लूका 16 - राना थारु नयाँ नियम

चलाँक ब्यवस्थापक

¹ फिर येशू चेलनसे जा कहानी बताएके कही, “कोइ धनी आदमीको एक ब्यवस्थापक रहए, और बो अपन मालिकके अग्गु ब्यवस्थापकके जा दोष लगाएके कही, कि जा तुमर सब सम्पति उणाए रहोहए।

² तओ मालिक ब्यवस्थापकके बुलाएके कही, ‘जा का हए जो मए तेरे बारेमे सुन रहो हओं? तए मिर रुपैयासे का करोहए बोको लेखा दे; काहेकी तए अबसे ब्यवस्थापक नाए रहाबैगो।’

³ तओ ब्यवस्थापक सोँचन लागो, ‘अब मए का करओं? काहेकी मिर मालिक अब ब्यवस्थापकको काम अब मोसे छिन रहोहए: खेत जोतन-खोदनको काम करनकी तागत मोएमे नाएहए; और भिख मागन मोके शर्म लागतहए।

⁴ अब मए सोँचलओ हओं कि कैसे करनके हए: ताकी जब मए ब्यवस्थापकको कामसे निकारो जएहओं तओ आदमी मोके मदत करंगे।’

⁵ और ब्यवस्थापक अपन मालिकके कर्जीदारनके एक-एकके बुलाएके पहिले बारेसे पुँछी, कि तिर उपर मिर मालिकको कर्जा कित्तोहए?

⁶ बो कही, ‘तीन हजार सात सओ लिटर जैतूनको तेल,’ तओ ब्यवस्थापक बोसे कही, अपनो तमसुख लियओ और तुरन्त बैठके एक हजार आठ सओ पचास लिटर तेल लिख।

⁷ फिर दुस्रेसे पुँछी, ‘तिर कर्जा कित्तोहए?’ बो कही, ‘दुई सओ कुन्टल गेहुँ,’ तओ ब्यवस्थापक बोसे कही, ‘अपन तमसुख लैके असी कुन्टल लिख।’

⁸ मालिक बो अधर्मी ब्यवस्थापकको तारिफ करी, कि बो चलाकीसे काम करीहए; काहेकी अइसियए दुनियाके आदमी, अपने पिढीके आदमी सँग ब्यबहार करत ज्योतिके आदमीसे औ जद्धा चलाँक हएं।

⁹ और मए तुमसे कहात हओं, कि दुनियाको धनसे अपन ताहीं सँगी बनाए लेओ; ताकी जब तुम मरैगे तओ दुनियाको धन काम नाए लगन बारो हुइहए, तओ परमेश्वर और स्वर्गदूत तुमके अनन्त बासस्थानमे स्वागत करंगे।

¹⁰ जौन थोरी चीजमे इमान्दार हुइहए, बो बडो चीजमे इमान्दार हुइहए: और जो छोटी-छोटी चीजमे बेमान हए, बो बडो चीजमे बेमान हुइहए।

¹¹ जहेमारे जब तुम दुनियाकी धनमे इमान्दार नाए हुइहओ कहेसे, तओ तुमके स्वर्गीय धन कौन देहए?

¹² और अगर तुम पराएके धनमे इमान्दार नाए हुइहओ कहेसे, तुमके कौन अपनो कुछु फिर चीजको जुम्मा देहए?

¹³ कोइ नोकर एकए समयमे दुई मालिकको सेवा नाए कर्पएहए, काहेकी बो एकके हेला करैगो और दुस्रेके अपनए कता प्रेम करैगो; या एकसे मिलो रएहए और दुस्रेके खराब बतएहए। उइसीयए, तुम फिर एकए समयमे परमेश्वरको और धन दुनौको सेवा नाए कर्पएहओ।”

परमेश्वरको राज्यको मूल्य

¹⁴ फरिसीनको समुह जो धनके लोभी रहएं, जे सब बात सुनके येशूके मजाक उणाइं।

¹⁵ येशू बिनसे कही, “तुम अपनएके आदमीनके अग्गु सही दिखातहओ, पर परमेश्वर तुमर मनके जानत हए, काहेकी जो चीज आदमीनको नजरमे खास मानो जाबैगो, बो चीज परमेश्वरको नजरमे तुच्छ मानो जाबैगो।

¹⁶ जब तक बप्तिस्मा देन बारो यूहन्ना आओ, तबतक मोशाको नियम कानुन और अगमबक्ता तुमके डगर देखन बारे रहएं। पर अब परमेश्वरको राज्यको अच्छो समाचार परचार भओ हए, और हरकोइ भितर जानके ताहीं उत्सुक हएं।

¹⁷ बादर और पृथ्वी अलोप हुइजएहए, पर परमेश्वरको नियम कानुनकी एकौ बात फिर कभी खारेज नाए हुइहए।

¹⁸ उदाहरणके ताहीं, जौन अपनी बैयर छोडके औरीसे बेहा करत हए, बो व्यभिचार करत हए। और लोगासे छुटीभइ बैयरके बेहा करन बारो फिर व्यभिचार करत हए।”

धनी आदमी और गरीब लाजरस

¹⁹ येशू फिर एक कहानी कहान लागो, “एक धनी आदमी रहए जो बहुत महिंगो लत्ता पैँधत रहए और सदिमान सबसे अच्छो-अच्छो खानु खात रहए।

²⁰ और लाजरस नाउँको एक गरीब आदमी शरीरभर दुखौनोसे भरो भओके, बो धनी आदमीके फाटक जौँणे लाएके बैठाए देत रहएं।

²¹ और बो चाँहत रहए, कि धनी आदमीके खाएके फेँको भओ डुठो-कुठोसे अपन पेट भर पाबए। और कुत्ता फिर आएके बोको दुखौनो चाटदेत रहएं।

²² और एक दिन अइसो भओ, कि बो लाजरस मरिगओ, और स्वर्गदूत बोके लैके अब्राहामके ठिन सम्मानके ठिहामे पुग्गओ। और कुछ दिन पिच्छु बो धनी आदमी फिर मरिगओ; और गडो गओ।

²³ और नरकमे बो धनी आदमी बहुत कष्टमे पणो अवस्थामे रहए, और उपर देखके दुरसे अब्राहाम और बोके जौँणे लाजरसके बैठो देखी।

²⁴ और बो धनी आदमी जोडसे चिल्लाएके कही, ‘हे दौवा अब्राहाम, मिर उपर दया करके लाजरसके पठाएदेओ, ताकी बो अपन उगंरिको पोरा, पानीमे डुबाएके मिर जिभके जुणो बनाए देबए, काहेकी मए जा नरकको ज्वालामे गजब कष्ट पाएरहो हओं।’

²⁵ पर अब्राहाम कही, ‘ए लौंणा याद कर, तए अपन जीबन कालमे सबसे अच्छी-अच्छी चीज पाएडारो हए, और लाजरस खराब चीज पाइ रहए। पर अब बो हियाँ अराम पाएरहो हए, और तए कष्ट पाएरहो हए।

²⁶ और जे सब बातके छोड, हमर और तिर बीच एक बडो गड्डा हए, ताकी हम हियाँसे बोपार तिर ठिन जाए नाए पामएं और नाए कोइ हुवाँसे जापार हमर ठिन आए पाबए।’

²⁷ धनी आदमी कही, ‘हे दौवा अब्राहाम, मए तुमसे बिन्ती करत हओं, कि तुम लाजरसके मिर दौवाके घरमे पठाए देओ,

²⁸ काहेकी मिर पाँच भइया हएं, लाजरसके जान देओ और बो बिनके चेतावनी दइदेबए, कहुँ अइसो नाए होए, कि बिनके फिर जा कष्टके ठिहामे आनके पणए।’

²⁹ अब्राहाम धनी आदमीसे कही, ‘बिनके जौँणे चेतावनी देनके ताहीं मोशाको नियम कानुन और अगमबक्तनको किताब हएं। बिनके बो सुनन पणो और पालन करन पणो।’

³⁰ पर धनी आदमी कही, ‘नाए, हे दौवा अब्राहाम, पर अगर मरके जिन्दा हुइके कोइ एक जनै बिनके चेतावनी देहए कहेसे बे पाप करन छोडके परमेश्वर घेन घुमंगे।’

³¹ तओ अब्राहाम बोसे कही, ‘अगर मोशाको नियम कानुन और अगमबक्तनको आज्ञा नाए मनेहए तओ, अगर मरे भए मैसे कोइ फिर जिन्दा हुइके जाएसे फिर, बे बिश्वास नाए करंगे।’”