यूहन्ना 11 - राना थारु नयाँ नियम

लाजरसको मृत्यु

¹ बेथानिया गाउँमे लाजरस नाउँको एक बिमार आदमी रहए। बहे गाउँमे मरियम और बोकी दिदी मार्था रहात रहएं।

² जा बहे मरियम हए जौन पच्छु प्रभुके पाँवमे महिंगो जटामसीको तेल लगाएके अपन बारसे पोँछी रहए। जिन्हिन्को भइया लाजरस बिमार रहए।

³ तओ मार्था और मरियम येशूके खबर पठाइं, “हे प्रभु, देखओ, जौनके तुम प्रेम करत हओ, बो बिमार हए।”

⁴ जा खबर सुनके येशू कही, “लाजरस बिमार हए, पर अन्तमे बो नाए मरैगो। बो त परमेश्वरको महिमा करनके ताहीं बिमार भओ हए और जहे द्वारा आदमी परमेश्वरको लौंणाके फिर महिमा करंगे।”

⁵ येशू मार्था, बोकी बहिनीया मरियमके और लाजरसके बहुत प्रेम करत रहए,

⁶ पर जब येशू बिमार भओ खबर पाएके बा अपना भओ ठिहामे औ दुई दिन बैठो।

⁷ दुई दिन पिच्छु येशू चेलनसे कही, “अब हम फिर यहूदिया परदेशको बेथानिया गाउँमे जामएं।”

⁸ चेला बासे कहीं, “हे महान गुरु, कुछ दिन अग्गु त हुवाँ यहूदी समुहके अगुवा तुमके पत्थर फेकके मारन चाँहत रहएं, और का तहुँफिर तुम बहे ठाउँमे जानके चाँहत हओ?”

⁹ येशू चेलनके जबाफ दइके कही, “का दिनमे बाहृ घण्टा नाए होत हएं? दुपहारके नेँगन बारो आदमीके ठेस नाए लागत हए, काहेकी बो जा संसारको उजियारोके देखत हए।

¹⁰ पर रातके नेँगन बारो आदमीके ठेस लागत हए, काहेकी बोके सँग कोइ उजियारो नाए होत हए।”

¹¹ तओ पिच्छु येशू बिनसे कही, “हमर सँगी लाजरस निँधमे पणो हए, और मए बोके निँधसे जगानके जएहओं।”

¹² चेला बासे कहीं, “प्रभु, अगर बो निँधानो हए कहेसे बो अच्छो हुइजएहए।”

¹³ येशूको कहाइको अर्थ जा रहए, कि लाजरस मरीगओ हए। पर चेला सोचीं, कि बा स्वाभाविक निँधके बारेमे कहिरहो हए।

¹⁴ बहेमारे येशू सुधे कहीदइ, “लाजरस मरिगओ हए।

¹⁵ और मए खुसी हओं, कि मए हुवाँ नाए रहओं। पर मए तुमर ताहीं खुसी हओं कि तुम मोएमे बिश्वास करे। चलओ, अब हम बोके ठिन जामएं।”

¹⁶ येशूके चेला मैसे दिदुमस कहान बारो थोमा अपन सँगी-चेलनसे कही, “चलओ, हम फिर जामएं और बाक सँग मरएं।”

दुई बहिनियनके येशू हौसला दइ

¹⁷ जब येशू बेथानिया गाउँमे आएपुगो तओ कोइ आदमी बासे कही लाजरस मरीगओ हए और बक शरीरके चिहानमे धरे चार दिन हुइगओ हए।

¹⁸ बेथानिया गाउँ यरूशलेम सहरसे लगभग तीन किलो मिटरके दुरीमे रहए।

¹⁹ बहुतसे यहूदी आदमी मार्था और मरियमको भइया मरो दुखमे सान्त्वना देनके ताहीं आए रहएं।

²⁰ येशू आएरहो हए करके जा बात पता पाएके मार्था बाके डगरमे भेँटनके गइ, पर मरियम घरैमे बैठिरही।

²¹ येशूके भेँटके मार्था कही, “हे प्रभु, तुमके हियाँ होन रहए, तओ मिर भइयाको मृत्यु नाए हुइतो।

²² पर हबए फिर मए जानत हओं, तुम परमेश्वरसे जो माँगैगे, परमेश्वर तुमके देहए।”

²³ येशू मार्थासे कही, “तिर भइया फिरसे जिन्दा हुइजएहए।”

²⁴ मार्था बोसे कही, “मए जानत हओं, कि बा न्यायके दिनमे फिरसे जिन्दा हुइके उठजएहए।”

²⁵ येशू मार्थासे कही, “मए बा हओं, जो मरे भए आदमीनके जीबन लौटात हओं। जो कोइ मोएमे बिश्वास करत हए बो मरके फिरसे जिन्दा हुइ जाबैगे।

²⁶ और जो कोइ मोएमे जीइत हए और मोएमे बिश्वास करत हए बो कभीनाए मरैगो। का तए जा बातमे बिश्वास करत हए?”

²⁷ मार्था बासे कही, “हँ प्रभु, मए बिश्वास करत हओं, तुम जा संसारमे आन बारे परमेश्वरको लौंणा ख्रीष्ट हओ।”

लाजरसके जिन्दा करोगओ

²⁸ इतकए कहिके मार्था गइभइ, और अपनी बहिनीया मरियमके बुलाएके चुप्पएसे कही, “महान गुरु आइगओ हए, और तोके बुलाएरहो हए।”

²⁹ जा बात सुनके मरियम जलदिसे उठके बाके भेँटनके गइभइ।

³⁰ बो बेरा येशू अभौफिर गाउँसे बाहिर रहए, बल्कि येशू बहे ठिहामे रहए जहाँ मार्था बाके भेँटी रहए।

³¹ तओ बे यहूदी जो मरियमके सँग घरमे रहएं, और जौन बोके सान्त्वना देत रहएं, बे मरियमके झट्टसे उठके बाहिर जात देखीं। जहेमारे यहूदी बोके पिच्छु-पिच्छु गए, जा सोँचके कि बो रोनके ताहीं चिहानमे जान डटी हए।

³² जब मरियम येशू भओ ठाउँमे आइ और बाके देखी तओ बो बाको पाँवमे घुप्टा पणके कही, “हे प्रभु, अगर तए हियाँ हुइतो तओ मिर भइया नाए मरतो।”

³³ मरियम रोन डटी रहए और बोके सँग आए यहूदी फिर रोन डटे रहएं। जा देखके येशू दया और दुखसे भरिगओ।

³⁴ येशू बिनसे पुछी, “तुम लाजरसके कहाँ दफ्नाएके धरे हओ?”

³⁵ येशू रोइ।

³⁶ जहेमारे यहूदी जो मरियमके पिच्छु-पिच्छु आए रहएं बे एक-दुस्रेसे कहीं, “देखओ ता, येशू लाजरसके कित्नो प्रेम करत हए!”

³⁷ पर कोइ-कोइ यहूदी कहीं, “का अन्धराके चंगाइ करन बारो जहे नाए हए? का जा लाजरसके मरनसे नाए बचाए पाइ?”

³⁸ तओ येशू फिर बहुत दया और दुखी हुइके चिहान घेन गओ। बो चिहान एक गुफा रहए और बोको मोहोडा बडो पत्थरसे तुपोगओ रहए।

³⁹ येशू कही, “पत्थर हटाओ।” लाजरसकी दिदी मार्था कही, “हे प्रभु बोके चिहानमे धरो त आज मिलाएके चार दिन हुइगओ, आज तक त बो गिन्धान बारो हुइगओ हुइहए।”

⁴⁰ येशू मार्थासे कही, “का मए नाए कहो रहओं, कि अगर बिश्वास करैगो कहेसे तए परमेश्वरको महिमा देखैगो?”

⁴¹ बे चिहानको मोहोडासे पत्थर हटाइं और येशू उपर देखके कही, “हे दौवा, मए तुमके धन्यबाद देत हओं, काहेकी तुम मिर प्राथना सुनलए हओ।

⁴² मोके पता हए, कि तुम मिर प्राथना रोज सुन्त हओ। तुम मोके संसारमे पठाए हओ कहान बारी बात हियाँ भए आदमी बिश्वास करएं कहिके मए तुमके बडो अबाजसे प्राथना चढान डटो हओं।”

⁴³ इतका कहिके येशू बडो अबाजसे बुलाइ, “हे लाजरस, बाहेर निकरके आ!”

⁴⁴ बो मरो आदमी बोको हात-टाँग पट्टिसे बँधो और मुँहुँ लत्तासे बिटो बाहेर निकरके आइगओ। येशू बिनसे कही, “चिहान मैके लत्ता खोलदेओ और बोके जान देओ।”

येशूके मारनके षडयंत्र

⁴⁵ मरियमके ठिन आएभए बहुत यहूदी आदमी येशूक करोभओ काम देखके बाके उपर बिश्वास करीं।

⁴⁶ पर बिन मैसे कोइ आदमी फरिसीनको समुहके ठिन गए, और येशू जो काम करी रहए, सब बताए दइ।

⁴⁷ तओ मुखिया यहूदी पुजारी और फरिसीनको समुहके यहूदी सभाघरके सदस्यनके बुलाइ और उनसे कहीं, “अब हम का करएं? काहेकी जा आदमी बहुत शक्तिशाली चमत्कार कर रहोहए।

⁴⁸ जाके अइसियए छोड देहओ तओ सब जाके उपर बिश्वास करंगे और रोम सहरको आदमी आएके हमर पबित्रस्‍थान और हमर जातिनके दोनएके नष्ट करदेहएं।”

⁴⁹ पर बिन मैसे एक जनै, कैयाफा, बो समयमे प्रधान यहूदी पुजारी रहए, बो उनसे कही, “तुम कुछ नाए जानत हओ!

⁵⁰ हमर सब आदमी नाश होनसे बरु जनताके ताहीं एक आदमी मरनमे तुमर भलाइ हए कहिके तुम नाए जानत हओ।”

⁵¹ जा बात बो अपने तरफसे नाए कही रहए, पर बो सालको प्रधान यहूदी पुजारीके रुपमे बो जा अगमबाणी बोली रहए, कि येशूके इस्राएल देशके आदमीनके ताहीं मरन पणैगो।

⁵² पर उनके ताहीं इकल्लो नाए हुइके, बा परमेश्वरके सन्ताननके ताहीं फिर मरैगो, जौन जा संसारमे तितरबितर हएं, ताकी बिनके एक ठाउँमे जमा करो जाए सकए।

⁵³ जहेमारे बो दिनसे यहूदी बाके मारनके बिचार करन लागे।

⁵⁴ बहेमारे येशू बो दिनसे यहूदीनके बीचमे खुल्मखुल्ला नाए नेगन लागो। बा जंगली इलाकाके ढिँगै पणन बारो इफ्राइम सहरमे गओ और अपने चेलनके सँग हुवँए बैठो।

⁵⁵ यहूदीनको निस्तार तेवहार ढिँगै रहए, और गाउँ-गाउँसे बहुत जनै अपनएके शुद्ध करनके ताहीं यहूदीनको निस्तार तेवहारको सुरु होनेसे अग्गु यरूशलेम सहरमे गए।

⁵⁶ तओ बे येशूके ढुँणन लागे, और बे यरूशलेमको मन्दिरमे ठाणेके आपसमे कहान लागे, “तुमके कैसो लागत हए, का बा तेवहारमे अएहए?”

⁵⁷ मुखिया यहूदी पुजारी और फरिसीनको समुह येशूके पकणनके ताहीं “बा जहाँ फिर होबए खबर करीयओ” कहिके आज्ञा दइ रहएं।