हिब्रू 7 - राना थारु नयाँ नियमप्रधान पुजारी मल्किसेदेक 1 मल्कीसेदेक शालेमको राजा और सर्वोच्च परमेश्वरको प्रधान पुजारी रहए। अब्राहाम चार राजनके, लडाइमे हराएके घुमत पेती मल्कीसेदेक बोके भेँटके आशिष दइ। 2 अब्राहाम राजासे जितके लाओभओ सब धनको दशांश मल्कीसेदेकके दइ। मल्कीसेदेक नाउँको अर्थ “धार्मिकताको राजा” हए, और बो शालेमको राजा होनके कारणसे बोको नाउँसे “शान्तिको राजा” फिर कहोजात हए। 3 मल्कीसेदेकके दौवा, अइया और पुर्खा कोइके बारेमे कुछु जानकारी नैयाँ। बोको जनम और मरनके बारेमे कुछु जानकारी नैयाँ। परमेश्वरको लौंणा कता बो सदादीन पुजारी हए। 4 अब बिचार करओ ता, मल्कीसेदेक कैसो महान आदमी रहए, जौनके हमर पुर्खा अब्राहाम युद्ध मैसे जितके पाओभओ सब चीजको दशांश दइ। 5 लेबी बंशके पुजारी कहात हएं, मोशाको नियम कानुन जा बात सिखात हएं, कि जौन पुजारी बनतहएं, बे इस्राएल देशके अपने आदमीनसे दशांश लेन पणत हए। पर बे पुजारी और आदमी, बिश्वासी ददाभइया जैसे हएं, काहेकी बे सब अब्राहामके सन्तान हएं। 6 पर जा आदमी मल्कीसेदेक, जो लेबी बंशको फिर नाए रहए। बो अब्राहामसे दशांश लइ रहए, और परमेश्वरको प्रतिज्ञा पान बारो अब्राहाम रहए तहुँफिर मल्कीसेदेक अब्राहामके आशिष दइ रहए। 7 हम जा पक्का करके जानत हएं, कि आशिष देन बारो आशिष पान बारोसे बडो हए। 8 पुजारी, जो दशांश पातहएं, बे मरके जान बारे आदमी हएं। पर अब्राहामसे दशांश पाओभओ मल्कीसेदेक, सबदिनके ताहीं जिन्दा हए, जैसे पबित्र-शास्त्रमे लिखो हए। 9-10 आदमीनसे दशांश लेन बारो लेबी अब्राहाम बंश रहएं। तभीमारे जब अब्राहाम मल्कीसेदेके भेँट करी, और बोके दशांश दइ। तओ हम अइसे कहेसकत हएं, कि लेबी फिर मल्कीसेदेकके अब्राहामके माध्यमसे दशांश दइ रहए। येशू मल्किसेदेक कता 11 आदमी पुजारीनको चलनको आधारमे मोशाको नियम कानुन देत रहएं, जो हारूनको बंशसे लेबी कुलके रहएं। पर बे बो चलनसे सिद्ध नाए हुइपाइं। जहेमारे दुस्रो पुजारी आनके आवश्यक रहए, बो पुजारी हारून जैसो नाए, पर मल्कीसेदेक जैसो होन पणत रहए। 12 काहेकी जब पुजारी बदलत हएं, तओ मोशाको नियम कानुन फिर बदलन पणत हए। 13 हम जा बात ख्रीष्टके बारेमे कहात हएं, जो दुस्रो कुलको रहए। बो कुलसे कोइ फिर कभौ वेदीमे पुजारीको रुपमे सेवा करी नाए रहएं। 14 काहेकी सबके पता हए, कि हमर प्रभु येशू यहूदाको बंशको हए, और मोशा यहूदाको कोइ फिर बंशको यहूदी पुजारी बनन बारी बातके बारेमे, कुछु नाए कही हए और यहूदाको कोइ फिर बंश कभु पुजारी भए नाए रहएं। 15 मए का बात बत्काएरहो हओं कहिके अब स्पष्ट होत हए, कि मोशाको नियम कानुन पहिलेसे परिबर्तन हुइगओ हए काहेकी दुस्रो पुजारी आइगओ हए, और बा मल्कीसेदेक जैसो हए। 16 कोइ खास आदमी अर्थात् लेबीको बंश हुइके नियम कानुनको कारण येशू पुजारी नाए बनो। पर बो अपनो जीबनको शक्तिके कारण पुजारी बनो, जौनको कब्ही अन्त नाए होत हए। 17 काहेकी पबित्र-शास्त्र बाके बारेमे गवाही दइहए, “मल्कीसेदेक पुजारी भओ कता तुम सब दिनके ताहीं पुजारी हओ।” 18 काहेकी पुरानो मोशाको नियम कानुन कुछ नाए करपान बारो और काम नाए लगन बारो होनके कारणसे खारेज करोगओ हए। 19 काहेकी मोशाको नियम कानुन त कुछु फिर सिद्ध नाए करपाइ। और हम्रे सँग एक अच्छो आसरा हए, बो आसरा येशू ख्रीष्ट हए, जौन हमके परमेश्वरके ढिँगै पुगात हए। 20 और परमेश्वरको करार अनुसार येशूके यहूदी पुजारी बनाइ हए। 21 लेबीको बंशनके, परमेश्वर बिना कसम खाएके पुजारी बनाइ रहए, पर येशूके कसम खाएके यहूदी पुजारी बनाइ। और जब येशू, परमेश्वरको पुजारी भओ, तओ परमेश्वर कही, “मए, परमेश्वर कसम खाओ हओं, और मए अपन मन कभु नाए बदलंगो, तुम सब दिनके ताहीं पुजारी हओ।” 22 जहेमारे येशू हमके उत्तम करारके पुरा करनके भरोसा दइ हए। 23 दुस्रो फरक बात का हए कहेसे, पहिलेके पुजारी अपनो काम पुरा नाए करपाइं। पर बे मरनके कारणसे उनको ठाउँमे दुस्रे पुजारी नियुक्त भए। जहेमारे पहिलेके पुजारीको संख्या बहुत रहए। 24 पर येशू अनन्त होनके कारणसे बाको पुजारीको पद कोइ नाए लेहए। 25 जहेमारे येशू द्वारा परमेश्वरके ढिँगै आन बारेनके बा सदिमान उद्धार करन सकत हए। काहेकी बिनके ताहीं मध्यस्थताको प्राथना चढानके ताहीं बा सदिमान जिन्दा हए। 26 येशू हमके चाहो भओ प्रधान यहूदी पुजारीको राजा हए। बा पबित्र, निर्दोष, और शुद्ध हए। और परमेश्वर बाके पापी आदमीनसे अलग करके सबसे जद्धा आदरसे स्वर्गमे बैठाइ। 27 और हारूनको बंशके प्रधान यहूदी पुजारीन कता येशूके फिर रोजदिन बलि चढान जरुरी नाए हए। बा प्रधान पुजारीनके अग्गु अपन पापके ताहीं, और बोके पिच्छु दुस्रे आदमीनको पापके ताहीं बलिदान चढाइ। येशू अपन बलिदान दइके जा कामके सदादीनके ताहीं पुरा करदइ। 28 काहेकी मोशाको नियम कानुन कमजोर आदमीनके, प्रधान यहूदी पुजारी नियुक्त करत हए, पर मोशाको नियम कानुनसे पिच्छु आन बारो कसम, परमेश्वरको लौंणाके, प्रधान पुजारी नियुक्त करी रहए। और बा सदिमानके ताहीं सिद्ध प्रधान पुजारी भओ हए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation