लूका 13 - राना थारु नयाँ नियम

पाप करन छोडके पमेस्वर घेन घुमनो या बिनाश

¹ बो बेरा हुवाँ कोइ आदमी रहएं, बे येशूसे कहीं, “रोमी हाकिम पिलातस गालील परदेशके कुछ आदमीनके हत्या करीहए, जब बे मन्दिरमे बलिदान करत रहएं।”

² तओ जा सुनके येशू बिनके जबाफ दइके कही, “का तुम सम्झत हओ, कि जा गालील परदेशके आदमी और बाँकी गालील परदेशके आदमीसे जद्धा पापी हएं, काहेकी बिनके उपर अइसो बिपत्ति पणो?”

³ मए तुमसे कहात हओं, उइसो नाए हए; पर अगर तुम पाप करन छोडके परमेश्वर घेन नाए घुमैगे तओ, तुम सब अइसियए नाश होबैगे।

⁴ या बे अठारा आदमीके याद कराओ, जो पहिले मरिगए रहएं, जब यरूशलेम सहरके ढिँगै सिलोआमको धरहरा बिनके उपर गिरिगओ रहए। का बे यरूशलेम सहरके आदमीनसे जद्धा पापी रहएं?

⁵ उइसो नाएहए, पर मए तुमसे कहात हओं, तुम पाप छोडके परमेश्वर घेन नाए घुमैगे कहेसे, तुम फिर सब उइसीयए नाश होबैगे।

बिना फराको रुखा

⁶ फिर येशू जा कहानी कही: “कोइ आदमी अंगुरको बारीमे एक अञ्‍जीरको रुखा लगइ रहए। हरेक साल बोमे फरा फरो हुइहए कहिके ढुँणन आत रहए, पर नाए पात रहए।

⁷ तओ बो खितहरासे कही, ‘देख तीन सालसे मए जा अञ्‍जीरको रुखा मे फरा ढुँणन आएरहो हओं, पर नाए पातहओं। जाके काट डार, काहेकी जा अच्छी जमिन अगोरे पणेहए।’

⁸ पर खितहरा कही, हजुर, जाके जा साल और रहानदेओ; मए जाके चारौ घेन खोदके माँद डारंगो।

⁹ कापता फरा फरजएहए कि? फरा अएहए कहेसे ठिक हए, नाए फरैगो कहेसे काट देमंगो।”

पबित्र दिनमे बिमारीके अच्छो करी

¹⁰ पबित्र दिनमे येशू एक यहूदी सभाघरमे शिक्षा देत रहए।

¹¹ हुवाँ एक बैयर रहए, जौनके अठारा बर्षसे एक कमजोर बनान बारो भुत लागो रहए, और बो ढुकी हुइगै रहए, और अपना पुरा रुपसे सुध नाए हुइपात रहए।

¹² येशू बोके देखी, और बुलाएके कही, “ए नारी, तोके कमजोर बनान बारो रोगसे तए मुक्त हुइगओ हए।”

¹³ तओ येशू बोके उपर अपन हात धरी, और बो तुरन्तए सुध हुइगइ, और परमेश्वरको प्रसंसा करन लागी।

¹⁴ जहेमारे कि येशू पबित्र दिनमे बोके अच्छो करी रहए, तओ यहूदी सभाघरको मुखिया गुस्साएके आदमीनसे कहान लागे, “एक हप्तामे छ दिन काम करनके ताहीं हमके अनुमति हए। तभीमारे जाके छ दिनमे आएके अच्छो करियओ, पर पबित्र दिनमे नाए।”

¹⁵ जा सुनके प्रभु येशू जबाफ दइके कही, “हे कपटीयओ! तुम मैसे कौन पबित्र दिनमे अपनो बर्धा या गदहाके खोलके पानी पिबान नाए लैजात हए?

¹⁶ और का, जा ठिक नाए रहए, कि जा बैयर, जो अब्राहामको सन्तान हए, जौनके शैतान अठारा सालसे बाँधे रहए और पबित्र दिनमे जा बन्धनसे बो मुक्त होबए?”

¹⁷ जब येशू जा बात कही, तओ बाके सब बिरोधी सरममे पणे, और सब भिड बे महान काम जो येशू करत रहए, बो देखके आदमी आनन्दित भए।

लाहाटाकी बीज और खमिरकी कहानी

¹⁸ तओ येशू कही, “परमेश्वरको राज्य कौन कता हए और मए जाके तुलना कासे करओं?

¹⁹ बो लाहाटाको बीजको एक दाना कता हए, जो एक आदमी लैके अपन बारीमे छिर्की, और बो बढके एक रुखा हुइगओ और बादरके चिरैंचिरगुनी बोको हँगामे पाल बनाइं।”

²⁰ फिरसे येशू कही, “परमेश्वरको राज्यके मए कौनसे तुलना करओं?

²¹ बो खमिर जैसो हए, जो एक बैयर पच्चीस किलो चुनमे मिलाइ, और पुरा खमिर हुइगओ।”

पतरो फाटक

²² अब सहर-सहर और गाँउ-गाँउ हुइके अपन चेलनके सँग शिक्षा देत यात्रा करत यरूशलेम सहर घेन जात रहए।

²³ और कोइ एक आदमी येशूसे पुछी “हे प्रभु, का परमेश्वर इकल्लो आदमीके अनन्तकालको दण्डसे बचाए पाबैगो?” तओ येशू बिनके जबाफ दइके कही,

²⁴ “परमेश्वरके राज्यमे तागतसे भितर घुसन मुस्किल हए, काहेकी मए तुमसे कहात हओं, कि बहुतसे आदमी भितर घुसन कोसिस करंगे, पर भितर घुस नाए पएहएं।

²⁵ तओ परमेश्वर, जौन घरको मालिक हए, उठके फाटक बन्द करदेहए, और तुम बाहिर ठाणके फाटक खटखटाएके और बिन्ती करके कहाबैगे, ‘हे प्रभु, हमर ताहीं फाटक खोलदेओ,’ और बा तुमके अइसे जबाफ देहए कि, ‘मए तुमके नाए जानत हओं, तुम कहाँके हओ?’

²⁶ तओ तुम कहबैगे, ‘हम तुमर अग्गु खाए और पिए, और हमरे डगरमे तुम शिक्षा दएरहओ।’

²⁷ पर बो कहाबैगो, ‘मए तुमसे कहात हओं, मए नाए जानत हओं तुम कहाँसे हओ। हे खराब काम करन बारे, तुम सब मोसे दुर होबओ।’

²⁸ जब तुम अब्राहाम, इसहाक, याकूब और सब अगमबक्तनके परमेश्वरको राज्य भितर देखैगे, और तुम बाहिर फेँकेजाबैगे। तओ तुम हुवाँ रोबैगे और दाँत किटकिटबाबैगे।

²⁹ और अगार, पछार, सिरे और दक्खिनसे गैर-यहूदी आएके परमेश्वरको राज्यको भोजमे बैठंगे।

³⁰ जा जान लेबओ, पिच्छु बारे अग्गु हुइहएं, और अग्गु बारे पिच्छु हुइहएं।”

राजा हेरोद येशूके मरन चाँहत रहए

³¹ बहेबेरा कोइ-कोइ फरिसीनको समुह आएके येशूसे कही, “हिनासे निकरके जाओ, काहेकी राजा हेरोद तुमके मारन चाँहत हए।”

³² येशू बिनसे कही, “जाएके बो आदमीके जो एक सेरा कता चलाँख हए बोसे कहीदेओ, कि देखओ, आज और कल मए भुतनके भगामंगो, और बिमारीनके अच्छो करंगो, और तिस्रो दिन मए अपन काम पुरा करलेमंगो।

³³ तहुँफिर मोके आज, कल और परसओं फिर नेँगनके जरुरी हए, काहेकी परमेश्वरको अगमबक्ता यरूशलेम सहरमे इकल्लो मारो जात हए।

यरूशलेमके ताहीं येशूको बिलौना

³⁴ हे यरूशलेम सहरके आदमी! तुम परमेश्वरके अगमबक्तनके मारडारे जो बहुत पहिले रहएं। और बे आदमीनके पत्थर मारे रहओ, जौन तुमर ठिन पठाएगए रहएं। बहुत चोटी मए जा चाहो, कि जैसी मुर्गी अपन चिङगनन्के पखना तरे बटोरत हए, उइसीयए मए फिर तुमर बालकाके रेखदेख करन चाहो, पर तुम नाए माने।

³⁵ देखओ, परमेश्वर तुमर घर उजाण करैगो, और अब मए कहात हओं, जब तक तुम नाएकएहओ ‘धन्य हए बा, जौन प्रभुके नाउँमे आतहए,’ तबतक तुम मोके कभी नाए देखैगे।”