हिब्रू 3 - राना थारु नयाँ नियम

मोशासे जद्धा येशू महान

¹ जहेमारे परमेश्वर स्वर्गमे बाके सँग सहभागी होनके बुलाएभए बिश्वासी ददाभइयओ, येशूमे मन लगाओ, जो हमरे ताहीं परमेश्वरको चुनो भओ चेला और प्रधान यहूदी पुजारी हए।

² येशू परमेश्वर द्वारा दओगओ सब काम करी, अइसियए मोशा परमेश्वरद्वारा दओगओ सब काममे बिश्वासयोग्यतासे पुरा करी।

³ आदमी घर बनात हएं पर परमेश्वर सब चीज सृष्टि करीहए। जैसी घरसे जद्धा घर बनान बारो बहुत सम्मान पातहए,

⁴ उइसी येशू फिर मोशासे बहुत बडो सम्मानको योग्य हए, जोके माध्यमसे परमेश्वरको घर बनो।

⁵ मोशा परमेश्वरको घरको सब आदमीनसे बिश्वासयोग्य भओ। और पिच्छु, मोशाको करोभओ काम भबिष्यमे परमेश्वरके बोलन सच्चो बातको सच्चो उदाहरण रहए।

⁶ पर ख्रीष्ट परमेश्वरको घरको आदमीनसे लौंणाके रुपमे बिश्वासयोग्य रहए। और आगर हम हमर आसरामे सहास और भरोसा करे रएहएं, तओ हम परमेश्वरको घरके आदमी हएं।

गैर-बिश्वासीनके बिरुद्धमे चेतावनी

⁷ जहेमारे पबित्र आत्मा पबित्र-शास्त्रमे कहात हए, “आज तुमके परमेश्वरको अबाज सुने कहेसे,

⁸ जंगली इलाकामे परीक्षाके समयमे तुमर पुर्खा परमेश्वरको बिरोध करो कता परमेश्वरको आज्ञापालन करन अस्वीकार मत् करओ,

⁹ हुवाँ तुमर पुर्खा महिमाके नाए पत्तियाने और मोके जाँचीं जबकी बे चालिस वर्षतक मिर अचम्मको काम देखी रहएं।

¹⁰ जहेमारे बो पुस्तासे मए गुस्साइगओ, और मए कहो, ‘बे मोके अस्वीकार करी हएं, बे मेरो दओ भओ काम करनके अस्वीकार करी हएं।’

¹¹ जहेमारे मए अपन दिक्कमे अइसे कसम खाओ, ‘मिर बिश्राम देन बारो ठाउँमे, बे कभु नाए घुसन पामंगे।’”

¹² हे मेरे बिश्वासी ददाभइयओ, होश करओ, तुम मैसे कोइमे भओ दुष्ट और अबिश्वासी ह्रदय, तुमके जिन्दा परमेश्वरसे दुर नाए लैजाबए।

¹³ जब तक पबित्र-शास्त्रमे “आजको दिन” कहान बारी बात हए, तबतक हर दिन एक-दुस्रेनके हौसला देबओ। पाप तुमके धोखा नाएदेबए और तुमर ह्रदय कठोर नाए होबए।

¹⁴ अगर हमर सुरुमे रहो भओ बिश्वासमे हम जीबनको अन्त तक मजबुत रएहएं तओ हम ख्रीष्ट सँग साझा हकदार हुइहएं।

¹⁵ पबित्र-शास्त्रमे अइसो लिखो हए, “आज तुम परमेश्वरको अबाज सुनैगे तओ परमेश्वरको बिरोध करन बारे तुमर पुर्खन कता, परमेश्वरको आज्ञापालन करनके अस्वीकार मत् कराओ।”

¹⁶ कौन परमेश्वरको अबाज सुनके बाको फिरसे बिरोध करी? बेहीं इस्राएल देशके आदमी हएं, जौननके मोशा मिश्रदेशसे निकरके लाइ रहए।

¹⁷ चालीस वर्षतक परमेश्वर बे आदमीनसे दिक्कनो रहए, जौन पाप करी रहएं। और बे जंगली इलाकामे मरीगए।

¹⁸ जब परमेश्वर कसम खाएके जा घोषणा करी रहए, कि बे बो ठाउँमे कभु नाए घुसन पामंगे, जौन ठाउँमे मए बिनके बिश्राम दतहओं। परमेश्वर बे आदमीनके बारेमे कहात रहए, जौन बाको आज्ञापालन करनके अस्वीकार करी रहएं।

¹⁹ जहेसे हम पता पात हएं, कि बिश्वास नाए करके कारण बे विश्रामको ठाउँमे नाए जाए पाइं।