यूहन्ना 19 - राना थारु नयाँ नियम

येशूके क्रूसमे दण्ड

¹ तओ पिलातस सिपाहीके आदेश दइ, कि येशूके लैजाएं और बाके कोर्रा लागएं।

² और कोर्रा लगाएके सिपाही येशूके मुणमे काँटोको मुकुट लागए दइं, और राजाके लगान बारो बैजनी रंगको कुर्ता पैँधाएदइं,

³ और सिपाही येशूके ढिँगै आएके कहान लागे, “यहूदीनको राजा, प्रणाम!” और बे येशूके थप्पर लगाइं।

⁴ पिलातस फिरसे एक चोटी बाहिर निकरके आदमीनको भिडसे कही, “देखओ, मए जा आदमीमे दण्ड देनके ताहीं कुछु फिर गलत नाएपाओ। जा बात तुमके पता होबए कहिके मए जाके तुमर अग्गु लाओ हओं।”

क्रूसमे टाँगानके ताहीं सौँपनो

⁵ तओ येशू काँटोको मुकुट और बैजनी रंगको लत्ता लगाएके बाहिर आओ। पिलातस बिनसे कही, “लेओ देखओ, जा आदमीके!”

⁶ जब मुखिया यहूदी पुजारी और मन्दिरके पहरेदार येशूके देखीं, तओ चिल्लाएके कहान लागे, “बाके क्रूसमे टाँगओ, बाके क्रूसमे टाँगओ!” पिलातस बिनसे कही, “तुमहीं जाके लैजाएके क्रूसमे टाँगओ, काहेकी मए जामे कोइ गलती नाएपाओ हओं।”

⁷ यहूदी समुहके अगुवा पिलातसके जबाफ दइके कहीं, “हमर नियम कानुन अनुसार जाके मारन पणैगो, काहेकी जा अपनएके परमेश्वरको लौंणा हओं, कहिके ठोकुवा करत हए।”

⁸ जब पिलातस जा बात सुनी तओ बो बहुत जद्धा डराइगओ।

⁹ और फिरसे पिलातस महाल भितर घुसो और येशूसे पुँछी, “तुम कहाँके हओ?” पर येशू बोके कुछु जबाफ नाए दइ।

¹⁰ जहेमारे पिलातस येशूसे कही, “मोके काहे नाए बतात हओ? का तुम नाए जानत हओ कि तुमके छोड देनको अधिकार मोके हए, और तुमके क्रूसमे टाँगनको अधिकार फिर मोएमे हए?”

¹¹ येशू जबाफ दइके कही, “अगर तुमके परमेश्वर अधिकार नाए दइ हुइतो, तओ तुमके फिर मिर उपर कोइ अधिकार नाए हुइतो। जहेमारे मोके तुमर हातमे पकणबान बारो औ जद्धा पापको दोषी हए।”

¹² येशूको जहे जवाफके कारणसे पिलातस बाके छोडदेनके चाहो, पर यहूदी आदमी चिल्लाए चिल्लाएके कहान लागे, “अगर तए जा आदमीके छोडदेहए तओ तए रोमको महाराजा कैसरको सँगी नाए हए। जो कोइ फिर अपनएके राजा होनके ठोकुवा करत हए बो महाराजाके बिरुद्धमे होत हए।”

¹³ पिलातस जे बात सुनके येशूके बाहिर ल्याइ, और बो न्याय करन बारो सिंहासनमे बैठो। बो सिंहासन अइसो ठाउँमे बनो रहए, जहाँ चक्ले-चक्ले पत्थर बिछे रहएं। जौनसे हिब्रू भाषामे गब्बथा कहात हएं।

¹⁴ बो दिन तयारीको दिन रहए, जौन पबित्र दिनसे अग्गुको दिन रहात हए। और जा बहे समय रहए जौन हप्तामे यहूदीनको निस्तार तेवहार मानो जात रहए। लगभग दुपहारको समय रहए। तओ पिलातास यहूदीनसे कही, “देखओ, जहेहए तुमर राजा!”

¹⁵ पर बे अइसे कहात चिल्लान लागे, “बाके मार डर, बाके मार डार, बाके क्रूसमे टँगा!” पिलातस बिनसे पुछीं, “का मए तुमर राजाके क्रूसमे टाँगओं?” मुखिया यहूदी पुजारी जबाफ दइके कहीं, “रोमको महाराजा कैसर बाहेक और कोइ हमर राजा नाए हए।”

¹⁶ तओ पिलातस येशूके क्रूसमे टाँगनके ताहीं बिनके हातमे सौँपदइ। ताकी येशू क्रूसमे चढाओ जाए।

येशूके क्रूसमे चढाइं

¹⁷ तओ सैनिक येशूके अपन जिम्मामे लैलैं। बे बाको क्रूस बहेके बुकानके लगाइं। और बे बाके यरूशलेम सहर मैसे बाहेर “खोपडीको डाँगा” कहान बारो ठाउँमे लैगए, जौनके हिब्रू भाषामे गलगथा कहात हएं।

¹⁸ हुवाँ सिपाही येशूके और बाके सँग और दुई आदमीके क्रूसमे टाँगी, एकके दहिना घेन और दुस्रोके दिबरा घेन और येशूके बे दुई जनैके बीचमे।

¹⁹ और पिलातस एक दोष-पत्र येशूक मुण उपर लिख्बाएके क्रूसमे लगाए दइ और बोमे अइसो लिखो रहए, “नासरत गाउँको येशू, यहूदीनको महाराजा।”

²⁰ बो दोष-पत्रके बहुत यहूदीके समुह पढीं, काहेकी बो ठाउँ जहाँ येशूके क्रूस उपर चढाओगओ रहए बो ठाउँ यरूशलेम सहरके ढिँगैयए रहए और बो दोष-पत्र हिब्रू भाषामे, ल्याटिन भाषामे और ग्रीक भाषामे लिखो रहए।

²¹ तओ यहूदीके मुखिया यहूदी पुजारी पिलातससे कहीं, “‘यहूदीनको राजा’ मत् लिखियओ, पर ‘बो कही कि, मए यहूदीनको राजा हओं’ कहिके लिखदेओ।”

²² पिलातस जबाफ दइ, “मए जो लिखो हओं, जा जैसो हए बिरकुल उइसी रहाबैगो।”

²³ जब सिपाही येशूके क्रूसमे टाँगडारीं, तओ बाको कुर्ता लैके चार खण्डा करीं। और चारौ सिपाही कुर्ताको एक-एक भाग लैं, और चदरा फिर लैलैं और चदरा नाए सिलो रहए बल्कि उपरसे लैके तरे तक बिनो भओ सिग्रो लत्ता रहए।

²⁴ सिपाही एक-दुस्रे कहीं, “जाके नाए फारएं, पर चदराके ताहीं चिट्टा डारएं, कि जा कौनको हुइहए।” जा जहेमारे भओ। “बे मिर कुर्ता अपनए-अपनामे बाँटीं, और बाहिरको चदराके चिट्टा डारीं” कहिके पबित्र-शास्त्रमे लिखो भओ बचन पुरा होन आओ।

येशू अपन अइयाके चेलनके सौँपी

²⁵ जहेमारे सिपाही अइसियए करीं। पर येशूके क्रूसके ठिन बाकी अइयाकी बहिनीया, क्लोफासकी बैयर मरियम और मरियम मग्दलिनी ठाणी रहएं।

²⁶ येशू अपनी अइया और अपनो प्रेम करन बारो चेलाके ठाणे देखके अपनी अइयासे कही, “हे अइया देख, जा तेरो लौंणा हए।”

²⁷ तओ बो चेलनसे कही, “देख, जा तेरी अइया हए!” और बहे समयसे बो चेला अपनो घरमे लैगओ, और परिवारको हिस्सा बनाइ।

येशूको मृत्‍यु

²⁸ अब मिर सब काम निभटिगओ हए कहिके येशू जानी, और पबित्र-शास्त्रमे लिखो भओ बचन एक-एक करके सच साबित होबए कहिके येशू “मोके प्यास लागो हए” कहिके कही।

²⁹ हुवाँ खट्टो रसासे भरो एक काटोर धरो रहए। जहेमारे कोइ खट्टो रसाके भीजो भओ स्पंजके लकणीकी नोकसे अड्काएके एक हिसपको हाँगामे बे येशूके मुँहुँमे लगाए दइं।

³⁰ जब येशू बो खट्टो रसाके चाखी, तओ कही, “अब मिर काम निभटिगओ,” और बा मुण झुकाएके अपन प्राण छोड दइ।

येशूको कोखमे भाला मारीं

³¹ अब जा तयारीको दिन रहए, और अग्ले दिन पबित्र दिन रहए, और यहूदीनको निस्तार तेवहार होन बारो रहए। जा यहूदी आदमीनके ताहीं एक खास दिन रहए, और बे नाए चाँहत रहएं, कि जा दिनमे टँगेभए लहास क्रूसमे रहाएं। जहेमारे बे पिलातससे कहीं, कि बे लोगनके टाँग तोड दे ताकी उनको मौत जल्दी हुइजाए, और लहासके तरे लाओजाए सकए।

³² जहेमारे सिपाही आएके पहिले येशू सँग क्रूसमे टँगे भएनके दुई आदमीको टाँग तोरीं।

³³ पर जब बे येशूके टाँग तोरनके आए तबतक बा अप्नो प्राण छोड दइ रहए, और जहेमारे बाको टाँग नाए तोरीं।

³⁴ तहुँफिर सिपाही मैसे एक जनै बाको कोखमे भालासे मारी तओ कोखसे खुन और पानी निक्रो।

³⁵ जौन आदमी जा सब देखी, बो गवाही दइ हए, ताकी तुम फिर येशूमे बिश्वास कर पाबओ। और बोकी गवाही सच्चो हए। और बो जान्त हए, कि बो सच्चो बात मस्कत हए।

³⁶ “बाको एकफिर हड्डी नाए टुटैगो।” करके पबित्र-शास्त्रमे लिखो भओ बचन सच होबए कहिके जा भओ हए।

³⁷ और फिर दुस्रो ठाउँमे पबित्र-शास्त्रमे लिखो भओ बचन अइसे कहात हए, “जौनके बे भालासे मारीं हएं, बेहीं बाके देखंगे।”

योसेफके चिहानमे येशूके दफ्नाओ गओ

³⁸ जे बातके पिच्छु अरिमाथिया गाउँसे आओ योसेफ नाउँको एक जनै चेला रहए। यहूदी समुहके अगुवनको डरसे, बो औ जनै पता नाए पामएं करके येशूके बिश्वास करी रहए। अब योसेफ येशूको लहासके लैजानके पामओं कहिके पिलातससे बिन्ती करी। पिलातस फिर कही, “ठिक हए, लैजाओ।” योसेफ जाएके येशूको लहासके क्रूससे तरे उतारके लैगओ।

³⁹ येशूके रातके भेँटन जान बारो निकोदेमस फिर योसेफके सँग रहए। बो लगभग: तेत्तिस किलो मिठो बासना आन बारो धुप और मिठो बासना आन बारो मूर्रको तेल एकएमे मिलाएके लैके आओ।

⁴⁰ अइसे बे येशूको शरीर यहूदीनके दफ्नान बारो रितिके अनुसार मखमलको लत्ताको एक लम्बी चदरामे धुप और मूर्राको तेल चादरमे लागए दइं। और येशूको लहासमे लपेटके बाँधीं और चिहानमे धरनके ताहीं तयार करीं।

⁴¹ बहे ठिहाके ढिँगै जहाँ येशूके क्रूसमे चढाओगओ रहए, हुवाँ एक बगिया रहए। और बो बगियामे एक नयाँ चिहान रहए, जौनमे कोइ फिर लहासके कभु नाए धरी रहएं।

⁴² जहेमारे बे येशूको शरीरके बहे चिहानकी गुफामे धरदइं काहेकी बो चिहान ढिँगै रहए और बहे दिन यहूदी समुहनको पबित्र दिनको तयारीको दिन रहए।