷ यरूशलेम सहर घेन जात पेती येशू बाह्र चेलनके अलग लैजाएके डगरमे बिनसे कही,

¹⁸ “हम यरूशलेम सहर घेन जएहएं। अब आदमीको लौंणा मुखिया यहूदी पुजारी और मोशाको नियम कानुन सिखान बारेनके हातमे सौपो जएहए, और बे बाके मृत्युदण्डको दोषी ठहिरएहएं।

¹⁹ बोके गिल्ला करके, कोर्रा लगए हएं, और क्रूसमे टाँगए करके बे अन्यजातिनके हातमे सौपंगे, और तीन दिनमे बो जिन्दा हुइके उठजए हए।”

एक अइया अपने बालकनके ताहीं बिन्ती

²⁰ तओ जब्दियाके लौंणाकी अइया अपन लौणक सँगमे लैके आएके बाके अग्गु घुटेली टेकके बासे बिन्ती करी।

²¹ बा बोसे पुछी, “तुम का चाँहत हओ?” बो बासे कही, “आज्ञा करओ और तुमर राज्यमे मिर जे दुई लौंणा मैसे एक जनै तुमर दहिना हात घेन, और दुस्रो तुमर दिब्रा हात घेन बैठन पामएं।”

²² तओ येशू बोसे कही, “तुम का मागत हओ सो जानत नैयाँ। जौन कटोरा मैसे मए पिन बारो हओं, का बो तुम पिपए हओ।”

²³ बा कही, “मिर कटोरा तुम पिइहओ, पर मिर दहिना और दिब्रा घेन बैठन देन बारी बात मिर हातमे नैयाँ। जा ठाउँ बिनके ताहीं हए, जौनके ताहीं मिर दौवा तयार करडारी हए।”

²⁴ जा सुनके दसौ जनै बे दुई भइयासे दिक्काइगए।

²⁵ तओ येशू बिनके अपने ठिन बुलाएके कही, “तुमके पता हए, कि अन्यजातिके सासक बिनके उपर निरङकुस शासन करैगो, और बणे-बणे बिनके उपर अधिकार जमएहएं।

²⁶ तुमर बीचमे अइसो नाए होबए, पर जौन तुमर बीचमे बडो होनके इच्छा करत हए, बो सबको सेवक बनए।

²⁷ जौन तुम मैसे पहिलो होन इच्छा करत हए, बो तुमर सेवक होन पणैगो,

²⁸ जैसी आदमीको लौंणा फिर सेवा पानके नाए, पर सेवा करन और बहुतनको पापनके मोल तिरके छुटानके ताहीं मोलके रुपमे अपन प्राण देन आओ।”

दुई अन्धरा आदमी देखन बारे भए

²⁹ येशू यरीहोसे जात पेती, एक बहुत बणी भिड येशूके पिच्छु लागी।

³⁰ डगरके किनारे बैठे दुई अन्धरा, येशू जा डगर जातहए करके सुनके अइसे करके चिल्लान लागे, “हे प्रभु, दाऊदको लौंणा, हमरे उपर दया करओ।”

³¹ भिड बिनके चुप लगानके ताहीं डाँटी, तओ बे अइसे करके और जोडके चिल्लाइं, “हे प्रभु, दाऊदको लौंणा, हमरे उपर दया करओ।”

³² तओ येशू रुकिगओ और बिनके बुलाएके कही, “तुम का चाँहत हओ? मए तुमर ताहीं का करदेओं?”

³³ बे बासे कहीं, “हे प्रभु, हमर आँखी खोलदेओ”

³⁴ येशू डहा करके बिनकी आँखी छुइदइ और तुरन्त बे देखन बारे हुइगए और बे येशूके पिच्छु लागे।