हिब्रू 8 - राना थारु नयाँ नियम

नयाँ करारको प्रधान पुजारी

¹ अब हमके कहान बारी बात जहेहए: हमर फिर अइसे प्रधान यहूदी पुजारी हएं, जो स्वर्गमे महान परमेश्वरको सिंहासनके दहिना घेन स्वर्गमे उच्च आदरको ठाउँमे बैठे हएं।

² आदमीनके नाए, पर परमप्रभुको खडा करोभओ पबित्र ठाउँ जो स्वर्गमे हए, साँच्चो पबित्र बासस्थानमे बा सेवक होत हए।

³ सबए प्रधान यहूदी पुजारी पाप क्षमाके ताहीं भेँटी और बलिदान चढान नियुक्त भए होत हएं। जहेमारे हमर प्रधान पुजारी ख्रीष्टके फिर पाप क्षमाके ताहीं कुछु चीज चढान जरुरी हए।

⁴ अगर येशू जा संसारमे हुइतो तओ बा पुजारी नाए हुइतो, काहेकी मोशाको नियम कानुन अनुसार भेँटी चढान पुजारीनके त हइए हए।

⁵ जे पुजारीनके करन बारो काम स्वर्गमे भओ महापबित्र ठाउँको नक्कल और छाहीं इकल्लो हए, पर स्वर्गमे भओ जैसो नाए। काहेकी जब मोशा तम्भु बनात रहए, तओ परमेश्वर मोशाके चेतावनी दइ रहए, “पहाडमे तोके दिखाओगओ ढाँचा अनुसार तए सब चीज बनैए।”

⁶ पर येशू ख्रीष्ट, हमर प्रधान पुजारीके दओगओ पुजारीको काम बे और प्रधान पुजारीको कामसे बहुत बडो हए। काहेकी येशू जौन नयाँ करारको मध्यस्थकर्ताको काम करीहए, बो पुरानो करारसे अच्छो हए। और अच्छो बातको प्रतिज्ञामे आधारित हए।

⁷ काहेकी पहिलो करार बिना खोटको हुइतो तओ दुस्रो करारको जरुरी नाए पणतो।

⁸ पर बे आदमीनको दोष दिखात परमेश्वर कहात हए, “परमप्रभु कही, बे दिन आमंगे, जब इस्राएल देशके आदमीनके सँग और यहूदिया परदेशके आदमीनके सँग मए एक नयाँ करार बाँधंगो।

⁹ जा करार, बे पुर्खाके सँग मए बाँधो भओ करार कता नाए हुइहए, बो बेरा या मए हात पकणके बिनके मिश्रदेश मैसे निकरो रहओं। परमप्रभु कहात हए, कि मए उनके सँग बाँधो भओ करार बे पालन नाए करीं। तभीमारे मए उनको वास्ता नाए करो।

¹⁰ फिरसे परमप्रभु कहात हए, कि आन बारो दिनमे मए इस्राएल देशके आदमीनके सँग जा करार बाँधंगो, मए बिनके मिर नियम कानुनके बारेमे सोँचन बारे बनामंगो, और बे बोके अपने मनमे धरंगे, और मए बिनको परमेश्वर होमंगो, और बे मेरे आदमी हुइ जामंगे।

¹¹ ‘परमप्रभुके चिन्हओ’ कहिके अब अइसो कोइ आदमी अपनो देशके आदमीनके या अपने नातेदारनके सिखानके जरुरी नाए पणैगो। काहेकी छोटेसे लैके बणेतक सबए जनै मए बिनको परमेश्वर हओं कहिके चिन्हंगे।

¹² मए बिनको अपराध क्षमा करेदेहओं, और उनको पापनके फिर कभु याद नाए करंगो।”

¹³ परमेश्वर जाके नयाँ करार कही हए, तब्ही बा सुरुको करारके पुरानो बनाइ हए। और जौन करार पुरानो हुइके काम नाए लागन बारो होत जातहए, बो हल्दी नाश हुइके जएहए।