लूका 24 - राना थारु नयाँ नियम

मरो मैसे येशू जिन्दा भओ

¹ हप्ताको पहिलो दिन सुबेरियए, बे बैयर तयार करके सुगन्धित द्रव्य लैके बे गड्डामे आइं।

² बे पत्थरके गड्डा मैसे हटो पाइं।

³ पर जब भितर गइं तओ बे प्रभु येशूको शरीर नाएपाइं।

⁴ जब बे जाके बारेमे अलमलमे पणिगै रहएं, तओ चमकन बारो कुर्ता पैँधे दुई लोग बिनके ढिँगै ठाणीगए।

⁵ तओ बे बैयर डराइ गइं और भिमे घेन मुण झुकाएलैं। पर बे दुई लोग आदमी कहीं, “तुम जिन्दा मनैके मरेन्के बीचमे काहे ढुणत हओ?

⁶ बा हियाँ नाए हए, पर जिन्दा हुइके उठीगओ हए। गालील परदेशमे होत पेती बा तुमसे का कही रहए बो याद करओ,

⁷ ‘कि बा आदमीको लौंणा पापी आदमीके हातसे पकणाओजानो और क्रूसमे टाँगोजानो, और तिसरो दिनमे जिन्दा हुइके उठजान जरुरी हए।’”

⁸ बे बाको बात बिनके याद आइगओ।

⁹ और चिहानसे घुमके, बे जा सब बात एघार चेलनके और सबएनके बताए दइं।

¹⁰ बैयर मैसे, मरियम मग्दलिनी, योअन्ना, और याकूबकी अइया मरियम रहएं। बिनके सँग होन बारे औ बैयर फिर जा बात चुनेभए चेलनके बताइं।

¹¹ पर चेला, जा बात बिना मतलबको हए कहिके सोचीं, और बे बिश्वास नाए करीं।

¹² तओ पत्रुस उठके चिहानमे दौडके गओ, और लोहोकके देखत पेती सुती लत्ताको कप्फन इकल्लो देखी। बो घटना देखके अचम्मो मानके बो गइ भओ।

इम्‍माउसके डगरमे येशू

¹³ बहे दिन येशूके दुई चेला इम्माउस नाउँको एक गाउँमे जानडटे रहएं, जो यरूशलेम सहरसे लगभग: एघार किलोमिटर दुर रहए।

¹⁴ बे घटेभए सब घटनाके बारेमे आपसमे बातचित करत रहएं।

¹⁵ पर जब बे आपसमे बातचित और बहस करत रहएं बहेबेरा येशू ढिँगै आएके चेलनके सँग नेँगन लागो।

¹⁶ पर परमेश्वर चेलनके, येशूके चिनन नाए सिकन बारो बनाइ।

¹⁷ येशू चेलनसे पुँछी, “जा का बात हए, जो तुम नेँगत-नेँगत आपसमे बातचित कररहे हओ?” बे रुकिगए और बिनको चहेरा बहुत निरास दिखात रहए।

¹⁸ जा सुनके, बे दुई चेला मैसे क्लेओपास नाउँको एक आदमी कही, “शायद तुम यरूशलेम सहरमे आन बारे एकए अइसो इकल्लो परदेशी हुइहओ जो तुमके जा बात पता नाए हए, कि जब तुम हियाँसे गए, तओ थोरी दिनमे हियाँ का-का हुइगओ।”

¹⁹ येशू बिनसे पुँछी, “कौनछो बात?” बे येशूके जबाफ दइं, “नासरत गाउँको येशूके बारेमे, जो परमेश्वर और सब आदमीके अग्गु शक्तिशाली चमत्कार करी और शक्तिशाली सन्देश दइ बा एक परमेश्वरको अगमबक्ता रहए।

²⁰ पर मुखिया यहूदी पुजारी और हमर सासक बाके मृत्युदण्डके ताहीं सौँपी, और बाके क्रूसमे टाँगी।

²¹ पर हम आसरा करे रहएं, कि इस्राएल देशके बा रोमी सरकारके आदमीनसे उद्धार देबैगो। जे सब बात बाहेक जा घटना भओको आज तिसरो दिन हए।

²² और अब हमर समुह मैसे कोइ दिदी-बहिनीयनके कही बातमे हम अचम्मो पणिगए, जो आज चिहानमे गइ रहएं।

²³ जब बे येशूको शरीरके नाएपाइं, तओ बे कहात आइं, कि ‘हम स्वर्गदूतन्के देखे, जौन येशू जिन्दा हए कहिके हमके बताइ।’

²⁴ तओ हमर समुह मैसे कोइ एक जनै चिहानमे गओ। और जैसे-जैसे बे दिदी-बहिनीया बताइ रहएं, बो उइसीयए भओ पाइ। पर येशूके देखन नाए पाइ।”

²⁵ तओ येशू दुनौ चेलासे कही, “हे मुरख आदमी! जो कुछ परमेश्वरके अगमबक्ता पबित्र-शास्त्रमे लिखिहएं, तुमके बोमे बिश्वास करन बहुत अग्ठो लागतहए।

²⁶ जा जरुरी रहए, कि ख्रीष्ट जे सब दु:ख उठाबैगो और फिर अपनो महिमामे प्रबेश करैगो।”

²⁷ येशू बिनके पुरा पबित्र-शास्त्रमे भओ मोशाको नियम कानुनसे सुरु करके सब अगमबक्तनको किताबतक अपन बारेमे लिखो सब बात सम्झाइ।

²⁸ बे जौन गाउँमे जात रहएं, बे बो गाउँके ढिँगै पुगे, तओ बा औ दुर जामंगो कहिके बहाना लगाइ।

²⁹ पर बे बाके अइसे कहिके रोकीं, “हमर सँग बैठओ, काहेकी संझा होन लागो हए, और दिन फिर डुबिगओ हए।” तओ येशू बिनके सँग बैठनके ताहीं घर भितर घुसो।

³⁰ जब येशू बिनके सँग खान बैठो, तओ बा रोटी लैके आशीर्वाद दइ, और तोणके बिनके देन लागो।

³¹ तओ बिनकी आँखी खुली, और बे बाके चिन्ही। और बा बिनके नजरसे अलोप हुइगओ।

³² बे आपसमे कहीं, “जब येशू डगरमे हमके सम्झात रहए, और पबित्र-शास्त्रको अर्थ हमके सम्झात रहए, तओ हमर मन उत्सहा और आसरासे भरो रहए।”

³³ बे तुरन्त उठके यरूशलेम सहरमे लौटके गए, तओ बे एघार चेला और बिनको सँगीके एकए ठिन इकट्ठा भए पाइं,

³⁴ और बिनसे अइसे कहीं, “प्रभु नेहात्तओ जिन्दा हुइके उठो हए और सिमोन पत्रुसके दिखाइ दइ हए।”

³⁵ तओ बे डगरमे भओ सब बात बताए दइं, और जा फिर बताए दइं, कि बे रोटी खात पेती येशूके कैसे चिनीं।

येशू चार हजारके बीचमे दिखानो

³⁶ बे जा बात बत्कातए रहएं तओ येशू अपनए बिनके बीच देखा पणो; और बिनसे कही, “तुमके शान्ति मिलए।”

³⁷ पर बे घबणीयाएके डरइगए, और बे सोचीं, कि हम कोइ मरो मनैको आत्मा देखरहे हएं।

³⁸ पर येशू कही, “तुम काहे डरतहओ? और तुम मनमे काहे शंखा करत हओ?

³⁹ मिर हात और मिर पाँओँके देखओ, मही हओं, मोके छुइके देखओ। काहेकी मरो मनैको आत्मकी बुट्टी और हड्डी नाए होत हएं, पर तुम देखरहे हओ मिर हएं।”

⁴⁰ जा कहिके येशू बिनके अपन हात और पाओँ देखाइ।

⁴¹ तओ बे बहुत खुसी भए और अचम्मो हुइके बामे बिश्वास नाए होनडटे रहएं, कि नेहात्तओ येशू जिन्दा हए। तओ येशू बिनसे पुँछी, “का हियाँ तुमर ठिन कुछ खान बारो चीज हए?”

⁴² बे येशूके पकाओ भओ मछ्रीको एक खुद्रा दइं।

⁴³ येशू बो लैके खाइ, और बे बाके देखन डटे रहएं।

⁴⁴ और येशू बिनसे कही, “जब मए तुमर सँग रहओं, तओ मिर कहो बचन जहे रहए, कि जितनो बात मोशाको नियम कानुन, अगमबक्ता और भजनके किताबमे, मिर बारेमे लिखेहएं, बे सब बात पुरा होन जरुरी हए।”

⁴⁵ तओपिच्छु बा बिनके पबित्र-शास्त्र बुझानके मदत करी।

⁴⁶ और येशू बिनसे कही, “पबित्र-शास्त्रमे जा लिखो हए, कि ख्रीष्ट दु:ख उठाबैगो, और तिसरो दिनमे मर्के जिन्दा होबैगो,

⁴⁷ और यरूशलेम सहरसे लैके सब जाति-जातिके आदमीनके पाप करन छोडके परमेश्वर घेन घुमानके ताहीं और पापनको क्षमाको परचार येशूको नाउँमे होबैगो।

⁴⁸ तुम जे सब बातके साक्षी हओ।

⁴⁹ और मए अपनए तुमर उपर पबित्र आत्मा पठामंगो, जौनको प्रतिज्ञा मिर दौवा करी हए। पर तुमके तबतक जहे सहरमे आसरा करनके होबैगो जब तक तुम स्वर्गसे शक्ति नापए हओ।”

येशू स्वर्गमे गओ

⁵⁰ तओ येशू चेलनके सहरसे बाहिर बेथानिया गाउँके ढिँगै लैगओ, और अपन हात उठाएके बिनके आशिष दइ;

⁵¹ और बिनके आशिष दइके उनसे अलग हुइगओ और स्वर्गमे उठाओ लैगओ।

⁵² और बे बाको आराधना करीं, और बडो आनन्द सँग यरूशलेम सहरमे लौटिगए।

⁵³ और बे लगातार यरूशलेमको मन्दिरमे बैठके परमेश्वरके प्रसंसा चढात रहएं।