यूहन्ना 13 - राना थारु नयाँ नियम

प्रभुभोज

¹ यहूदीनको निस्तार तेवहार सुरु होनसे पहिले येशू जानलै, कि अपना संसार छोडके दौवा परमेश्वरके ठिन लौट जानको समय आनलागो हए। बा संसारमे भए अपन चेलनके सब दिन प्रेम करत रहए। और बा बिनके आखिरी समय तक अपनए कता प्रेम करी।

² येशू और बाके चेला संझाके खानु खात रहएं। शैतान पहिलीयएसे येशूके पकणबाए, देनके ताहीं सिमोन इस्करियोतको लौंणा यहूदा इस्करियोतको मनके उस्काए दइ।

³ परमेश्वर मोके सब चीजमे अधिकार दइ हए, कहान बारी बात येशूके पता रहए, और परमेश्वरसे आएके फिर परमेश्वर ठिन लौटरहो हओं, कहिके फिर बाके पता रहए।

⁴ बहे समझमे येशू उठो और बाहिरको चदरा खोलके करह्याँओँमे तौलिया लपेटलै।

येशू अपने चेलनको गोडो धोइ

⁵ तओ येशू तसलामे पानी अख्नाएके चेलनको गोडो धोन लागो, और जो तौलिया बा अपन करेहाँओँमे लपेटे रहए बहे तौलियासे, एक दास हानी चेलनको गोडो पोँछन लागो।

⁶ जब बा सिमोन पत्रुसके ठिन आओ, तओ पत्रुस कही, “प्रभु, का तुम मिर गोडो धोबैगे?”

⁷ येशू पत्रुसके जबाफ दइके कही, “जो मए करत हओं, तए हबए जाको अर्थ नाए जानत हए, पर पिच्छु जानैगो।”

⁸ पत्रुस येशूसे कही, “मए तुमके मिर गोडो धोनके कभु फिर अनुमति नाए देहओं।” येशू पत्रुससे कही, “अगर मए तुमर गोडो नाए धुईहओं कहेसे तुम मिर चेला नाए हओ।”

⁹ तओ सिमोन पत्रुस येशूसे कही, “हे प्रभु, मिर गोडो इकल्लो नाए, पर मिर हात और मुण समेत धोएदेओ।”

¹⁰ येशू बोसे कही, “एक आदमी जौन हँदाए डारी हए, बोके सिरफ अपने गोणोके धोनके जरुरी हए काहेकी बोको शरीर शुद्ध हए। और तुम मैसे एकके छोडके सब शुद्ध हओ।”

¹¹ काहेकी येशूके पकणबाए देन बारो कौन हए कहिके बा जानत रहए। जहेमारे बा कही, “तुम सब शुद्ध नाए हओ।”

गोडो धोनोको अर्थ

¹² जब येशू अपन चेलनको गोडो धोए डारी, तओ येशू अपनो बाहिरी कुर्ता ओढके खानु खानके बैठो और फिर उनसे कही, “मए काहे तुमर गोडो धोओ हओं, का तुम समझ पाए?

¹³ तुम मोके ‘गुरु और प्रभु,’ कहात हओ, या जो तुम कहात हओ, बो ठिक हए, काहेकी मए तुमर गुरु और प्रभु हओं।

¹⁴ अगर मए प्रभु और गुरु हुइके तुमर गोडो धोओ हओं, तओ तुमके फिर एक-दुस्रेके अपनएके नम्र करके गोडो धोन पणैगो।

¹⁵ काहेकी मए तुमर ताहीं एक उदाहरण दिखाओ हओं, कि जैसो मए तुमर ताहीं करो हओं तुम फिर अइसियए करओ।

¹⁶ नेहात्तओ मए तुमसे कहात हओं, कमैया अपन मालिकसे बडो नाए होत हए, और खबर लान बारो चुनेभए चेलासे बडो नाए होत हए।

¹⁷ जबकी तुम जे बातनके जानत हओ कहेसे जिनके पालन करओ, और तुम धन्यके हुइजाओ।”

अपन पकणाओके बारेमे येशूको भबिष्यबाणी

¹⁸ येशू कही, “मए तुम सबके बारेमे नाए कहो हओं? जौनके मए चुनो हओं बोके मए चिन्त हओं, पर जा जहेमारे हुइ रहो हए ताकी पबित्र-शास्त्रमे लिखो भओ बचनमे जो लिखो हए बो पुरा होबए, ‘जौन मेरे सँग रोटी खाइ बहे मोके धोखा देहए।’

¹⁹ जा हुइके तुम मोके, ‘जो हओं बहे हओं’ कहिके बिश्वास करपाबओ कहिके, जा होनसे अग्गुवए तुम्से कहानडटो हओं।

²⁰ नेहात्तओ मए तुमसे कहात हओं, ‘जौनके मए पठात हओं, बोके स्वीकार करन बारो आदमी मोके स्वीकार करत हए, और मोके स्वीकार करन बारो मोके पठान बारोके स्वीकार करत हए।’”

बिश्वासघातको संकेत

²¹ जा बात कहिके, येशू दया और दु:खसे भरीगओ, और अपन चेलनके बताइ, “नेहात्तओ मए तुमसे कहात हओं, तुम मैसे एक जनै मोके पकणाए देहए।”

²² येशू जा बात कौनके बारेमे कही हए, करके चेला नाए बुझके एक-दुस्रेके देखतए देखत रहिगए।

²³ बाको चेला मैसे एक जनै जौनके येशू प्रेम करत रहए, बो येशूके ढिँगै बैठो रहए।

²⁴ तओ सिमोन पत्रुस बासे इसारा करके पुछीं, “येशू जा काके बारेमे कही हए?”

²⁵ चेला येशूके घेन झुकके पुछीं, “प्रभु, बो आदमी कौन हए?”

²⁶ येशू जबाफ दइके कही, “जौनके मए रोटीको खुद्रा रसामे डुबाएके देहओं, मए कहो आदमी बहे हए।” और जैसे येशू रोटीको खुद्रा उपर करी और सिमोनको लौंणा यहूदा इस्करियोतके दइ।

²⁷ जैसीयए यहूदा इस्करियोत रोटी खाइ और येशू बोसे कही, “तए जो करनके जाएरहो हए, बोके तुरन्त कर।” बहे समय शैतान यहूदा इस्करियोतके काबुमे करलै रहए।

²⁸ यूहन्नाके बाहेक, खानके बैठन बारे मैसे कोइ फिर नाए जानत रहए, कि येशू यहूदा इस्करियोतसे अइसे काहे कही।

²⁹ बिनको रुपैयाकी थैली यहूदा इस्करियोतके जिम्मामे होनके कारणसे कित्तो आदमी, येशू बोके तेवहारके ताहीं सामान किननके पठाइ होबैगो कहिके सम्झीं। और कित्तो आदमी, गरीबनके कुछ देनके पठाइ होबैगो कहिके सम्झीं।

³⁰ रोटीको खुद्रा खाएके यहूदा इस्करियोत तुरन्त बाहिर निकरीगओ। बो बेरा रात हुइगओ रहए।

एक नयाँ आज्ञा

³¹ जब यहूदा इस्करियोत बाहिर गओ तओ येशू अपनो बारेमे अइसे कही, “अब मए, आदमीको लौंणा महिमामे प्रकट होमंगो, और परमेश्वरकी महिमा मोएमे होबैगो।

³² और परमेश्वर फिर अपनएमे लौंणाको महिमा करैगो। और परमेश्वर जा महिमा अपन लौंणाके बहुत जल्दी देबैगो।

³³ मेरे प्यारे लौंणा, मए कुछ देरतक इकल्लो औ तुमर सँग रएहओं। तुम मोके ढुणैगे, और जैसो मए यहूदी समुहनसे कहो, और हबए तुमसे फिर मए कहात हओं, जहाँ मए जएरहो हओं, हुवाँ तुम नाए आए पएहओ।”

³⁴ “अब मए तुमके एक नयाँ आज्ञा देत हओं: तुम एकदुस्रेके अपनए कता प्रेम करओ। जैसी मए तुमके प्रेम करत हओं, उइसियए तुम फिर एकदुस्रेसे उइसी प्रेम करओ।

³⁵ अगर तुम एकदुस्रेके अपनए कता प्रेम करैगे तओ हर कोइ जान लेबैगो, कि तुम मेरे चेला हओ।”

पत्रुसको इन्कारके बारेमे भबिष्यबाणी

³⁶ सिमोन पत्रुस येशूसे पुँछी, “हे प्रभु, तुम कहाँ जाएरहे हओ?” येशू जबाफ दइके कही, “मए जहाँ जएरहो हओं तए हबए मिर पिच्छु नाए आए पएहए, पर पिच्छु तए आए डारैगे।”

³⁷ पत्रुस येशूसे कही, “हे प्रभु, मए हबए तुमर पिच्छु काहे नाए आए पएहओं? तुमर ताहीं मए मरनके फिर तयार हओं।”

³⁸ येशू जबाफ दइ, “का तए मेरे ताहीं मरनके तयार हओं कहात हए? नेहात्तओ मए तोसे कहात हओं, मुर्गा बासनसे अग्गु तए मोके तीन चोटी ‘नाए चीन्त हओं’ कहिके इन्कार करैगो।”