यहूदा 1 - राना थारु नयाँ नियम

¹ मए यहूदा जा चिट्ठी तुमके लिखनडटो हओं। मए येशू ख्रीष्टको दास और याकूबको भइया हओं। मए जा चिट्ठी परमेश्वरमे बिश्वास करनके बाके द्वारा बुलाएभए आदमीनके लिखनडटो हओं। तुमके परमेश्वर हमर दौवा प्रेम करत हए और येशू ख्रीष्टमे सुरक्षित रक्खी हए।

² मए प्राथना करत हओं, कि परमेश्वर तुमके कृपा, शान्ति और प्रसस्तसे प्रेम देबए।

ईश्वरहीन आदमीनको पाप और अन्त

³ मेरे प्यारे सँगीउ, हम सब सामिल भए, येशू ख्रीष्टसे आन बारो हमर मुक्ति और नयाँ जीबनके बारेमे लिखनके चाँहत हओं। पर अब मए जा चिट्ठीके माध्यमसे तुमके उत्साहित होन आग्रह करत हओं, ताकी तुम ख्रीष्ट येशुमे भए बिश्वासीके स्थिर करनके औ कडा परिश्रम करपाबओ। परमेश्वर अपने आदमीनके जा बिश्वास एकए चोटीमे दएडारी हए, और जाके नाए बदलाओ जाए सकत हए।

⁴ मए जा लिखनडटो हओं, काहेकी झुटो शिक्षा सिखान बारे कोइ परमेश्वरको आज्ञा नाए मानन बारे कुछ आदमी तुमर बीचमे चुप्पएसे घुसँगे। जे आदमीनसे परमेश्वर बहुत पिढी अग्गु पबित्र-शास्त्रमे कही रहए, कि बा सजाए देबैगो। बे गलत अनैतिक काम करन बहाना बनानके ताहीं परमेश्वरको अनुग्रहके बारेमे हमर सन्देशके बदली हएं। बे हमर अकेलो मालिकके और प्रभु येशू ख्रीष्टके फिर अस्वीकार करत हएं।

⁵ तुम जे सब बात एकचोटी जाने रहओ, तहुँफिर अभए मए तुमके याद दिबान चाँहत हओं। प्रभु इस्राएलीनके गुलाम बननसे छुणाइ और बिनके मिश्रदेश मैसे बचाएके लाइ, पर पच्छु बामे बिश्वास नाए करन बारे सबएके बा मरुभूमिमे मारी।

⁶ याद करओ, कि कैसे प्रभु बे शैतानको दूतनके सजाय दइ, जौन अपनो अधिकारके ठिक प्रयोग नाए करीं, पर बे उनके दओ भओ पद त्यागीं। प्रभु बो महान दिनमे बे शैतानके दूतनके कभी फिर अन्त नाए होन बारो दण्ड देनके ताहीं कोइ नाए तोडपान बारो साँकरसे बाँधके अंधियारोमे धरे हए।

⁷ जे इस्राएली और शैतानके दूतनकता सदोम और गमोरा सहरनमे और जिनको ढिँगैको सहरनमे बैठन बारे आदमीनमे भओ बात सम्खओ। आदमी अनैतिक भए रहएं, और सबए मेलके व्यभिचारसे भरे रहएं। जहेमारे परमेश्वर बिनके कभी फिर अन्त नाए होन बारो आगीसे भसम करदइ। बिनके सँग भओ बात, झुठे गुरुनके ताहीं चेतावनी भओ हए, कि बिनके फिर अनन्त आगीसे सजाय दओ जाबैगो।

⁸ जे उदाहरण पता पाएके फिर, परमेश्वरको आज्ञा नाए मानन बारे आदमी दर्शन देखी हएं काहेकी बे उइसीयए पाप करत हएं। बे अपनो शरीरके अशुद्ध बनात हएं, प्रभुको अधिकारके इन्कार करत हएं और स्वर्गमे भए महिमित प्राणीनको बुराई करत हएं।

⁹ पर प्रमुख स्वर्गदूत फिर, परमेश्वरको आज्ञा नाए मानन बारे जे आदमीन कता नाए करी। जब शैतान, मिखाएलसे अगमबक्ता मोशाको शरीरके गाडन अधिकार कौनको हए कहान बारो बातमे बहस करी रहए। मिखाएल ठिन जे आदमीनसे जद्धी अधिकार होएसे फिर शैतानके बो खराब बात नाए कही, और बोके दोष नाए लगाइ। बल्कि, बो अइसे इकल्लो कही, “प्रभु तोके हप्काबए।”

¹⁰ पर परमेश्वरको आराधना नाए करन बारे आदमी नाए बुझी भइ बातके बुराइ करके खराब शब्द प्रयोग करत हएं, और जब बे जंगली जानबर कता ब्यबहार करत हएं और बिना सोँचेसम्झे उनके पता भइ बात करत हएं, तओ परमेश्वर बिनके दण्ड देबैगो।

¹¹ परमेश्वर बिनके दण्ड देहए! काहेकी बे कयिनके कता अपनो जीबन खराब तरिकासे जीइत हएं, जौन गुस्साके कारण अपनो भइयाको हत्या करी रहए। काहेकी परमेश्वर बक ददाको भेँटी ग्रहण करी रहए। बे बालाम कता हएं, जौन रुपैया पानके ताहीं परमेश्वरके आदमीनके पाप करबानके कोसिस करी। बे कोरह कता नाश होमंगे, जौन परमेश्वर मोशाके दओ भओ अधिकारके बिरुद्ध बिद्रोह करी रहएं।

¹² जब जे आदमी प्रभुको प्रेम याद करके तुमर भोजमे तुमर सँग खात हएं, बे डर लगन बारो चट्टान कता हएं जो समुन्दर भितर लुके होत हएं और बे तुमके डुबान सिकत हएं। बे सरम नाएभए बक्रेहेरा कता हएं, जौन अपनो इकल्लो ख्याल करत हएं। बे बो बद्रि कता हएं, जौन सुखो जमिनमे बिना बर्षे ब्यार उणाएके लैजात हए। बे फरन बारे बे रुखा कता हएं, जो दुई चोटी मरचिके होत हएं, काहेकी बे कोइ फरा नाए देत हएं और जरएसे उख्डे रहात हएं। बो कहोक, बे पुरो मुस्किलमे हएं।

¹³ समुन्दरको कोइ मजबुत लणुरा, फोहर फिज निकारे कता, जे आदमी फिर सरम लागन बारो काम करत हएं। जैसी कोइ-कोइ तारा, बिना दिशाके रहात हएं, और उनकेमे भर नाए पणो जाए सकत हए। अइसीयए तुमके फिर जे आदमीनके पिच्छु नाए लागन पणत हए। तभीमारे सदादीनके ताहीं अंधियारोमे परमेश्वर उनके ताहीं एक ठाउँ धरेपणे हए, जहाँ एकौ उजियारो नाए होत हए।

¹⁴ आदमसे लैके सातौ पिढीमे जन्मो भओ हनोक जे आदमीनके बारेमे अइसे कहिके अगमबाणी बोली रहए, “देखओ, प्रभु नेहात्तओ अपनो अनगिन्ती पबित्र स्वर्गदूतनके सँग आबैगो।

¹⁵ बा सबए आदमीनको न्याय करैगो और सबए अधर्मी आदमीनको करोभओ सबए अनैतिक और दुष्ट काम और बाके बिरुद्धमे पापी आदमीनको बोलो भओ अपमानित शब्दनको दण्ड देबैगो।”

¹⁶ जे आदमी बिनके सँग भओ सबए बातके ताहीं परमेश्वरके दोष लगात हएं और गुनासो करत हएं और बे अपनो इच्छा अनुसार करनके खोजो भओ दुष्ट काम करत हएं। बे अपने बारेमे घमण्ड करत हएं और बे अपनो चाहो भओ बात पानके ताहीं, औरे आदमीनको प्रसंसा करो दिखावा करत हएं।

मेहेनती बननके आग्रह

¹⁷ हे मेरे प्यारे सँगीउ, तुम हमर प्रभु येशू ख्रीष्टके चुनेभए चेलनको पहिलीए कहीभइ बात सम्झओ।

¹⁸ बे कहीं रहएं, “अन्तिम समयमे, हुवाँ बे आदमी रहामंगे, जौन प्रभु और बाके आदमीनको गिल्ला करंगे। जे बेही आदमी हएं, जौनको जीबन अपनो अभिलाषाके अधिनमे हएं, जौननके परमेश्वर स्वीकार नाए करत हए।”

¹⁹ तुमके एकजुटमे नाए होनदेन बारे आदमी जेहीँ हएं। बिनको दुष्ट शारीरिक इच्छा बिनके अधिनमे करत हए और बिनमे पबित्र आत्मा नाए हए।

²⁰ हे मेरे प्यारे सँगीउ, पबित्र शिक्षामे बढनके ताहीं एक-दुस्रेनके तुमके बिश्वास करनके बेढम मदत करन पणत हए। तुमके पबित्र आत्माको शक्तिको अगुवाईमे प्राथना करन जरुरी हए।

²¹ परमेश्वर तुमके प्रेम करत रहात हए कहिके जानके तुमके जीइन पणत हए। तुम हमर प्रभु येशू ख्रीष्ट दुबरा लौटके आन बारो दिनको आसरा करओ, ताकी तुम कभी फिर नाश नाए होन बारो जीबन पाए सकओ, काहेकी बा हमर उपर दया करीहए।

²² बिश्वासमे स्थिर नाएभए बारे आदमीके दया दिखाओ।

²³ औरेनके, न्यायको आगीसे तानके बचाओ। औ आदमी हएं, जौननके तुमके दया दिखानके जरुरी हए, पर सँगए-सँग होसियार फिर होनके हए। बिनको पापमय अभिलाषासे उनको लत्ता अपबित्र बनोगओ सोँचके तुमके उनको सब लत्ता घृणा करन पणैगो।

आशिर्बादको प्राथना

²⁴ परमेश्वर तुमके बचान सिकैगो, ताकी तुम पापमे जीबन जीइनके ताहीं धोखामे नाए पणओ। बा महिमित परमेश्वर तुमके निष्कलङक और आनन्दसे भरो भओ बनानके तुमके अपने ठिन फिर्ता करलेबैगो।

²⁵ बा एकए परमेश्वर हए और हमर प्रभु येशू ख्रीष्ट हमर ताहीं करोभओ काम द्वारए बा मुक्ति दइ हए। येशू ख्रीष्ट हम्रो प्रभु आदमीनके आदर और प्रसंसा देन बारो बनाबए। बे जा बुझ पामएं, कि बाके ठिन पहिलीएसे, आज और सदादिन शक्ति और अधिकार हए। आमेन।