मत्ती 11 - राना थारु नयाँ नियम

येशू और बप्तिस्मा देन बारो यूहन्ना

¹ अपन बाह्र चेलनके आज्ञा दइके, येशू हुवाँसे निकारके ढिँगैके सहरमे सिखान और अच्छो समाचार परचार करन चलो गओ।

² बप्तिस्मा देन बारो यूहन्ना, ख्रीष्टको कामको चर्चा जेलमे सुनी, और अपन चेलनके येशूके ठिन जा बात पुछन पठाइ,

³ “का आन बारो येशू तुमही हओ, जौन येशूके पठानको बाचा परमेश्वर करी रहए। कि हम दुस्रेके आसरा करएं?”

⁴ येशू बिनसे कही, “जाओ, और जो तुम देखे और सुने, जाएके बप्तिस्मा देन बारो यूहन्नासे कहीदेओ,

⁵ अन्धरा देखन बारे हुइगए हएं, और लंगणा नेगत हएं। कोढ रोग लागे अच्छे हुइगए हएं, बहिरा सुनन बारे हुइगए हएं, मरे भए आदमी जिन्दा हुइके उठे हएं, और गरीबनके अच्छो समाचार परचार करोजाए रहोहए।

⁶ और धन्यके हएं बे, जौन मिर उपर शंखा नाए करत हएं।”

येशूसे यूहन्नाको सम्मान

⁷ और बे जाएके पिच्छु, येशू बप्तिस्मा देन बारो यूहन्नाके बारेमे भिडसे कहान लागो, “तुम जंगली इलाकामे का देखन निकरे हओ? का हालन बारो कटिलाके? नाए, तुम बो देखन नाए गए रहओ।

⁸ फिर तुम का देखनके गए रहओ? का महिंगो कुर्ता लगान बारे आदमीके जौन महेलमे रहतहएं।

⁹ तुम काहे निकरके गए? का अगमबक्ताके देखन? हाँ, तुम अगमबक्ताके देखन गए, पर मए तुमसे कहात हओं, तुम यूहन्नाके देखे हओ जो एक अगमबक्तासे महान हए।

¹⁰ यूहन्ना बो आदमी हए, जौनके बारेमे पबित्र-शास्त्रमे अइसो लिखो हए, ‘देखओ, मए अपन खबर पुगान बारो आदमी तुमर अग्गुअग्गु पठामंगो, जौन तुमर अग्गु तुमरी डगर तयार करैगो।’

¹¹ नेहात्तओ, मए तुमसे कहात हओं, जा दुनियामे जन्मो आदमी मैसे बप्तिस्मा देन बारो यूहन्नासे महान और कोइ नाए हए। तहुँफिर स्वर्गको राज्यमे जो सबसे छोटो हए, बप्तिस्मा देन बारो यूहन्ना इनसे महान हए।

¹² और जबसे बप्तिस्मा देन बारो यूहन्ना परचार करन सुरु करी, बो समयसे लैके हबएतक परमेश्वरको राज्य जोडसे फैलरहो हए, और बिरोधी आदमी जाके उपर हमला करत हएं।

¹³ काहेकी बप्तिस्मा देन बारो यूहन्नाके समय तक सबए अगमबक्ता और मोशाको नियम कानुन परमेश्वरको राज्यके बारेमे बोली रहएं।

¹⁴ अगर तुम बिनको बातमे बिश्वास करत हओ कहेसे यहुन्ना बहे एलिया हए, जोके बारेमे भबिष्यबाणी करोगओ रहए।

¹⁵ तुम जो सुनरहे हओ, जो तुम सुने हओ, बोके बारेमे ध्यानसे सोँचओ।”

¹⁶ “मए जा समयके आदमीके तुलना कासे करओं? बे अइसे बालका हानी हएं, जौन बजारमे, छोटे-छोटे लौंणालौंणीया अपन सँगीनके बुलात हएं और गुनासो करत हएं,

¹⁷ ‘हम तुमर ताहीं खुसीको गीत बजाए, और तुम नाए नाचे; हम बिलौना करे, और तुम छाती पिटके नाए रोए।’

¹⁸ काहेकी बप्तिस्मा देन बारो यूहन्ना घरी-घरी उपवास बैठत रहए, और दारु नाए पित रहए। और बे कहात रहएं कि बोके एक भुत लागो हए।

¹⁹ पर मए, आदमीको लौंणा साधारण आदमी जैसो खातपिइत हओं, और बे कहात हएं, ‘देखओ, दलद्दर, दरोह, कर उठान बारो, और पापीनको सँगी!’ बुद्धि ठिक हए कहेसे बक कामसे प्रमाणित हुइहएं।”

बिश्वास नाए करन बारेके चिताउनी

²⁰ जौन-जौन सहरमे येशूके जद्धा शक्तिशाली चमत्कार भए रहएं, बहे सहरके आदमीनके बा डाँटन लागो। काहेकी बे अपन पाप छोडके परमेश्वर घेन नाए घुमीं।

²¹ “परमेश्वर तुमके दण्ड देहए बे आदमी, जो खोराजीन सहरमे रहात हँए! परमेश्वर तुमके दण्ड देहए बे आदमी, जो बेथसेदा सहरमे रहात हएं। काहेकी तुमरमे करोभओ शक्तिशाली चमत्कारको काम तुम टुरोस और सिदोन सहरमे करेभए होते, तओ बे बोराको लत्ता लगाएके अपनमे भुवा घिसलित्ते, जा दिखानके ताहीं, कि बे अपन मन बदलके पाप करन बन्द करदइ हएं।

²² पर मए तुमसे कहात हओं; न्यायके दिनमे टुरोस और सिदोन सहरके दओ भओ दण्डसे जद्धी परमेश्वर तुमके दण्ड देबैगो।

²³ और हे कफर्नहुम सहरके आदमी, का तुम स्वर्गसे फिर उँचे हुइहओ? तुम नरकमे जाबैगो। काहेकी तुम करेभए शक्तिशाली चमत्कारके काम अगर सदोम सहरमे करेहुइते तओ बे आजके दिनतक रहिते।

²⁴ पर मए तुमसे कहात हओं; न्यायके दिनमे टुरोस और सदोम सहरके दओ दण्डसे परमेश्वर तुमके जद्धी दण्ड देबैगो।”

थके भएनके बिश्राम

²⁵ बो बेरा येशू कही, “हे दौवा परमेश्वर, बादर और पृथ्वीके प्रभु, मए तुमके धन्यबाद चढात हओं, काहेकी तुम जा बात बुद्धिमान और समझदार आदमीसे छिपाएके रक्खे, और जौन आदमी छोटे बच्चा कता हए बिनके प्रकट करेहओ।

²⁶ हाँ दौवा, काहेकी तुमके जहे ठिक लागो।”

²⁷ मिर दौवा मोके सब कुछको जिम्मा दइ हए। केबल बहे इकल्लो हए जो लौंणाके चिन्हत हए, और बे आदमी चिन्हत हएं, जो लौंणा दौवाके देखन चाँहत हए।

²⁸ “हे सब थके भए और बोझसे दबेभए, मिर ठिन आओ, मए तुमके बिश्राम देमंगो।

²⁹ मिर जुवा अपने उपर लेओ, और मिर पिच्छु आओ और मोसे सिखओ; काहेकी मए बिनम्र और कोमल ह्रदयको हओं: और तुम अपन प्राणमे बिश्राम पाबैगे।

³⁰ काहेकी मिर जुवा सजिलो हए, और मिर बोझ हुल्को हए।”