हिब्रू 4 - राना थारु नयाँ नियम

परमेश्वरके आदमीनके सातौ दिनमे बिश्राम

¹ परमेश्वर हमके प्रतिज्ञा करीहए, कि हम विश्रामको ठाउँमे जामंगे। जहेमारे होशियार रहाबओ, तुमर मैसे कोइ फिर प्रतिज्ञा करोभओ विश्रामके ठाउँमे जानके नाए छुटए।

² जैसी हम येशू ख्रीष्टके बारेमे अच्छो समाचारको परचार सुनेहएं, इस्राएल देशके आदमी फिर बिश्रामको ठाउँमे प्रबेश करनके खुसीको परचार सुनि रहएं। पर बे जामे बिश्वास नाए करीं। जहेमारे बो सन्देश बिनेके ताहीं काम नाए लागन बारो भओ।

³ तभीमारे, हम परमेश्वर कहीभइ बातमे बिश्वास करन बारे विश्रामको ठाउँमे जामंगे। और दुस्रे आदमीनके ताहीं परमेश्वर कही हए, “जहेमारे मए अपने दिक्कमे अइसे कसम खाओ, ‘मिर बिश्रामको ठाउँमे, बे कभु नाए घुसन पामंगे।’” पर हम जानत हएं, कि बो विश्रामको ठाउँ जो हबए हुवाँ हए, बो संसारको सृष्टि होनसे पहिलीयए हुवाँ रहए।

⁴ काहेकी सातौ दिनके बारेमे परमेश्वर पबित्र-शास्त्रमे अइसो कही हए, “परमेश्वर सब काम करके सातौ दिनमे बिश्राम लइ।”

⁵ हम जा फिर पढेहएं, कि पिच्छु परमेश्वर कही, “बे विश्रामके ठाउँमे कभु नाए घुसन पामंगे।”

⁶ पहिले अच्छो समाचार सुनन बारे इस्राएल देशके आदमी अपन अनाज्ञाकारीताके कारणसे विश्रामको बो ठाउँमे घुस नाए पाइं। पर परमेश्वरको विश्रामको ठाउँमे घुसनके ताहीं हबए फिर मौका हए।

⁷ जहेमारे परमेश्वर बाको विश्रामके ठाउँमे घुसनके ताहीं दुस्रो समय तोकी, और बो समय आज हए। बहुत बर्ष पिच्छु हमर पुर्खा परमेश्वरको बिरोध करीं। बा पहिले लिखीभइ बात, राजा दाऊदके कहान लगाइ, “आज तुम परमेश्वरको अबाज सुनैगे कहेसे बाको आज्ञापालन करनके अस्वीकार मत् कराओ।”

⁸ हम जा फिर जानत हएं, कि परमेश्वरको प्रतिज्ञा करोभओ विश्रामको ठाउँ कनान देश नाए हए, जहाँ हमरे पुर्खनके जानके ताहीं यहोशू अगुवाई करी रहए। काहेकी अगर बो ठाउँ कनान देश हुइतो, तओ परमेश्वर पिच्छु दुस्रो दिनके बारेमे नाए कहितो।

⁹ जहेमारे परमेश्वर संसारको सृष्टि करके, सातौ दिनमे बिश्राम लइ हानी, परमेश्वरके आदमीनके ताहीं हबए फिर बिश्राम करनके सम्भब हए।

¹⁰ काहेकी अगर एक आदमी परमेश्वरको विश्रामको ठाउँमे घुसैगो तओ, बो अपनो काम खतम करके बिश्राम करत हए, जैसी परमेश्वर अपनो काम खतम करके बिश्राम लइ।

¹¹ जहेमारे हम जा बिश्रामको ठाउँमे घुसनके ताहीं कोसिस करएं। और कोइ फिर परमेश्वरको आज्ञापालन करनके अस्वीकार करन बारे आदमीनके नमुना नाए मानएं। तब्ही इकल्लो हम बो बिश्रामके ठाउँमे घुसपामंगे।

¹² परमेश्वरको बचन त काम करतए रहान बारो और जिन्दा हए। जा दुनौ घेन धार भओ तरवारसे फिर पैनो हए। जा भितर जाएके प्राण और आत्माके अलग करदेत हए और गाँठीगुँठी और हड्डीके फिर काटदेत हए। परमेश्वरको बचन आदमीनको मनको बिचार और चाहनाके किराएके जाँचत हए।

¹³ परमेश्वरके नजरमे कोइ आदमी नाए लुको हए। और बाके हम, अपनो जीबनभर करोभओ कामको लेखा देन पणैगो। बाके अग्गु सब चीज स्‍पष्‍ट और खुल्ला हए।

येशू सबसे भारी महान प्रधान पुजारी

¹⁴ स्वर्गमे जान बारो परमेश्वरको लौंणा येशू हए। बा हमर सबको सबसे भारी प्रधान यहूदी पुजारी हए। तभीमारे सब आदमीनके अग्गु ग्रहण करोभओ बिश्वासके थामके मजबुत होबओ।

¹⁵ प्रधान यहूदी पुजारी, जो येशू ख्रीष्ट हए, बा हमर सब कमजोरीके बुझत हए, हमैंकता शैतान बाके सब बातमे परीक्षा करी, तहुँफिर बा कोइ पाप नाए करी।

¹⁶ जहेमारे सहाससे परमेश्वरके अग्गु जामएं, जो अनुग्रहसे भरोहए। और जरुरत पणो समयमे हम परमेश्वरसे दया और अनुग्रह पामंगे।