हिब्रू 5 - राना थारु नयाँ नियम

पुजारीको योग्यता

¹ परमेश्वर इस्राएल देशके आदमीन मैसे हर प्रधान यहूदी पुजारीनके चुनी, और बा हर प्रधान यहूदी पुजारीनके आदमीनके घेनसे पापके क्षमाके ताहीं भेँटी और बलिदान चढानके नियुक्त करी, ताकी परमेश्वर आदमीनको पाप क्षमा करए।

² काहेकी प्रधान यहूदी पुजारी अपनए फिर कमजोर आदमी हएं। जहेमारे बे अन्‍जान और डगर बिरान बारेनके नम्र हुइके सम्‍झाए सकत हएं।

³ तभीमारे प्रधान पुजारीके जैसे दुस्रो आदमीनको पापको क्षमाके ताहीं फिर बलि चढान पणत हए। उइसियए उनके अपन पापको क्षमाके ताहीं फिर बलि चढान पणत हए।

⁴ सम्मान पानके ताहीं कोइ फिर अपनए प्रधान यहूदी पुजारी हुइ नाए पातहए। जैसी परमेश्वर हारूनके प्रधान यहूदी पुजारी होनके बुलाइ रहए और चुनी रहए, उइसी परमेश्वर और प्रधान यहूदी पुजारीनके बुलातहए और चुनत हए।

⁵ ख्रीष्ट सम्मान पानके ताहीं अपनए प्रधान यहूदी पुजारी नाए भओ। पर परमेश्वर बाके बो सम्मान दइ, और कही, “तए मिर लौंणा हए, आज मए घोषणा करत हओं, कि तए मिर लौंणा हए।”

⁶ दुस्रो ठाउँमे परमेश्वर फिरसे बासे कही, “जैसे मल्‍कीसेदेक एक पुजारी रहए उइसीयए तए फिर सदादिनके ताहीं पुजारी हए।”

⁷ येशू अपनो शारीरिक जीबनमे होत पेती अपनएके, मरे भए मैसे बचान बारो परमेश्वरसे जोडसे रोतए आँसु बहात बिन्ती और प्राथना चढाइ। बाको नम्रता और भक्तिके कारण परमेश्वर बाको प्राथना सुनी।

⁸ येशू परमेश्वरको लौंणा हुइके फिर अपना भोगो दु:ख-कष्टसे बा परमेश्वरको आज्ञा माननके सिखो।

^9-10 मल्‍कीसेदेक यहूदी पुजारी भओ कता परमेश्वर येशूके प्रधान यहूदी पुजारी बनाएके सम्मान दइ। और जब येशूके परमेश्वर पुरा रुपमे सिद्ध बनाएडारी तओ बामे बिश्वास करन बारे आदमीनके ताहीं बा सदाकालको मुक्तिको मुल हुइगओ

बिश्वासके नाए त्यागनके चेतावनी

¹¹ जाके बारेमे कहान बारी बात बहुत हएं। पर बे बातके बारेमे वर्णन करनके कर्रो हए। काहेकी तुम परमेश्वरको बचन सिखनके ताहीं उत्सहामे नाए हओ।

¹² अभएतकले त तुमके दुस्रे जनैके सिखान बारे हुइडारनके रहए। पर तुम हबए फिर परमेश्वरको बचनके बारेमे प्राथमिक बात पता नाए पाएके कोइ दुस्रो जनै तुमके सिखान पणरहो हए। तुम बालका जैसे हओ, जौन कर्रो खानु खाए नाए पातहए, बिनके दुध चाँहत हए।

¹³ दुध इकल्लो खाएके जीइन बारो आदमी धार्मिक जीबन बितान बारो शिक्षामे पुरो नाए भओहोत हए, काहेकी बो बालकए हए।

¹⁴ कर्रो खानु त बिश्वासमे बलियो भए आदमीनके ताहीं हए। बो असल और खराब बात छुट्टयानके तालिम पाए डारत हए।