लूका 20 - राना थारु नयाँ नियम

येशूके अधिकारके बारेमे प्रश्‍न

¹ एक दिन यरूशलेमको मन्दिरमे येशू आदमीके शिक्षा देत रहए, और बिनके अच्छो समाचार परचार करत रहए। यहूदी अगुवनको समुहके सँग मुखिया यहूदी पुजारी और मोशाको नियम कानुन सिखान बारे येशूके ठिन आए,

² और येशूसे पुछीं, “हमसे कहाओ, कौन अधिकारसे तुम जा काम करत हओ, और तुमके अधिकार देन बारो कौन हए?”

³ येशू बिनके जबाफ दइ, “मए फिर तुमसे एक बात पुँछत हओं, मोके उत्तर देओ,

⁴ बप्तिस्मा देन बारो यूहन्नासे दओ भओ बप्तिस्मा स्वर्गसे रहए, कि आदमीसे?”

⁵ बे आपसमे बहस करन लागे, “स्वर्गसे, कएहएं कहेसे, ‘तुम यहुन्नामे काहे बिश्वास नाए करत हओ?’ करके कएहए।

⁶ ‘आदमीसे कएहएं’ तओ, सब आदमी हमके पत्थर मरेहएं, काहेकी बप्तिस्मा देन बारो यूहन्ना अगमबक्ता हए कहिके बिनको पक्का बिश्वास रहए।”

⁷ जहेमारे बे जबाफ दइं, “हम नाए जानत हएं, कहाँसे आओ हए।”

⁸ तओ येशू बिनसे कही, “अइसो हए तओ महुँ कौन अधिकारसे जा काम करत हओं, मए फिर तुमके नाए बतएहओं।”

दुष्ट किसानकी कहानी

⁹ येशू आदमीनसे जा कहानी कही, “एक आदमी अंगुरको बारी लगाइ, और अधिया दइके, बहुत दिनके ताहीं परदेश चलोगओ।

¹⁰ जा फरा तोरन समय आइगओ, तओ अंगुरकी बारीसे कुछ फरा लेनके ताहीं बो अपनो एक नोकरके अधिया बारो ठिन पठाइ। तओ अधिया बारो बोके पिटके खाली हात पठाए दइं।

¹¹ बो फिरके दुस्रो नोकरके पठाइ, तओ बे बोके फिर पिटीं और बेजत करके खाली हात पठाए दइं।

¹² बो तिसरोके फिर पठाइ बे बोके फिर मारके पठाए दइं।

¹³ और अंगुरको बारीको मालिक कही, ‘अब मए का करओं? मए अपन प्यारो लौंणाके पठएहओं। शायद बोके त बे आदर करंगे।’

¹⁴ जब बोको लौंणा गओ, तओ अधिया बारे बोके देखके आपसमे बात करनलागे, ‘जा त अंगुरको बारीको हकदार हए, हम जाके मारएं, और सम्पतिमे हमरो हक हुइजए हए।’

¹⁵ तओ बे बोके अंगुरको बारीसे बाहिर लैजाएके मारीं। अब अंगुरको बारीको मालिक बिनके का करैगो?

¹⁶ बो आएके बे अधिया बारेनके मारैगो और अंगुरको बारी औरेनके दइदेहए।” आदमी जा सुनके कहीं, “परमेश्वर अइसे कभु नाए होबए।”

¹⁷ तओ येशू बिनके देखके कही, “जा लिखो भओ का हए तओ? ‘जौन पत्थरके घर बनान बारे रद्द करिहएं, बहे पत्थर, कोनोको शिर-पत्थर बनो।’

¹⁸ बो पत्थर उपर गिरन बारे हरेक चकनाचुर हुइजए हएं। पर जौन उपर बो पत्थर गिरैगो, बोके बो किच्लाए देहए।”

मोशाको नियम कानुन सिखान बारे और मुखिया यहूदी पुजारीनको चाल

¹⁹ तओ मोशाको नियम कानुन सिखान बारे और मुखिया यहूदी पुजारी बहेबेरा येशूके पकणनके ढुँणन लागे। बिनके पता रहए, कि जा कहानी बिनके बिरुद्धमे रहए पर बे आदमीनसे डरात रहएं।

महाराजाके तिरन बारो कर

²⁰ बे मौका ढुँणन लागे, और धर्मी हुइके चुपरन बारे जासुसके बे बाके ठिन पठाइं। येशू कही बातमे बाके फसाएके अधिकारीनके और हाकिमके हातमे बाके पकणाएदेनको मौका ढुणत रहएं।

²¹ बे बासे पुछीं “महान गुरु, हम जानत हएं, तुम ठिक-ठिक बोलत हओ और ठिक-ठिक सिखात हओ, और कोइको पक्षपात नाए करत हओ, पर सच्चाईसे परमेश्वरको डगर सिखात हओ।

²² हमके रोमको महाराजा कैसरके कर तिरन ठिक हए, कि नाए हए?”

²³ पर येशू बिनको कपट बुझके कही,

²⁴ “मोके एक सिक्का दिखाबओ जामे कौनको फोटुहए और कौनको नाँउ लिखो हए?” बे कहीं, “रोमको महाराजा कैसरको।”

²⁵ येशू बिनसे कही, “जहेमारे जो रोमको महाराजा कैसरको हए रोमको महाराजा कैसरके देबओ, और जो परमेश्वरको हए बो परमेश्वरके देबओ।”

²⁶ आदमीके अग्गु बे येशूके बातमे फसाए नाएपाइं, और येशूके जबाफमे बे अचम्मो मानके चुप रहिगए।

पुनरुत्थान और बेहा

²⁷ तओ पिच्छु येशूके ठिन कोइ सदुकीनको समुह आए। कोइ फिर मरके जिन्दा नाए होत हएं करके बिनको सोँच रहए। बे येशूसे पुछीं,

²⁸ “महान गुरु, मोशा हमर ताहीं लिखदइ रहए, कि कोइ फिर आदमीको बेहा करोभओ ददा, बिनए सन्तानको मरिगओ कहेसे, भइया बक बैयरसे बेहा करके ददाको सन्तान खडा करन पणत हए।

²⁹ एक परिवारमे सात भइया रहएं। बडो बेहा करी और बिना सन्तानको मरिगओ,

³⁰ और मझला भइया अपन मरो भओ ददाको बैयरसे बेहा करलै। पर बो फिर बिना सन्तानको मरिगओ।

³¹ तओ फिर सझला बोसे बेहा करी और उइसी करके बे सातौ जनै बिना सन्तान जन्माएके मरिगए।

³² पिच्छु बो बैयर फिर मरिगै।

³³ तभीमारे जब मरे भए आदमी मरके जिन्दा होमंगे तओ बो बैयर बिन मैसे कौनकी बैयर हुइहए? काहेकी बो सातौ जनैकी बैयर हुइडारी रहए।”

³⁴ येशू बिनसे कही, “जा जमानाके आदमी बेहा करत हएं, और बेहा करदेत हएं।

³⁵ पर बो जमाना तक पुगान लायक ठहिरन बारे, और मरके जिन्दा हुइके उठान लायक होन बारे नए बेहा करत हएं, नए बेहा करदेत हएं।

³⁶ बे फिरसे मरत नाए हएं, काहेकी बे स्वर्गदूत समान होत हएं, और मरे मैसे जिन्दा होन बारोको सन्तान होनके कारणसे बे परमेश्वरको सन्तान हएं

³⁷ पर मरे आदमी फिरसे जिन्दा हुइके उठंगे कहान बारी बात मोशा फिर भिथ्राके बारेमे परमप्रभुके अब्राहामको परमेश्वर, इसहाकको परमेश्वर और याकूबको परमेश्वर करके पुकारत पेती दिखाइ दइ।

³⁸ परमेश्वर मरेभएन्को परमेश्वर नाए हए, पर जीन्दन्को परमेश्वर हए, काहेकी सब बाके ताहीं जिन्दा हएं।”

³⁹ तओ जा सुनके मोशाको नियम कानुन सिखान बारे मैसे कोइ-कोइ कहीं, “हे महान गुरु, तुम ठिकए कहेहओ।”

⁴⁰ जाके पिच्छु फिर कोइ बासे प्रश्‍न पुछन हिम्मत नाए करी।

ख्रीष्ट कौनको लौंणा?

⁴¹ तओ येशू बिनसे कही, “ख्रीष्ट दाऊदको लौंणा हए करके आदमी काहे कहात हएं?

⁴² काहेकी भजनके किताबमे राजा दाऊद अपनए कही हए: परमप्रभु मिर प्रभुसे कही,

⁴³ ‘तुम मिर दहिना हात घेन बैठओ, जब तक तुमर शत्रुनके तुमर टाँगके पाउँमे नाए लाओं।’

⁴⁴ जब राजा दाऊद फिर ख्रीष्टके प्रभु कहिके कहात हए कहेसे, ख्रीष्ट राजा दाऊदको सन्तान कैसे हुइहए?”

मोशाको नियम कानुन सिखान बारेके बिरुद्धमे येशूकी चेतावनी

⁴⁵ जब सब आदमी सुनत रहएं, तओ येशू अपन चेलनसे कही,

⁴⁶ “लम्बो कुर्ता पैधके इतएउतए नेँगत, और बजारमे अभिबादन ढुणत, और यहूदी सभाघरमे प्रमुख आसन और भोजमे आदरको ठाउँ मन पणान बारे, मोशाको नियम कानुन सिखान बारेसे होसियार रहाओ।

⁴⁷ बे बिधुवानको घर हणप करदेत हएं, और देखावटीके ताहीं परमेश्वरसे लम्बो प्राथना करत हएं। नेहात्तओ परमेश्वर उनके बहुत भारी दण्ड देबैगो।”