हिब्रू 6 - राना थारु नयाँ नियम

बिश्वाससे भणकनको परिणाम

¹ तभीमारे आओ, हम बो चीज सिखन बन्द करएं, जौन चीज हमके पहिले ख्रीष्टके बारेमे सिखाए गए रहएं। और गहिरो शिक्षा सिखएं, ताकी हमर बिश्वास परिपक्क हुइजाए। हमके फिरसे दुस्रो चोटी परमेश्वरमे बिश्वासके बारेमे और मृत्युके घेन लैजानको कामसे दुर होनको बारेमे सिखन सुरु नाए करन पणैगो।

² बहुत मेलके बप्तिस्माके बारेमे शिक्षा, कोइके उपर हात धरनो, मरे आदमीनके फिरसे जीइ उठानो और कभी फिर अन्त नाए होन बारो दण्ड जैसो बातमे इकल्लो लागके, विश्‍वासको जग फिरसे बैठान बारी शिक्षामे लागे नाए रहामएं।

³ अगर परमेश्वरको अनुमति भओ कहेसे मए तुमके बिश्वासमे मजबुत होनके शिक्षा देमंगो।

⁴ जौन अपनो बिश्वास छोडत हए, बिनके फिरसे पश्‍चताप करनको अवस्थामे नाए लाओजाए सकत हए। बे एकचोटी परमेश्वरको सच्चाईके चिनहीं, और स्वर्ग मैसे बरदान पाइं। और बे दुस्रे जनैनके सँग पबित्र आत्मा पाइगए हएं।

⁵ बे अनुभव करीं, कि परमेश्वरको सन्देश अच्छो हए और बे भबिष्यमे आन बारो समयको शक्ति अनुभव करी हएं।

⁶ बिनके फिरसे फिर्ता लानके कोइ तरिका नाए हए। काहेकी बे अपनए परमेश्वरको लौंणाके फिरसे क्रूसमे टाँगत हएं और बाको लाज करत हएं। औरे दुस्रे आदमी ख्रीष्टके बेकार हएं कहिके सोँचत हएं।

⁷ अच्छो शिक्षा ग्रहण करन बारो आदमी जमिन जैसो हए, जौनमे पानी पणत हए। अगर जमिन अच्छो हए तओ, जा किसानके अच्छो बाली देतहए और जामे परमेश्वरको आशिष होत हए।

⁸ औरे आदमी बो जमीन जैसे हएं, जौन काँटो और सेहुँर जमात हएं और बो जमीन बेकार होत हए। बो जमिनमे त परमेश्वरको सराप पणन डर होत हए और जा आगीसे नष्ट हुइजए हए।

⁹ मेरे प्यारे भइयओ! तुम असल काम कर रहेहओ। काहेकी परमेश्वर तुमके पहिलेसे मुक्ति दइ हए। जहेमारे जे चेतावनी तुमर बारेमे नाए हए।

¹⁰ जैसी तुम अच्छो काम करेहओ और अब परमेश्वरको नाउँमे, परमेश्वरके आदमीनके ताहीं प्रेमसे सेवाको काम करत हओ, परमेश्वर तुमके भुलैगो नाए। काहेकी बा धर्मी हए।

^11-12 अल्छी मत् होबओ। पर कडा मेहेनत करन बारे कता तुम फिर जी प्रेमको काम धैर्यता और बिश्वाससे अन्त तक करेरहान पणत हए। और परमेश्वरको प्रतिज्ञा पानके ताहीं मजबुत आसरा होन पणत हए।

परमेश्वरको प्रतिज्ञाको पक्का

¹³ परमेश्वर अब्राहामसे प्रतिज्ञा करत पेती बा अपन नाउँमे कसम खाइ, काहेकी बासे बडो और कोइ नैयाँ, जौनको नाउँ लैके बा कसम खाए पाबए।

¹⁴ बा कही, “पक्का मए तोके आशिष देमंगो, और तेरो पिढीके वृद्धि करंगो।”

¹⁵ अब्राहाम धैर्यसे लम्बो समय तक आसरा लगो। और बो, परमेश्वर प्रतिज्ञा करो भओ आशिष पाइ।

¹⁶ जब एक आदमी कसम खात हए, बो कोइ अपनेसे बडोको नाउँ प्रयोग करत हए। जा जहे दिखात हए, कि बा पक्कए अपनो प्रतिज्ञा पुरा करैगो। और कोइ फिर जाके बारेमे बात नाए कटैगो।

¹⁷ जहेमारे परमेश्वर फिर कसम खाइ। जासे बा, प्रतिज्ञा पाए भए आदमीनके स्पष्ट रुपमे दिखान चाँहत रहए, कि बा अपनो प्रतिज्ञा पुरा करैगो।

¹⁸ जहेमारे परमेश्वर हमके प्रतिज्ञा दइ हए और बा कसम खाइ हए। जे दुई बात परिबर्तन नाए हुइपए हएं। काहेकी जा सम्भब नाए हए, कि परमेश्वर झुट मस्कत हए। जहेमारे हम जो परमेश्वरके ढिँगै सुरक्षा पानके ताहीं आए हएं, हमर अग्गु भओ आसराके प्राप्त करन बडो हौसला पाए सकत हएं।

¹⁹ हमरे सँग भओ आत्माके ताहीं जा आसरा मजबुत हए और हलान नाए सिकंगे। जा हमके परमेश्वरसे दुर नाए लैजात हए, बरु जा हमके परमेश्वर ठिनको मन्दिर भितरको परमपबित्र ठाँउमे लैजात हए।

²⁰ हमरे ताहीं येशू हमसे अग्गु जा ठाउँमे जाएके बैठिगओ हए। मल्‍कीसेदेक पुजारी कता, बा सब दिनके ताहीं प्रधान यहूदी पुजारी भओ हए।