यूहन्ना 5 - राना थारु नयाँ नियम

जल-कुण्डमे अढतीस वर्षको बिमारी अच्छो भओ

¹ कुछ दिन पिच्छु यहूदी समुहनको तेवहार रहए, और येशू यरूशलेम सहरमे गओ।

² यरूशलेम सहर भितर भेंणा नाउँको फाटक रहए, और बोमे पाँच खम्माके उपर छत भओ कुण्डा रहए। बो कुण्डासे हिब्रू भाषामे बेथेस्‍दा कहात रहएं।

³ और कुण्डा किनारे बहुत बिमार, अन्धरा, लंगणा, और सुखे अंग भए पानी छलकनके आसरामे बैठे पणे रहत रहएं।

⁴ काहेकी कभी-कभी परमेश्वरको दूत कुण्डामे उतरके पानी हलाए देत रहए। और पानी हालो खिनक जो कोइ पहिले पानी भितर घुसत रहए, तओ चहुँ बोको जैसो रोग होबए सोउँ फिर, बो अच्छो हुइजात रहए।

⁵ हुवाँ पर एक आदमी रहए, जौन अढतीस बर्षसे बिमार रहए।

⁶ येशू बोके हुवाँ लेटो देखी, और लम्मो समयसे बो जा हालतमे रहए, कहिके जानके येशू बोसे कही, “का तए रोगसे अच्छो होन चाँहत हए?”

⁷ बो येशूसे कही, “हजुर, मिर कोइ आदमी नाए हए, जौन बेरा पानी हलातहए, मए कुण्डामे जानके कोसिस करत हओं, पर सबए चोटी दुस्रो आदमी पहिले कुदजात हएं।”

⁸ येशू बोसे कही, “उठ, और अपन गुन्द्री उठा, और नेँग।”

⁹ तओ बो आदमी तुरन्तए रोगसे अच्छो हुइगओ, और अपन गुन्द्री उठाएके नेँगन लागो।

¹⁰ जौन दिन बो रोगसे अच्छो भओ रहए, बो पबित्र दिन रहए। जहेमारे यहूदी समुहके अगुवा रोगसे अच्छो भओ मनैसे कहान लागे, “मोशाको नियम कानुन अनुसार आज पबित्र दिन हए, तोके गुन्द्री बोकनके उचित नाएहए।”

¹¹ रोगसे अच्छो भओ आदमी बिनसे कही, “जौन मोके रोगसे अच्छो करी, बहे मोसे कही, ‘अपन गुन्द्री उठाएके नेँग।’”

¹² बे रोगसे अच्छो भओ आदमीसे पुछीं, “कौन हए बा आदमी जौन तोसे कही, ‘अपन गुन्द्री उठाएके नेँग?’”

¹³ पर रोगसे अच्छो भओ आदमी नाए जानत रहए, कि बा कौन हए। काहेकी येशू भिडमे घुसके हुवाँसे गइभओ रहए।

¹⁴ जाके पिच्छु रोगसे अच्छो भओ आदमी, येशूके यरूशलेमको मन्दिरके आँगनमे मिलो, तओ येशू बोसे कही, “देख, तए रोगसे अच्छो भओ हए; फिरसे पाप मत् करीए, और अगर फिरसे पाप करो कहेसे कहुँ अइसो नाए होबए, कि तिर उपर औ जद्धा भारी बिपत्ति आए पणए।”

¹⁵ बोके अच्छो करन बारो त येशू हए, करके बो आदमी जाएके यहूदी समुहके अगुवासे अइसे कहीदइ, “जौन मोके रोगसे अच्छो करीहए, बा येशू हए।”

¹⁶ जहेमारे बो दिनसे यहूदी समुहके अगुवा येशूके सतान लागे, काहेकी येशू बो कामके पबित्र दिनमे करी रहए।

¹⁷ जहेमारे येशू बिनसे कही, “मिर दौवा हबएतक काम करीरहोहए, और मए फिर काम करीरहो हओं।”

¹⁸ तभीमारे जब येशू जा बात कही तओ यहूदी समुहके अगुवा औ जद्धा येशूके मारनके बिचार करन लागे, काहेकी बा पबित्र दिनको नियमके तोणी रहए, और परमेश्वरके मेरो दौवा कहिके अपनएके परमेश्वरके बराबर मानत रहए।

लौंणाको अधिकार

¹⁹ जहेमारे येशू बिनसे कही, “मए तुमसे नेहात्तओ कहात हओं, मए लौंणा अपनए कुछु नाए करपात हओं, काहेकी दौवा जो करत हए, लौंणा फिर बहे करत हए।

²⁰ काहेकी मिर दौवा मोके प्रेम करत हए, बा मोके सब चीज दिखात हए, जो बा अपनए करत हए। जासे फिर महान काम बा मोके दिखाबैगो, जौनके देखके तुम अचम्मो मानजएहओ।

²¹ जैसे दौवा मरे भए आदमीनके फिरसे जिन्दा करत हए और उनके जीबन देतहए, उइसीयए मए फिर जौनके चाँहत हओं बहेके जीबन देत हओं।

^22-23 बो बाहेक जैसे सब जनै दौवा परमेश्वरके अगर कोइ मिर आदर नाए करत हए कहेसे बो मोके पठान बारो दौवा परमेश्वरके आदर नाए करत हए।”

²⁴ “मए तुमसे नेहात्तओ कहात हओं, जौन मिर बचनके सुनके मोके पठान बारोके उपर बिश्वास करत हए, बो कभी फिर नाश नाए होन बारो जीबन पबैगो, और बो दण्डमे नाए पणैगो, और बो अनन्तकालको मृत्युसे बचाओ जाबैगो, और बो पहिलीयएसे नयाँ जीबनमे प्रबेश करडारी हए।

²⁵ नेहात्तओ मए तुमसे कहात हओं, बो बेरा आएरहो हए, और बो बेरा हबए हए, जब मरे भए परमेश्वरको लौंणाको अबाज सुनंगे, और जो सुनन बारे हएं बे हमेसाके ताहीं बचेजामंगे।

²⁶ काहेकी जौन रितिसे दौवा अपने आपमे जीबनको स्रोत हए, उइसी रितिसे बो लौंणाके फिर जीबनको स्रोत बनाइ हए।

²⁷ और मए, आदमीको लौंणा होनके कारण परमेश्वर मोके सब आदमीनके उपर न्याय करनके अधिकार दइ हए।”

²⁸ “जामे अचम्मो मत् मानओ; काहेकी बेरा आइगओ हए, जब बे सब आदमी शरीरमे मरिगए हएं बे मिर अबाज सुनंगे।

²⁹ अच्छो काम करन बारे मरके जिन्दा हुइके कभी फिर अन्त नाए होन बारो जीबन पामंगे, और खराब काम करन बारे जिन्दा हुइके दण्ड भोगंगे।”

येशूके सम्बन्धमे गवाही

³⁰ “मए अपनए कुछु नाए करपात हओं। दौवा परमेश्वर जैसी मोसे कहात हए, बहे अनुसार मए आदमीनको न्याय करत हओं। और मए करन बारो न्याय ठिक हए; काहेकी मए अपने इच्छासे नाए, पर मोके पठान बारोकी इच्छा चाँहत हओं।”

³¹ “अगर मए अपनए अपन बारेमे गवाही देहओं, तओ मिर गवाही सच्चो नाए हुइहए।

³² पर मिर बारेमे गवाही देन बारो दौवा परमेश्वर हए, और बा मिर बारेमे जो कहात हए, बो सब सच्चो हए, करके मोके पता हए।”

³³ “तुम बप्तिस्मा देन बारो यूहन्नाके ठिन अपन आदमीनके पुछन पठाए, और यूहन्ना सत्यकी गवाही दइ हए।

³⁴ पर मए अपने बारेमे आदमीनको गवाही नाए चाँहत हओं; मए तुमके बो गवाहीके बारेमे बातओ हओं, जो यूहन्ना दइ रहए, ताकी तुम उद्धार पाए सकओ।

³⁵ यूहन्ना पजरत और चमकत दिया जैसो हए; और तुमके कुछ देरतक यूहन्नाको उजियारेमे आनन्द मनानके अच्छो लागो।”

³⁶ “मिर ठिन बप्तिस्मा देन बारो यूहन्नाको गवाहीसे बडो गवाही हए। बो काम, जौन मोके दौवा पुरा करनके ताहीं दइहए, बहे मिर बारेमे गवाही देतहए। जौन काम मए करत हओं, बो गवाही देनके दौवा मोके पठाइ हए।

³⁷ और दौवा, जौन मोके पठाइ हए, बहे मिर गवाही दइ हए: तुमकभु बाको अबाज नाए सुने हओ, और नए बाके देखे हओ।

³⁸ और बाको शिक्षा तुमर मनमे नाए रहात हए, काहेकी तुम मोएमे बिश्वास नाए करत हओ जोके परमेश्वर पठाइ हए।

³⁹ तुम पबित्र-शास्त्र पढत हओ, काहेकी तुम जा सोँचत हओ, कि बोमे तुमके कभी फिर नाश नाए होन बारो जीबन मिलैगो। और जा बहे पबित्र-शास्त्र हए, जो मिर बारेमे गवाही देत हए।

⁴⁰ तहुँफिर तुम कभी फिर अन्त नाए होन बारो जीबन पानके ताहीं मिर ठिन आनके नाए चाँहत हओ।”

⁴¹ “मए आदमीनसे प्रसंसाको आसरा नाए करत हओं।

⁴² पर तुम अपने मनसे परमेश्वरके प्रेम नाए करत हओ।

⁴³ मए अपने दौवा परमेश्वरके अधिकारके साथ आओ हओं, और तुम मोके स्वीकार नाए करत हओ; पर अगर कोइ औ आदमी अपन अधिकारसे आबैगो कहेसे तओ बोके तुम स्वीकार करलेबैगे।

⁴⁴ पर तुम मिर उपर बिश्वास नाए करपए हओ, काहेकी तुम एकदुस्रेसे प्रसंसा चाँहत हओ, और तुम परमेश्वरसे प्रसंसा पानके कोसिस नाए करत हओ।”

⁴⁵ “जा मत् समझओ, कि मए दौवाके अग्गु तुमके दोष लगामंगो, पर जौन मोशाको नियम कानुन उपर तुम अपनो आसरा करेहओ, बहे मोशए तुमर उपर दोष लगाबैगो।

⁴⁶ अगर तुम मोशाके बिश्वास करते कहेसे मोके फिर बिश्वास करते, काहेकी मोशा मिर बारेमे लिखी हए।

⁴⁷ काहेकी तुम बोको लिखो भओ बातमे बिश्वास नाए करत हओ कहेसे तुम नेहात्तओ मए बत्काओ बातमे फिर बिश्वास नाए करैगे।”