मत्ती 2 - राना थारु नयाँ नियम

बुद्धिमान आदमी येशूसे भेँट करीं

¹ जब राजा हेरोद यहूदिया परदेशमे शासन करत रहए। तओ येशूको जनम बहे परदेशको बेथलेहेम सहरमे भओ, तओ अगारके बुद्धिमान आदमी जौन तारनके बारेमे अध्यान करीं बे यरूशलेम सहरमे आएपुगे, और बे आदमीनसे पुँछीं,

² “बो बच्चा कहाँ हए, जौन यहूदी समुहनको राजा बननके जनमो हए? काहेकी हम बाके जनमके बारेमे बतान बारो तारा अगार घेन देखे हएं और बाके झुक्के आराधना करन आए हएं।”

³ यहूदीयन्को राजाको जनमके बारेमे सुनके राजा हेरोद चिन्तामे पणिगओ और उनके सँगमे यरूशलेम सहरके बहुत आदमी चिन्तामे पणे।

⁴ तओ राजा हेरोद, सब मुखिया यहूदी पुजारी और जनताके मोशाको नियम कानुन सिखान बारेनके इकट्ठा करके पुँछी, “ख्रीष्टको जनमके बारेमे अगमबक्ता का कहातहएं, ख्रीष्ट कहाँ जन्मैगो?”

⁵ बे राजा हेरोदसे कहीं, “ख्रीष्टको जनम यहूदिया परदेशके बेथलेहेम सहरमे हुइहए। काहेकी मिका अगमबक्ता लिखी रहए:

⁶ ‘ए! यहूदिया परदेशके बेथलेहेम सहरके आदमीयओ! तुम यहूदा परदेशके सासकसे बहुत बणे हओ, काहेकी तुमसे एक आदमी आबैगो जौन सासक बनैगो, बा मिर प्रजा इस्राएल देशको एक बकरेहेराके जैसो रेखदेख करैगो।’”

⁷ तओ राजा हेरोद बो जन्मो भओ बच्चा कि उमर जाननके ताहीं बे बुद्धिमान आदमीनके चुप्पएचुप बुलाएके तारा कौन समयमे दिखानो हए, सो बिनसे पता लगाइ।

⁸ राजा हेरोद बुद्धिमान आदमीनके अइसे करके बेथलेहेम गाउँमे पठाइ, “जाओ, और ठिकसे बो बच्चाको खोजी करओ। बोके पाएके मिर ठिन आओ और तुम जो देखे हओ, बो मोके बतैयओ, और मए फिर बोके झुक्के आराधना करंगो।”

^9-10 और जहेमारे बे चलपडे और डगरमे बे बहे तारा देखीं जौन बे पुर्व दिशामे देखीं रहए। जब बे ताराके देखीं, तओ बे बहुत खुसी भए! बो तारा बिनके अग्गु-अग्गु गओ और बो बच्चा भओ घरमे पुगके बो तारा हुवँए रुकिगओ।

¹¹ और जब बे घर भितर घुसे तओ, बच्चाके और बाकी अइया मरियमके सँगमे देखीं, और झुक्के आराधना करीं। तओ अपन झोला खोलके बाके सोनो, मिठो बासना आन बारो धुप और मिठो बासना आन बारो मूर्रको तेलकी भेँटी चढाइं।

¹² और राजा हेरोद ठिन मत् जैयओ करके सपनामे चेतावनी पाएके, बे राजा हेरोदके खबर नाए दइके दुसरी डगर हुइके अपन देशमे घुमे।

मिश्रदेशमे गए

¹³ जब बे गए, तओ स्वर्गदूत सपनामे योसेफ ठिन दिखानो और बोसे अइसे कही, “उठ, बच्चा और बाकी अइयाके सँग लैके मिश्रदेशमे भाज्जा, और तुमसे मए नाए कहानतक हुवँए बैठियओ। काहेकी, राजा हेरोद बच्चानके मारन ढुँणरहो हए।”

¹⁴ योसेफ उठो और बच्चा और बाकी अइयाके सँगमे लैके मिश्रदेशमे रातए गइ भओ,

¹⁵ बे, राजा हेरोदको मौत नाए होन तक मिश्रदेशमे बैठे। अगमबक्ता होशेसे बहुत पहिले परमेश्वर कही बचन अइसे पुरा भओ, “मए अपन लौंणाके मिश्रदेशसे बुलाओ।”

हेरोदसे छोटे बच्चनके मरबानो

¹⁶ राजा हेरोद दिक्कके मरे चूर हुइगओ जब बोके पता भओ कि बुद्धिमान आदमी बोके धोखा दइ हएं। तओ राजा हेरोद सौनिकनके बेथलेहेम सहर और बोके आसपासके सबए बच्चनके मारनके पठाइ, जौन दुई साला और बोसे कम उमेरके रहएं। जे सब आदमी, बेथलेहेम गाउँके और बोके आसपिसके गाउँके रहएं।

¹⁷ जे सब बात जाकेमारे भओ ताकी धर्मशास्त्रमे अगमबक्ता यर्मियासे परमेश्वर जो कही रहए, बो बचन पुरा होबए,

¹⁸ “रामा सहरमे आदमी एक बैयरके रोत सुनीं, राहेल जोड-जोडसे अपन बच्चाके ताहीं रोतएरही, बोके पुटलाएसे फिर बो रोनके नाए छोडी, काहेकी बक बच्चा मरिगए।”

मिश्रदेशसे घुमनो

¹⁹ योसेफ, मरियम और बच्चा येशू; हबएतक मिश्रदेशमे रहएं। जब राजा हेरोद मरो तओ, स्वर्गदूत सपनामे योसेफ ठिन मिश्रदेशमे दिखानो, और अइसे कही,

²⁰ “उठ, बच्चा और बाकी अइयाके सँगमे लैके इस्राएल देशको भुमिमे जा, काहेकी राजा हेरोद और बिनके आदमी मरिगए हएं जौन बच्चाके मारन चाँहत रहएं।”

²¹ योसेफ उठो, तओ बच्चा और बाकी अइयाके सँगमे लैके मिश्रदेश छोडके इस्राएल देशको भुमिमे गओ।

²² तओ जब योसेफ जा सुनी यहूदिया परदेशमे अपन दौवा राजा हेरोदके ठाउँमे अर्खिलाउस राज्य करत हए, करके सुनके, योसेफ हुवाँ जानके डराइगओ, और परमेश्वरसे सपनामे चेतावनी पाएके, योसेफ गालीलके परदेशमे गओ।

²³ और हुवँए नासरत गाउँमे जाएके बैठे। अइसीयए, जौन अगमबक्ता द्वारा येशूके बारेमे बताओ गओ रहए, “बासे नासरत गाउँसे आन बारो कहामंगे,” बो बात पुरा भओ।