लूका 15 - राना थारु नयाँ नियम

हरानो भओ भेंणाको कहानी

¹ बहुत जनै कर उठान बारे और पापी आदमी येशूके ठिन बचन सुननके ताहीं आए करत रहएं।

² जा आदमी त पापीके ग्रहण करत हए, और बिनके सँग खानपिन करत हए कहिके फरिसीनको समुह और मोशाको नियम कानुन सिखान बारे गनगन करन लागे।

³ तओ येशू बिनके जा कहानी कही:

⁴ “अगर तुम मैसे कोइके ठिन सओ भेंणा हएं। अगर बे मैसे एक हराएजाए, तओ तुम नेहात्तओ बे उनानसय भेंणाके जंगली इलाकामे छोड देबैगो, और जब तक बो हरानो भओ भेंणाके नाए पएहओ तबतक बो एक हरानो भेंणाके ढुणैगो।

⁵ और जब मिल जात हए, तओ बो खुसीसे भेंणाके अपनो कँधा उपर उठाएलेत हए।

⁶ और अपन घर आएके सँगीनके और परोसीनके इकट्ठा करके कहात हए, ‘मिर सँग आनन्द करओ, काहेकी मिर हरानो भओ भेंणा मिलीगओ हए।’

⁷ मए तुमसे कहात हओं; जहे रितिसे पाप करन छोडके परमेश्वर घेन घुमन बारे, उनानसय धर्मीसे फिर अपनो पाप मानके पछुतो करन बारो एक पापीके ताहीं स्वर्गमे बहुत आनन्द होबैगो।”

हरानो भओ सिक्काको कहानी

⁸ फिर येशू एक औ कहानी कहिके बताइ, “अगर कोइ बैयारके ठिन दश चाँदीके सिक्का हएं और बो मैसे एक सिक्का हराएजाए, तओ बो दिया पजारैगी, और घरमे बढारैगी और तबतक ध्यानसे ढुणैगी जब तक बोके पबैगीनाए।

⁹ और जब बो हरानो सिक्का मिल जात हए, तओ बो अपन सँगी परोसीनके इकट्ठा करके कहात हए, ‘मिर सँग आनन्द करओ, काहेकी मिर हरानो भओ चाँदीको सिक्का मिलिगओ हए।’

¹⁰ मए तुमसे कहात हओं, जहे रितिसे एक पाप करन छोडके परमेश्वर घेन घुमन बारे पापीके ताहीं परमेश्वरको स्वर्गदूत अग्गु आनन्द होबैगो।”

हरानो भओ लौंणाको कहानी

¹¹ फिर येशू एक औ कहानी कही, “एक आदमीको दुई लौंणा रहएं।

¹² बो मैसे छोटो लौंणा अपन दौवासे कही, ‘ए दौवा, धनसम्पति मैसे जो हिस्सा मिर हए, बो मोके हबए दइदे।’ तओ दौवा दोनए लौंणनके अपनी सम्पति अंशबन्डा करदइ।

¹³ और कुछ दिन पिच्छु छोटो लौंणा सब कुछ इकट्ठा करके एक दुर देशमे चलो गओ, और हुवाँ बो मोज-मजामे अपन सब सम्पति उणाए डारी।

¹⁴ जब बो सब सम्पति खर्च करडारी, तओ बो देशमे बडो अनिकाल पणो, और बोके ठिन खानके ताहीं कुछ नाए रहीगओ।

¹⁵ और बो एक आदमीके ठिन काम करनके ताहीं गओ, जौन बो देशको नागरिक रहए, बो बोके अपन खेतमे सोरा चुगानके ताहीं पठाइ।

¹⁶ और बो इतनो भुँखो रहए, कि बो सोराको खान बारो चरहासे खानके ताहीं फिर खुसी रहए। काहेकी बोके कोइ कुछु नाए देत रहए।

¹⁷ जब बोके अपन अवस्थाके बारेमे पता चलो, तओ बो सोँचन लागो, ‘मिर दौवाके कमैयान्के ताहीं पेट भरके खाएके फिर, उबरके औरेनके देनके फिर हुइजात हए, पर मए हियाँ भुखो मरन डटो हओं।

¹⁸ मए अब उठके अपन दौवाके ठिन जएहओं और कएहओं, कि दौवा, मए परमेश्वरके बिरुद्धमे और तिर नजरमे पाप करो हओं।

¹⁹ अब मए तिर लौंणा काहनको लायक नाए हओं। मोके तए काम करन बारे कमैया मैसे एक बिनही कता बनाएले।’”

हरानो भओ लौंणाको लौटो

²⁰ “तओ बो देशके छोडके, बो अपन दौवाके ठिन जानके ताहीं चलपणो। बो हबए दुरए रहए, बोको दौवा बोके देखके दयासे भरीगओ, और लौंणा घेन दौडके बोके गलबैयाँ डारी, और बहुत चुम्मन करी।

²¹ लौंणा बोसे कही, ‘दौवा, मए परमेश्वरके बिरुद्धमे और तिर नजरमे पाप करो हओं; और अब मए फिरसे तिर लौंणा कहान लायकको नाएरहो हओं।’

²² पर दौवा अपन कमैयासे कही, ‘जल्दी अच्छेसे-अच्छे लत्ता निकारके बोके पैँधाएदेओ, और बोको उँगरीमे, औँठी, टाँगमे जुता लागए देओ,

²³ और बडो भोज खबानके ताहीं अच्छो जानबर तयार करओ, ताकी हम खामएं और आनन्द मनामएं।

²⁴ काहेकी जा मिर लौंणा मरो कता रहए, पर फिर जिन्दा भओ हए, हरानो रहए अब मिलिगओ हए।’ तओ बे आनन्द मनानलागे।”

बडो लौंणाको गुनासो

²⁵ “जब जा सब होत रहए, तओ बोको बडो लौंणा खेतमे काम करत रहए। और जब बो खेतसे, घरके ढिँगै पहुँचो, तओ बो नाचगानको अबाज सुनी।

²⁶ और बो एक कमैयाके बुलाएके पुँछी, ‘जा का हुइ रहो हए?’

²⁷ कमैया बोसे कही, ‘तुमर भइया घरमे लौटके आओ हए, और तुमर दौवा जानबर काटके बडो भोज तयार करबाइ हए। काहेकी बो सुरक्षित और स्वस्थ घर लौटो हए।’

²⁸ जा सुनके बो गुस्सासे भरीगओ और घरमे भितर जानके नाए मानी: जहेमारे बोको दौवा बाहिर आओ और घर भितर आनके ताहीं बडो लौंणासे बिन्ती करन लागो।

²⁹ बो अपन दौवाके जबाफ दइ, ‘देख; मए इतनो साल तिर सेवा कररहो हओं, और कभी फिर तिर आज्ञा उल्‍लङ्घन नाए करो, तहुँफिर तए मोके एक जानबरको बच्चा फिर नाए दओ, कि मए अपन सँगीके सँग आनन्द मनाए पामओं।

³⁰ जब तिर जा लौंणा, जौन तेरो धनसम्पति वेश्याके सँग उणाएके आओ हए, और तए बोके ताहीं जानबर काटके बडो भोज खानके तयार करबाओ हए।’

³¹ दौवा अपन लौंणासे कही, ‘मेरो लौंणा, तए त मिर सँग सदिमान हए; और जो कुछ मिर हए बो सब तेरी हए।

³² पर अब आनन्द करन और खुसी होनचाहो काहेकी जो तेरो भइया मरो जैसो रहए, बो जिन्दा भओ हए, हरानो रहए पर अब मिलिगओ हए।’”