मत्ती 12 - राना थारु नयाँ नियम

पबित्र दिनको प्रभु

¹ बो समय येशू पबित्र दिनमे अन्नके खेत हुँइँके जात रहए। येशूके चेला भुखाने रहएं और अन्नके बाली तोरके खानलागे।

² तओ फरिसीनको समुह जा देखके येशूसे कही, “देखओ, तुमर चेला पबित्र दिनमे, जो करन उचित नाएहए, बहे करत हएं।”

³ तओ येशू बिनसे कही, “राजा दाऊद, और उनके सँग होन बारे भुखाने रहएं तओ का करीं, का तुम नाए पढे?

⁴ कैसे बे परमेश्वरको आराधना करन बारो तम्भुमे घुसके चढाओ भओ रोटी खाइ रहएं? बक् सँग होन बारेके बो रोटी खान नाए रहए, पर केबल मुखिया यहूदी पुजारीनके इकल्लो उचित रहए।

⁵ और का मोशाको नियम कानुन नाए पढे, कैसे पबित्र दिनमे यहूदी पुजारी यरूशलेमको मन्दिरमे पबित्र दिनके अपबित्र बनात हएं, और फिर निर्दोष ठहिरत हएं?

⁶ पर मए तुमसे कहात हओं, यरूशलेमको मन्दिरसे बडो हियाँ कोइ हए।

⁷ ‘मए जानबरको बलिदान नाए’ पर ‘तुम दुस्रे जनैके दया दिखाओ’ करके मए चाँहत हओं कहान बारी पबित्र-शास्त्रमे लिखो भओ बातको मतलब तुम जन्ते कहेसे तुम मिर निर्दोष चेलन्के दोष नाए लगैते।

⁸ काहेकी मए, आदमीको लौंणा, पबित्र दिनको फिर प्रभु हओं।”

सुखो हात भओ आदमी

⁹ हुवाँसे निकरके येशू बिनको यहूदी सभाघरमे गओ।

¹⁰ हुवाँ एक सुखो हात भओ आदमी रहए। बे येशूके दोष लगान ताहीं बासे पुछीं, “का कोइके पबित्र दिनमे अच्छो करनके ठिक हए?”

¹¹ बा बिनसे कही, “मानलेओ कि तुम्रे मैसे कोइको एक भेंणा हए, अगर बो भेंणा पबित्र दिनमे गड्डामे गिरजाबैगो, तओ तुम निहात्तओ बोके बचाए लेबैगे।

¹² भलो आदमीनको मूल्य भेंणासे बहुत मूल्यवान हए, जहेमारे पबित्र दिनमे फिर आदमीनके बिमारीसे अच्छो करनके हए।”

¹³ तओ येशू बो सुखो हात भओ आदमीसे कही, “तुम अपनो हात फैलाओ।” बो हात फैलाइ, और बोको हात दुस्रो हात कता तुरन्त अच्छो हुइगओ।

¹⁴ तओ फरिसीनको समुह बाहिर जाएके येशूके कैसे नाश करएं करके बाके बिरुद्धमे सल्लाह करन लागे।

परमेश्वरके चुनेभए सेवक

¹⁵ तओ येशू जा बात पता पाएके बा हुवाँसे गइ भओ, और बहुत जनै येशूके पिच्छु लागे, और बा उनके सबनके अच्छो करी।

¹⁶ पर येशू आदमीनके कडा चेतावनी दइ, “दुस्रे आदमीनके मत् बतैयओ कि मए कौन हओं।”

¹⁷ यशैया अगमबक्ताके माध्यमसे परमेश्वरको कहो भओ बचन पुरा होनके ताहीं अइसो भओ रहए,

¹⁸ “मिर सेवक जौनके मए चुनो हओं, मिर प्रिय जौनसे मए प्रसन्न हओं, मए अप्नो आत्मा बोमे डारंगो, और बा जाति-जातिके आदमीके न्यायको परचार करैगो।

¹⁹ बो नए त लणैगो और नए त जोडसे चिल्लएहए; नए त बो आदमीनके, घमण्डसे भरो भओ भाषण जोडसे करैगो।

²⁰ बा फुटो नरकुटा जैसो कमजोर आदमीके चोट देन बारो नाए हए, और बो धिपधिप होत दियाके जैसो, कोइ फिर सहाराबिहिन आदमीके चोट नाए देहए, अन्तमे बो न्यायको बिजय होनके कारण बनैगो।

²¹ और जाति-जातिके आदमी बाको नाउँमे आसरा करंगे।”

येशू और भुतआत्मा

²² तओ येशूके ठिन भुत लागो एक आदमीके ल्याइं, बो अन्धरा और गुँगा रहए। येशू बोके अच्छो करी, हियाँतककी, गुँगो आदमी मस्कन और देखनके लागो।

²³ और जा सब भिड देखके अचम्मो मानके कही, “का जा दाऊदको लौंणा हुइहए?”

²⁴ तओ जा सुनके फरिसीनको समुह कहीं, “जा आदमी भुतनको मालिक, शैतानसे भुतनके भजात हए।”

²⁵ तओ बा बिनको बिचार पता पाएके बिनसे कही, “आपसमे फुट भओ हरेक राज्य सुनसान हुइजात हए, और हरेक सहर और परिवारके बीचमे झगडा हुइगओ तओ टिकनाए पएहए।

²⁶ अगर शैतान शैतानके निकरैगो तओ, बो अपने बिरुद्धमे बिभाजन हुइजएहए, तओ अइसो बक राज्य कैसे टिकैगो?

²⁷ तुम मोसे कहात हओ कि शैतानको शक्तिसे भुत निकारत हओं, अइसो हए कहेसे तुमर चेला कौनको शक्तिसे भुत निकारत हएं? बहेमारे तुमर अपनुवए चेला तुमके न्याय करंगे।

²⁸ अगर मए परमेश्वरको आत्मासे भुत भजातहओं तओ परमेश्वरको राज्य तुमरमे आइगओ हए।

²⁹ तगडो आदमीके नाए बाँधके बोको घर भितरको धनसम्पति कैसे लुट पएहए? बो, तबतक बोको सम्पतिके लुट नाए पएहए जब तक तगडो आदमीके बाँधैगो नाए।

³⁰ जौन मिर सँग नैयाँ, बो मिर बिरुद्धमे हए, और जौन मिर सँग बटोरत नैयाँ, बो बिग्दाबैगो।

³¹ नेहात्तओ, मए तुमसे कहात हओं आदमीनको करोभओ गलत काम और परमेश्वरको बदनाम क्षमा हुइहए, पर पबित्र आत्माके बिरुद्धमे करोभओ बदनाम क्षमा नाए हुइहए।

³² कोइ आदमीको लौंणाके बिरुद्धमे कुछ कही कहेसे बो क्षमा हुइजएहए, पर कोइ पबित्र आत्माके बिरुद्धमे बोलैगो कहेसे बो जा युगमे और आन बारो युगमे फिर क्षमा नाए हुइहए।”

रुखाके फरासे चिन्नो

³³ “अगर एक रुखा अच्छो हए, तओ बोको फरा फिर अच्छो हुइहए। अगर रुखा खराब हए, बोको फरा फिर खराब हुइहए। काहेकी रुखा फरासे चिन्हाइ देत हएं।

³⁴ तुम जहेरिले साँपके बच्चा कता हओ! तुम गलत हुइके कैसे अच्छी बात कहेसकत हओ? काहेकी जो ह्रदयमे भरोहए, बहे मुँहुँमे आत हए।

³⁵ एक असल आदमी अपन ह्रदय कि कुठियाके भितरसे असल चीज पैदा करत हए, और एक खराब आदमी एक खराब ह्रदय कि कुठियासे खराब चीज पैदा करत हए।

³⁶ मए तुमसे कहात हओं, हरेक व्यर्थकी बात जो आदमी मस्कत हए, न्यायके दिनमे बिनके बोको लेखा देन पणैगो।

³⁷ काहेकी परमेश्वर न्याय करैगो और कोइ फिर आदमी, दोषी हए कि निर्दोष हए कहान बारी बात बोको बोलो भओ बोलीसे पता चलैगो।”

येशूसे चिन्हा मागीं

³⁸ तओ मोशाको नियम कानुन सिखान बारो आदमी और फरिसीनको समुह मैसे कोइ-कोइ बोसे कहीं, “महान गुरु, हम तुमसे एक शक्तिशाली चमत्कार देखन चाँहत हएं।”

³⁹ बा बिनके जबाफ दइ, “जा पिढीके खराब और व्यभिचारी आदमी शक्तिशाली चमत्कारके चिन्हा ढुणत हएं। पर जा पिढीको योना अगमबक्ताके सँग जो भओ; बो चिन्हा बाहेक और कोइ चिन्हा नाए देहओं।

⁴⁰ योना तीन रात तीन दिन बहुत बडी मछ्रीके पेट भितर रहो, उइसी मए, आदमीको लौंणा फिर धर्तीके भितर तीन दिन और तीन रात रएहओं।

⁴¹ निनवेके आदमी न्यायके दिनमे जा पिढीके आदमीके सँग खडा हुइके उनके दोषी ठहीरामंगे, काहेकी बे योनाके परचारमे अपनो पाप छोडके परमेश्वर घेन घुमी रहएं, पर तुम पाप करन छोडके परमेश्वर घेन घुमनके इन्कार करे। पर देखओ योनासे महान कोइ हियाँ हए।

⁴² दक्खिनकी महारानी न्यायके दिनमे जा पिढीके आदमीके सँग खडा हुइके, बिनके दोषी ठहेरबैगी काहेकी तुम पाप करन छोडके परमेश्वर घेन घुमनके इन्कार करे पर बो सोलोमनको बुद्धि सुननके ताहीं पृथ्वी कि छोरसे आइ; पर देखओ, सोलोमनसे महान कोइ हियाँ हए, तहुँफिर तुम पाप करन नाए छोडन चाँहत हओ।”

भुत करी घरको तलासी

⁴³ “जब भुत आदमीसे निकरके जातहए, तओ बो बिश्राम ढुणत सुखो ठाउँ घेन घुमत नेँगत हए, पर पात नाए हए।

⁴⁴ और जब बो भुत घुमके आत हए तओ बो आदमीको जीबनके, घर कता सफा करोभओ और मिलो भओ पर खाली-खाली पात हए।

⁴⁵ तओ बो भुत जातहए और अपनसे फिर जद्धा खराब औ सात भुतनके अपन सँग बुलात हए, और आदमीक भितर घुसके बे डेरा धरत हएं, और बो आदमीको पिच्छु कि दसा पहिलेसे फिर खराब होत हए, जा समयके दुष्ट आदमीके सँग फिर अइसियए होबैगो।”

येशूके अइया और भइया

⁴⁶ येशू भिड सँग मस्कत रहए बहेबेरा बाके अइया और भइया बाहिर ठाणे रहएं, और बासे बात करन चाँहत रहएं।

⁴⁷ तओ एक जनै येशूसे कही, “देखओ, तुमरी अइया और तुमर भइया बाहिर ठाणे हएं, तुमसे बात करन चाँहत हएं।”

⁴⁸ तओ मस्कन बारेसे येशू कही, “मिर अइया कौन हए? मिर भइया कौन हए?”

⁴⁹ और बा अपन हात चेलनके दिखात कही, “देखओ मिर अइया और मिर भइया जे हएं।

⁵⁰ काहेकी जौन स्वर्गमे होन बारो मिर दौवाको इच्छा पालन करत हएं, बेहीं मिर भइया, बहिनीया, और मिर अइया हएं।”