यूहन्ना 3 - राना थारु नयाँ नियम

निकोदेमसके येशूको शिक्षा

¹ फरिसीनको समुह मैसे निकोदेमस नाउँको एक आदमी रहए, जौन यहूदी समुहनको धार्मिक अगुवा रहए।

² एकदिन निकोदेमस रातके येशूके ठिन आएके येशूसे कही, “हे महान गुरु, हम जानत हएं, परमेश्वर तुमए हमके सिखानके ताहीं पठाइ हए; काहेकी कोइ शक्तिशाली चमत्कार जो तुम दिखात हओ, अगर परमेश्वर बोकेसँग नाए हुइहए, तओ शक्तिशाली चमत्कार नाए दिखाए पएहए।”

³ येशू निकोदेमसके जबाफ दइके कही, “नेहात्तओ मए तोसे कहात हओं, अगर कोइ नयाँ करके नाए जन्मैगो कहेसे बो परमेश्वरको राज्यको कोइ हकदार नाएहोबैगो।”

⁴ निकोदेमस येशूसे पुँछी, “बुढे आदमी फिरसे कैसे जनम लैपएहए? का बो फिरसे अपन अइयक पेटसे जनम लैपएहए?”

⁵ येशू कही, “नेहात्तओ मए तोसे कहात हओं, जब तक कोइ आदमी पानी और आत्मासे नाए जन्मैगो, तबतक बो परमेश्वरको राज्यमे नाए घुस पबैगो।

⁶ आदमी अपन बच्चाके जनम देत हएं, पर आदमीनके नयाँ जीबन पबित्र आत्मासे इकल्लो मिलत हए।

⁷ अचम्मो मत् मानओ, कि मए तुमसे कहो, ‘तुमके नयाँ करके जन्मन जरुरी हए।’

⁸ हबाके जितए मन लागत हए, उतै बहात हए। हबाको अबाज त तुम सुनत हओ, पर हबा कहाँसे आतहए और कहाँ जातहए, तुमके पता नाए होत हए। अइसीयए पबित्र आत्मासे जनमन बारो आदमी फिर अइसी होतहए।”

⁹ निकोदेमस येशूसे पुछीं, “जा कैसे हुइपएहए?”

¹⁰ येशू निकोदेमसके जबाफ दइ, “तए इस्राएल देशको बडो गुरु हए, तहुँफिर जा बात नाए बुझत हए?

¹¹ नेहात्तओ, मए तोसे कहात हओं, हम जो जानत हएं बहे कहात हएं, और हम देखत हएं बहेको गवाही देत हएं। पर हम जो कहात हएं, तुम बोके उपर बिश्वास नाए करत हओ।

¹² जब मए तुमसे पृथ्वीमे जो होन बारो हए, बहे बात कहो, सोउँ फिर तुम बिश्वास नाए करत हओ कहेसे, अगर मए तुमसे स्वर्गमे का होबैगो कहिके कएहओं तओ फिर तुम कैसे बिश्वास करैगे?

¹³ कोइ स्वर्गमे नाए गओ हए, पर केबल मए, आदमीको लौंणा स्वर्गसे तरे आओ हओं।

¹⁴ और जैसी मोशा जंगली इलाकामे पितरको साँपके क्रूसमे टँगाइ रहए, उइसी जा जरुरी हए, कि मए, आदमीको लौंणा फिर टँगोजाओं।

¹⁵ ताकी जो कोइ मिर उपर बिश्वास करैगो, बो कभी फिर नाश नाए होन बारो जीबन पएहए।

¹⁶ काहेकी परमेश्वर संसारके आदमीनसे अइसो प्रेम करी, कि बा अपन ठिन रहो एकलौटो लौंणा दइदइ, ताकी बाके उपर बिश्वास करन बारे कोइ फिर नाश नाए होबए, पर कभी फिर नाश नाए होन बारो जीबन पाबए।

¹⁷ काहेकी परमेश्वर अपन लौंणाके संसारमे जाकेमारे पठाइ, कि संसारके आदमीनके उपर दण्डको आज्ञा देनके नाए, बल्कि संसारके आदमीनके उद्धार दइपाबए।

¹⁸ जौन परमेश्वरको लौंणाके उपर बिश्वास करैगो, बिनके उपर दण्डको आज्ञा नाए होत हए, पर जौन बाके उपर बिश्वास नाए करत हएं, बे अग्गुवएसे दोषी ठहिरे हएं; काहेकी बे परमेश्वरको एकलौटो लौंणाके नाउँमे बिश्वास नाए करी हएं।

¹⁹ और दण्डको आज्ञाको कारण जा हए, कि उजियारो संसारमे आइगओ रहए, तहुँफिर आदमी उजियारोसे जद्धा अन्धकारके अच्छो मानीं। काहेकी बिनके काम खराब रहए।

²⁰ काहेकी जौनकोइ खराब काम करत हए, बे उजियारोके अच्छो नाए मानत हएं, और बिनको काम कहुँ दिखाइ नाए पणजाबए कहिके बे डरके मारे उजियारोके ढिँगै नाए आत हएं।

²¹ पर जौन सच्चाईमे चलत हएं, बे उजियारोके ढिँगै आत हएं, ताकी परमेश्वर बिनको करो भओ कामके देख पाबए, जो परमेश्वर चाँहत हए।”

बप्तिस्मा देन बारो यूहन्नाकी गवाही

²² जाके पिच्छु येशू और बाके चेला यहूदिया परदेशमे आए, और हुवाँ येशू उनके सँग रहिके बप्तिस्मा देनलागो।

²³ और बप्तिस्मा देन बारो यूहन्ना फिर एनोन गाउँमे, जौन सामारिया परदेशमे सालीम गाउँके ढिँगै रहए, हुनै बप्तिस्मा देत रहए। काहेकी हुवाँ बहुत पानी रहए, और आदमी आत रहएं, और बप्तिस्मा लेत रहएं।

²⁴ बप्तिस्मा देन बारो यूहन्ना बो समयमे जेलमे नाए पणो रहए।

²⁵ हुवाँ बप्तिस्मा देन बारो यूहन्नाके चेलनके, कोइ यहूदी दलके नेतनके सँग, यहूदीनको पुर्खनको धार्मिक चलनमे भओ, हात धोन बारो चलनके बारेमे बाद-बिबाद हुइगओ।

²⁶ और बप्तिस्मा देन बारो यूहन्नाके चेला यूहन्नाके ठिन आएके कहीं, “महान गुरु, जौन आदमी यर्दन नदीयाके अगार घेन तुमर सँग रहए, जौनके बारेमे तुम गवाही दएरहओ, देखओ, बा बप्तिस्मा दइ रहो हए, और सब बाके ठिन जाएरहेहएं।”

²⁷ बप्तिस्मा देन बारो यूहन्ना जबाफ दइ, “जब तक आदमीके स्वर्गसे नाए दओ जएहए, तबतक बो कोइ चीज नाए करपए हए।

²⁸ तुम अपनए मोसे कहात सुने हओ, कि मए का कहो रहओं, ‘मए ख्रीष्ट नाए हओं, पर मए बासे अग्गु पठाओ गओ हओं।’

²⁹ दुलहा दुल्हिनसे बेहा करलेतहए, पर दुलहाको बाहानुइँया बहेके ठिन ठाणो रहात हए, और दुलहाकी कही बात सुनके बो बहुत आनन्दित होतहए; उइसीयए मेरु मन आनन्दसे भरीगओ हए।

³⁰ जरुरी हए, कि बाको महत्त्व जद्धा हुइजाए और मिर महत्त्व काम हुइजाए।”

स्वर्ग मैसे आओ भओ लौंणा

³¹ यूहन्ना कही, “जो स्वर्ग मैसे आतहए बो सबसे भारी हए। और जौन पृथ्वी मैसे आतहए, बो पृथ्वीको हए और पृथ्वीकी बात बत्कात हए। और जौन स्वर्गसे आतहए, बो सबसे भारी हए।

³² जो कुछ बे देखीं, और सुनिहएं, बहेको गवाही बे देत हएं, तहुँफिर बहुत कम आदमी बाको गवाही ग्रहण करीं।

³³ पर जौन बाकी गवाही ग्रहण करी हए, बा जा बातके साबित करी हए, कि परमेश्वर सच्चो हए।

³⁴ काहेकी जौनके परमेश्वर पठाइ हए, बा परमेश्वरको बात बत्कात हए: काहेकी परमेश्वर, पुरा रुपसे पबित्र आत्मा देतहए।

³⁵ परमेश्वर लौंणाके प्रेम करत हए, और सब चीज लौंणाके हातमे दइदइ हए।

³⁶ जौन परमेश्वरको लौंणाके उपर बिश्वास करत हए, बोके कभी फिर नाश नाए होन बारो जीबन मिलिगओ हए, पर जौन लौंणाके बिश्वास नाए करत हए, बो कभी फिर अन्त नाए होन बारो जीबन नाए पएहए, बल्कि परमेश्वरको दण्ड बोके उपर रहो रहाबैगो।”