यूहन्ना 10 - राना थारु नयाँ नियम

बकरेहेरा और भेंणाकी कहानी

¹ “नेहात्तओ, मए तुमसे कहात हओं, जौन भेंणाक खोणको फाटकसे भितर घुसन छोडके, औरो घेनसे घुसत हए कहेसे बो चोर और डाँकु हए।

² पर भेंणनको बकरेहेरा फाटकसे भितर घुसत हए।

³ बोके ताहीं चौकीदार फाटक खोलदेत हए, और भेंणा बोको अबाज चिनजात हएं, और बो अपने भेंणनके नाउँ लैके बुलातहए, और बिनके बाहिर निकारत हए।

⁴ और जब अपन सब भेंणा निकारके बो बिनके अग्गुअग्गु नेँगत हए, तओ भेंणा बोके पिच्छु-पिच्छु आत हएं, काहेकी भेंणा बोको अबाज चिनजात हएं।

⁵ पर बकरेहेरा बाहेक औ कोइ बुलाइ कहेसे भेंणा बोको पिच्छु नाए आत हएं। बरु बोको अबाज नाए चिनपाएके भेंणा डरके मारे भागत हएं।”

⁶ येशू जा बात कहानीके रुपमे अइसो कहानी कही रहए। पर बे नाए सम्झीं, कि येशूको कहानको अर्थ का रहए।

येशू अच्छो बकरेहेरा

⁷ बहेबेरा येशू फिरसे उनसे कही, “नेहात्तओ, मए तुमसे कहात हओं, कि मए बो फाटक हओं जौन सुध भेंणा खोण भितर घुसत हएं।

⁸ मोसे पहिले आन बारे सब चोर और डाँकु हएं, पर मिर भेंणा बिनको अबाज नाए सुनीं।

⁹ फाटक महीँ हओं, अगर कोइ आदमी मिर सुध भितर घुसैगो कहेसे परमेश्वर बोके बचाबैगो, और बो भितर-बाहिर आनजान करैगो और खानके ताहीं खानु पाबैगो।”

¹⁰ “चोर त भेंणाके चुरान, मारन और नाश करनके ताहीं आत हए। पर मए त जाकेमारे आओ हओं, कि बे पुरा रुपसे जीबन पामएं।

¹¹ मए बो बकरेहेरा हओं, जौन अपन भेंणनके बचानके ताहीं ज्यान देनके फिर तयार होत हए।

¹² पर भेंणा देखन रक्खोगओ कमैया गुलहाके देखके भेंणनके छोडके भागत हए काहेकी भेंणा बोको अपने नाए हएं। गुलहा भेंणनके झुण्डमे हमला करत हए और तितरबितर करदेत हए।

¹³ बो केबल कमैया हए। बोके भेंणनको वास्ता नाए होत हए, तभीमारे बो भागत हए।”

^14-15 “मए बो बकरेहेरा हओं, जैसी दौवा मोके चिन्त हए और मए दौवाके चिन्त हओं। उइसीयए जौन अपन भेंणनके चिन्त हए और मिर अपने भेंणा मोके चिन्त हएं। मए अपने भेंणाके ताहीं मरनके तयार हओं।”

¹⁶ “अब जा खोणमे नाएभए मेरे और भेंणा हएं और मोके बिनके फिर लानके पणो हए। अगर बे मिर अबाज चिनपामंगे तओ मिर सब भेंणा एकए झुण्ड हुइके एकए बकरेहेराके होमंगे।

¹⁷ दौवा मोसे प्रेम करत हए, काहेकी मए अपनो इच्छासे ज्यान देत हओं ताकी मए फिरसे जिन्दा हुइपामओं।

¹⁸ कोइ मिर ज्यान मोसे नाए लैपाबैगो। पर मए अपन इच्छासे अप्नो ज्यान देत हओं, अपन ज्यान देनको अधिकार मिर ठिन हए और फिरसे लेनको अधिकार फिर मेरी ठिन हए। काहेकी जा बहे आज्ञा हए, जौन मए मिर दौवासे पाओ हओं।”

¹⁹ जा सुनके यहूदी समुहके अगुवनके बीचमे फिरसे मनमुटाब भओ।

²⁰ बिन मैसे बहुत आदमी कहान लागे, “जाके भुत लागो हए, और जा पगलियाइगओ हए। बाको बात तुम काहे सुन्त हओ?”

²¹ पर औ आदमी कहीं, “भुत लागो भओ आदमी अइसो बात नाए करत हए! एक भुत लागो आदमी कभी फिर एक अन्धरा आदमीको आँखीकी चंगाइ नाए करपात हए।”

यहूदीनको अबिश्वास

²² जाडोको बेरा रहए और हमर पुर्खनको यरूशलेम सहरमे मन्दिरको अर्पणको तेवहार आओ रहए।

²³ येशू यरूशलेमको मन्दिरको सोलोमन कहान बारो पखाहोमे फिरत रहए।

²⁴ यहूदी समुहके अगुवा बाके चारऔ तरफ बैठके पुछन लागे, “तुम हमके बहुत समय तक दोधारमे धरे हओ। अब हमके स्पष्ट रुपसे बताए देओ। का तुम ख्रीष्ट हओ?”

²⁵ येशू बिनके जबाफ दइके कही, “मए तुमसे अग्गुवए कहीडारो हओं, पर तुम बिश्वास नाए करत हओ। मए मिर दौवाको अधिकार पाएके करेभए काम ‘मए कौन हओं’ कहिके दिखात हए।”

²⁶ पर तुम मेरे भेंणा नाए हओ, काहेकी तुम मोके बिश्वास नाए करत हओ।

²⁷ “जैसेकी भेंणा अपनो अच्छो बकरेहेराको अबाज चिनजात हएं, उइसीयए मेरे आदमी मिर बातमे ध्यान देत हएं। मए उनके जानत हओं, और बे मेरे चेला बननके ताहीं मेरे पिच्छु लाग्गए हएं।

²⁸ और मए बिनके कभी फिर नाश नाए होन बारो जीबन देहओं, और बे कभु नष्ट नाए हुइहएं, और कोइ बिनके मोसे नाए छिन पएहए।

²⁹ बिनके मिर जिम्मामे देन बारो मिर दौवा सबसे महान हए और कोइ बिनके मिर दौवासे छिनाएके नाए लैजाए पएहए।

³⁰ दौवा और मए एक हएं।”

³¹ जा बात सुनके यहूदी समुहके अगुवा फिरसे दुस्रो चोटी येशूके मारनके ताहीं पत्थर उठाइं।

³² पर येशू बिनसे कही, “मए तुमके अपन दौवाके घेनसे बहुत अच्छे-अच्छे काम दिखाओ। बे काम मैसे कौन कामके ताहीं तुम मोके पत्थरसे मारन चाँहत हओ?”

³³ यहूदी समुहके अगुवा येशूके जबाफ दइं, “हम तुमके तुमर अच्छो कामके ताहीं पत्थरसे मारनके नाए चाँहत हएं, पर तुम परमेश्वरको बदनाम करेहओ बहेके कारणसे। काहेकी तुम आदमी हुइके फिर अपनएके परमेश्वर हओं कहिके दाबि करत हओ।”

³⁴ येशू बिनके जबाफ दइके कही, “का तुमर पबित्र-शास्त्रमे अइसो नाए लिखो हए, कि ‘मए कहात हओं, तुम ईश्वर हओ?’

^35-36 और तुम जानत हओ, कि पबित्र-शास्त्रके बदलाओ नाए जाए सकत हए। जहेमारे अगर बाके आदमीके अगुवनके ‘ईश्वर’ कहोगओ। जब मए जा कहात हओं, ‘मए परमेश्वरको लौंणा हओं’ तओ तुम मोसे का कहात हओ? ‘तए परमेश्वरको बदनाम करत हए।’ मए बहे हओं जौनके दौवा अलग करी हए और मोके संसारमे पठाइ।

³⁷ अगर मिर करोभओ काम परमेश्वरके नाए हएं कहेसे तुम मोके बिश्वास मत् करीयओ।

³⁸ पर अगर बे काम मिर दौवासे हएं कहेसे, मोके बिश्वास नाए करेसे फिर कमसेकम मिर काम देखके त बिश्वास करओ। तओ तुम जानैगे, कि दौवा मोएमे हए और मए दौवामे हओं।”

³⁹ जा सुनके यहूदी समुहके अगुवा येशूके पकणन चाहीं, पर बा उनसे दुर चलोगओ।

⁴⁰ येशू फिरसे यर्दन नदीयाके अगार घेन, जहाँ बप्तिस्मा देन बारो यूहन्ना सुरुमे बप्तिस्मा देत रहए बहे ठिहामे गओ और हुनै बैठिगओ।

⁴¹ बहुत आदमी बाके ठिन आए, और बे अपनए-अपनामे कहीं, “यूहन्ना त कोइ शक्तिशाली चमत्कार नाए करी, पर यूहन्ना जिनके बारेमे जो-जो कही रहए, बो नेहात्तओक रहए।”

⁴² तओ हुवाँ बहुत जनै येशूके उपर बिश्वास करीं।