लूका 14 - राना थारु नयाँ नियम

पबित्र दिनमे बिमारीसे अच्छो

¹ फिर येशू, पबित्र दिनमे फरिसीनको समुहके सासक मैसे कोइ एक घरमे खानु खान गओ, और बे येशूको चुहा लेत बैठे रहएं।

² हुवाँ एक आदमी रहए, जौनक हात-टाँग सुजे रहएं और बो आदमी येशूके अग्गु बैठो रहए।

³ तओ येशू नियम कानुन सिखान बारे मुखिया पुजारी और फरिसीनको समुहसे पुछी, “पबित्र दिनमे बिमारीसे अच्छो करन ठिक हए कि नाए?”

⁴ पर बे चुपचाप लागेरहे, तओ येशू अपन हात बो आदमीके उपर धरके अच्छो करी, और येशू बोके पठाए दइ।

⁵ तओ येशू बिनसे कही, “अगर तुमर लौंणा या बर्धा पबित्र दिनमे कुँइँयाँमे गिरजए हएं और बो बोके तुरन्त बाहिर नाए निकर हएं?”

⁶ तओ बे जा बातकी कोइ जबाफ नाए दइ पाइं।

पहुनको आदर

⁷ तओ बेहामे आएभए पहुनाके, बिशेष आदमी बैठान बारो ठाउँके छानत देखके, येशू एक कहानी बिनसे कही,

⁸ “जब कोइ तुमके बेहाके भोजमे निउतो देहए तओ मुख्य-मुख्य ठाउँमे जहाँ आदमी बैठत हएं, हुवाँ मत् बैठीयओ। कहुँ अइसो नाए हुइजाए, कि बो तुमसे फिर बडो आदमीके निउतो दइ होबए।

⁹ और बो आदमी तुमके और बोके, दुनौके निउतो दइ हए, तओ आएके तुमसे कहाबए, ‘जाके अपना बैठो ठिहा देओ,’ और तओ तुमके सरममे पणके साधारण आदमीके बैठन बारो ठिहामे बैठन पणैगो।

¹⁰ पर जब तुमके बुलाए जएहए, तओ साधारण आदमी बैठन बारो ठिहामे जाएके बैठओ। जब बो, जौन तुमके निउतो दइ हए, बो आबए और तुमसे कहाए ‘ए सँगी, मुख्य ठिहामे बैठ,’ तओ तुमर सँग बैठन बारेनके अग्गु तेरो इज्जत होबैगो।

¹¹ काहेकी जौन आदमी अपनएके बणे सम्झत हएं, बे आदमी छोटे बने जएहएं; और जौन कोइ अपनएके छोटो सम्झत हए, बे बणे बने जएहएं।”

प्रतिफल

¹² तओ येशू अपने निउतो देन बारे फरिसीनको समुहसे फिरसे कही, “जब तुम दिनको या रातको खानु खाबओ, तओ अपन सँगी या भइया या नातेदार या धनी परोसीनके मत् बुलैयओ, कहुँ अइसो नाए होए, कि बे फिर तुमके निउतो दइके तुमर गुन घुमाए देएं।

¹³ पर जब तुम खानु खानके बुलाबओ, तओ गरीब, लुला, लंगणा, अन्धराके बुलाओ।

¹⁴ तओ तुम धन्यके हुइहओ, काहेकी बे तुमर गुन घुमाए नाए पए हएं। जब धर्मीजान फिरसे मरके जिन्दा होबैगो तओ परमेश्वर तुमके इनाम देबैगो।”

बडो भोजको कहानी

¹⁵ येशूको बात सुनके बाके सँग खानु खान बैठन बारे मैसे एक जनै कही, “परमेश्वरको राज्यमे सहभागी हुइके खानु खान पान बारे धन्यके होमंगे!”

¹⁶ पर येशू बोसे कही, “कोइ एक जनै आदमी संझाके एक बडो भोज तयार करी, और बेढमके निउतो दइ।

¹⁷ बो अपन नोकरके, निउतो दएभएनके अइसे कहान पठाइ, ‘आबओ, सब चीज तयार हए।’

¹⁸ पर बे सब जनै एकए हानी बहाना बनानलागे। पहिलो बोसे कही, मए एक खेत किनो हओं, मोके बो देखन जानपणैया हए, मए बिन्ती करत हओं, मोके माफ करओ।

¹⁹ तओ दुस्रो कही, मए पाँच गोइ बर्धा किनो हओं, मए बिनके देखन जएहओं। मए बिन्ती करत हओं, मोके माफ करओ।

²⁰ दुस्रो कही, मए बेहा करो हओं। जहेमारे मए नाए आए पएहओं।

²¹ तओ नोकर आएके अपन मालिकके जा बात कहीदइ। तओ घरको मालिक दिक्काएके अपन नोकरसे कही, सहरके डगरमे और घुल्लीमे जल्दी जा, और गरीब, लुला, अन्धरा, लंगणाके हियाँ भितर लिया।

²² तओ नोकर कही, ‘तुम जैसी आज्ञा अढाए उइसी काम हुइगओ हए, पर अभए औ ठाउँ खाली हए।’

²³ मालिक नोकरसे कही, ‘मेन डगर और घुल्लीसे हुइके जाएके आदमीके भितर आनके कर लगाओ, ताकी मिर घर आदमीसे भरजाए।

²⁴ काहेकी मए तुमसे कहात हओं, बे आदमी जौन पहिले निउतो दइके बुलाएगए रहएं, बे कोइ फिर मिर सँग खानुको स्वाद चाखनके नाए पामंगे।’”

चेलाके करन बारो त्याग

²⁵ और जब बणी भिड येशूके सँग जात रहए, तओ येशू पिच्छु घुमके बिनसे कही।

²⁶ जौन आदमी मिर ठिन आत हएं बे तबतक मिर चेला नाए हुइ सकत हएं, जबतककी बे अपन अइयादौवासे, लौंणालौंणीया, ददाभइया, दिदी-बहिनीया और अपनेसे जद्धी मोसे प्रेम नाए करहएं।

²⁷ और जौन मिर अनुसरण नाए करैगो और मिर ताहीं अपनो क्रूस नाए उठाबैगो और मरनके ताहीं तयार नाए होबैगो; बो मिर चेला नाए हुइपए हए।

²⁸ अगर तुम मैसे कोइ एक धरहरा बनानके इच्छा करत हए, तओ बो बैठके सबसे पहिले जा बातको हिसाब करैगो, कि जाके बनानमे कित्नो खर्च आबैगो और देखैगो कि बोके ठिन जा धरहराके पुरा करनके ताहीं चाहन बारो रुपैया हए कि नाए।

²⁹ अगर बो धरहराको जग बनाएके पुरो नाए करी कहेसे आदमी बोको अइसे कहिके मजाक उणामंगे,

³⁰ “जा आदमी बनान त लागो पर पुरा नाए करपाइ।”

³¹ फिर, अगर एक राजा दश हजार आदमीनके सँग दुस्रो राजाको बिरुद्धमे लडनके ताहीं निकरत हए और जौनके बीस हजार आदमी हएं कहेसे बो राजा सबसे पहिले बैठके जा बातको फैसला करैगो, कि बो दुस्रो राजाके सामना करपएहए कि नाए कर्पएहए।

³² बो लड नाए पएहए कहेसे बो दुस्रो राजा, दुरए होत मेलमिलाप करनके ताहीं छलफल करन अपन राजदूतके पठाबैगो।

³³ जहेमारे तुम मैसे जो कोइ अपन सब कुछ नाए त्यागैगो कहेसे बो मिर चेला नाए हुइपए हए।

बिना स्वादको नुन

³⁴ “नुन त अच्छो हए, पर अगर नुनको स्वाद बिगण जाए, तओ बो का चीजसे नुनाइन हुइहए?

³⁵ बो नए जमिनके ताहीं नए खादके ताहीं काम लगन बारो होतहए: बोके त आदमी बाहिर फेकन और आदमीके टाँगसे कुल्चन बाहेक कोइ काम नाए देतहए। जो तुम सुने हओ बोके बारेमे ध्यानसे सोँचओ।”