हिब्रू 9 - राना थारु नयाँ नियम

आदमीनको बनाओ भओ तम्भुमे आराधना

¹ पुरानो करारमे आराधना सम्बन्धि कानुन इस्राएल देशके आदमीनके ताहीं रहए, और आदमीनको बनाओ भओ आराधना करनके ताहीं एक तम्भु फिर रहए।

² जा तम्भु जानबरनको खलरीसे बनो रहए। बो तम्भुके बीचमे, बे पर्दा टँगाएके दुई कोठा बनाए रहएं। पहिलो कोठामे सात एकन शाखा भओ सामदान रहए। हुवाँ एक टेबुल रहए जौनमे परमेश्वरके चढाओ भओ रोटी रहए। जा कोठासे पबित्र ठाउँ कहात रहएं।

³ तम्भु भितर पर्दाके पिच्छुको दुस्रो कोठाके महापबित्र ठाउँ कहात रहएं।

⁴ बो कोठामे धुप पजारन बारो सोनेकी वेदी धरो रहए। और हुवाँ एक करारको सन्‍दुक फिर रहए, जौनके भितर और बाहिरसे सोनोसे बनो रहए। बो सन्‍दुकमे तीन समान रहएं: मन्‍न धरो सोनेको भाँणा, गुमटी लागो भओ हारूनकी एक लकणी, और परमेश्वर मोशाके दओ भओ दश आज्ञाके दुई पत्थरके पाटी रहएं, जोके परमेश्वर लिखी रहए।

⁵ सोनेको सन्‍दूकको चुटियामे महिमाके करूब कहान बारे दुई डखमाकी मूर्ति रहए, जौन जा बातको संकेत रहए, कि परमेश्वर हुवाँ हए। बिनको खुल्ला डखमासे सन्‍दूकको उपरको भागके तोपे रहए जौनमे खुन छर्कत रहएं ताकी आदमीनको पाप क्षमा होबए। पर हम जा सब बातको हबए व्याख्या नाए करपामंगे।

⁶ अइसियए जा सब तयार हुइके पिच्छु यहूदी पुजारी बो तम्भुमे आराधना करन पहिलो कोठामे जाएके अपनो रीतिथितिको काम करत रहएं।

⁷ पर वर्षमे एक चोटी इकल्लो प्रधान यहूदी पुजारी महापबित्र ठाउँमे जात रहएं। जब बे भितर जात रहएं, तओ बे अपने सँग जानबरको खुन लैके जात रहएं। बे बो खुन अपने पाप क्षमाके ताहीं, और आदमीनको अन्जानमे करोभओ पापके ताहीं परमेश्वरके बलि चढात रहएं।

⁸ जे रीतिथितिसे पबित्र आत्मा हमके जा बुझात हए, कि जब तक जा धर्तीमे बो तम्भु हए और जाको रीतिथिति जहे धर्तीमे पालन होत हए, तबतक स्वर्गको महापबित्र ठाउँमे परमेश्वर ठिन जानके डगर नाए खुलैगो।

⁹ जासे जा प्रस्ट होत हए, कि चढाओ भओ बलिसे आराधनाको बिबेकके शुद्ध नाए बनाए पाबैगो।

¹⁰ काहेकी बे आदमीनको खानो और पिइनो और आदमीनके बाहिरी रुपमे शुद्ध बनान बारो बहुत मेलके पुरानो चलनके हँदानके बारेमे इकल्लो कहात हएं। जे रितीरिबाज बिनके परमेश्वरको नयाँ करार सुरु नाए भएतक पालन करन पणैगो।

ख्रीष्टको खुन

¹¹ जहेमारे ख्रीष्ट अब हियाँ भए सब असल चीजके उपर प्रधान यहूदी पुजारी हुइगओ हए। येशू स्वर्गमे भओ बहुत महान और सिद्ध तम्भुमे प्रबेश करीहए, जो आदमीनसे नाए बानो हए और जा संसारको फिर नाए हए।

¹² ख्रीष्ट स्वर्गमे भओ महापबित्र ठाउँमे एकए चोटी सदामानके ताहीं प्रबेश करी। बा अपने सँग बक्रा और बछ्रनको खुन लैके नाए गओ। बाको बलि बाको अपनो खुन रहए, और जासे बो हमके पापसे सदाके ताहीं छुटकारा करदइ हए।

¹³ मोशाको नियम कानुनको चलन अनुसार बक्रा और बर्धाको खुन और होमबलि चढाओ भओ बछराको भुवा रितीरिबाज अनुसार अशुद्ध आदमीके उपर छर्कत रहएं। अइसो करनसे बे बाहिरी रुपसे रितीरिबाज अनुसार शुद्ध होत रहएं।

¹⁴ जा सोँचओ, कि मृत्यु घेन लैजान बारो कामसे ख्रीष्टको खुन हमर हृदयके त झन् कित्तो अच्छेसे शुद्ध बनाए सकत हए, ताकी हम जिन्दा परमेश्वरको आराधना कर पामएं। काहेकी अनन्त आत्माको शक्तिसे ख्रीष्ट हमके हमर पापके ताहीं एक सिद्ध बलिके रुपमे परमेश्वरके चढाइ।

¹⁵ जहेमारे ख्रीष्ट परमेश्वरसे आदमीनके ताहीं नयाँ करारको मध्‍यस्‍थकर्ता हए। परमेश्वरके माध्यमसे बुलाएभए आदमीनके बाको प्रतिज्ञा करोभओ आशिष पाए सकत हएं, बो आशिष सदाके ताहीं रहबैगो। ख्रीष्ट मरोके कारण, बे आशिष पाइं, ताकी पुरानो करारमे रहान बारे पापसे छुटकारा हुइपामएं।

¹⁶ उदाहरणके ताहीं, अगर एक आदमी कोइके इच्‍छापत्र लिखनके बिन्ती करैगो, और बो अपनो सम्पतिको हक कोइ एक आदमीके देहए तओ, इच्‍छापत्र लिखन बारो आदमी मरके पिच्छु इकल्लो बो आदमीको सम्पतिको हक पान सिकैगो।

¹⁷ काहेकी सम्पतिको मालीक जिन्दा होनतक बो इच्छापत्रको कोइ महत्त्व नाए होत हए। बो आदमी मरजाबैगो तब्ही इकल्लो बो इच्छापत्रको महत्त्व होत हए।

¹⁸ जहेमारे परमेश्वरको दओ भओ पुरानो करारके पक्का करनके ताहीं फिर खुनको बलि चढाइ रहएं।

¹⁹ तभीमारे मोशाको नियम कानुनको किताबको हर आज्ञा आदमीनके अग्गु कहिके, बो बछरा और बक्राको खुन लैके पानीमे मिलाए दइ। बो लाल ऊनको हिसपको पेणके हँगामे बाँधके और जाके बो खुनमे डुबाएके मोशाको नियम कानुनकी पुस्तकमे और सब आदमीनमे छिँटी।

²⁰ मोशा जा करतए-करत आदमीनसे कही, “तुमरो पालन करन बारो आज्ञाके बारेमे परमेश्वर तुमर सँग करार बाँधी हए। जा खुन बो करारके पक्का करत हए।”

²¹ उइसी करके मोशा पबित्र तम्भुमे और आराधनामे चलान बारे सब बर्तनके उपर बहे तरिकासे खुन छिँटी।

²² मोशाको नियम कानुन कहात हए कि लगभग सब चीजके खुन छिँटके शुद्ध बनान पणत हए, और खुन नाए चढाएके पाप क्षमा नाए होत हए, जो मृत्यु दिखात हए।

²³ जहेमारे पृथिवीमे भओ बो तम्भु और जामे भए सब चीज जानबरको खुनसे शुद्ध करन पणत रहए। जे चीज स्वर्गमे भए चीजको नक्कल इकल्लो हए। पर स्वर्गमे भओ सच्चो चिजनके रिति पुगाएके शुद्ध करनके ताहीं जानबरको खुनसे औ अच्छो बलिको जरुरी रहए।

²⁴ तभीमारे पृथ्वीमे भओ पबित्र ठाउँ त स्वर्गमे भओ पबित्र ठाउँको नमुना इकल्लो हए। ख्रीष्ट आदमीनको बनाओ भओ बो तम्भु भितर नाए गओ। पर हबए हमर ताहीं बा स्वर्गमे परमेश्वरके ठिन गओ हए।

^25-26 प्रधान यहूदी पुजारी हर साल जानबरनको बलि चढाओ भओ खुन लैके बो तम्भुको दुस्रो कोठामे जात हएं। पर ख्रीष्ट उइसो नाए करी। उइसो करन पणतो कहेसे संसारको सुरुवातसे ख्रीष्टके घरि-घरि अपनएके बलि करन पणतो। पर अब अन्त्यको समयमे बा एकए चोटीमे सबए जनैनके ताहीं आओ। ताकी बा अपनए बलि करके हमर पापके उठाए लैजाए।

²⁷ हर आदमीनके एक चोटी मरनए पणैगो। और मरके पिच्छु परमेश्वर हर आदमीनको न्याय करैगो।

²⁸ उइसी करके बहुत आदमीनको पाप उठाए लैजानके ताहीं ख्रीष्ट अपनएके एकए चोटी बलि करी। और येशू दुस्रो चोटी फिर आबैगो। बो बेरा अपनएके पापके ताहीं बलि करनके नाए, पर बाको डगर देखके बैठन बारेनके बचानके ताहीं आबैगो।