हिब्रू 2 - राना थारु नयाँ नियम

चेतावनी

¹ जहेमारे हमरी सिखाइ भइ बात पालन करनके ताहीं जद्धा ध्यान देन पणत हए, तओ हम सच्चाईसे दुर नाए जाए पामंगे।

² स्वर्गदूतसे दओ भओ मोशाको नियम कानुन सब दिन सत्य साबित भओ हए, और मोशाको नियम कानुनके हरेक उलंघनमे और अनाज्ञाकारिके काममे परमेश्वर आदमीनके सजाय दइ।

³ जहेमारे अगर जा बडो मुक्तिके हम वास्ता नए करे कहेसे नेहात्तओ हम फिर सजाय पामंगे। अग्गु प्रभु येशू अपनए मुक्तिके बारेमे कही, और प्रभुको कहो भओ मुक्तिको सन्देश सुनान बारे चेला हमके जा सच्चो हए कहिके प्रमाण दइ हएं।

⁴ और परमेश्वर अपनो इच्छा अनुसार जा सन्देशके चिन्हा और अचम्‍मको कामसे और बहुत किसिमको शक्तिशाली काम करके और पबित्र आत्माको बरदान दइके सत्य साबित करिहए।

ख्रीष्ट मुक्तिदाता

⁵ जोको हम बात कररहे हएं, बो नयाँ संसारके परमेश्वर स्वर्गदूतनके अधीनमे नाए धरी, पर प्रभु येशूको अधीनमे धर दइ।

⁶ पबित्र शास्त्रके कोइ एक ठाउँमे परमेश्वरके कोइ अइसे कहिके गवाही दइ हए, “आदमी कौन हए, और तुम परमेश्वर बोको वास्ता करत हओ? और आदमीको लौंणा कौन हए? और तुम बोको चिन्ता करत हओ?

⁷ तुम कुछ समयके ताहीं आदमीके स्वर्गदूतसे हम महत्वपूर्ण बनाए। तुम बोके राजा कता महिमा और आदरको मुकुट पैँधाए दए।

⁸ तुम सब चीज बोके अधिनमे धरदए, ताकी बा सब चीज उपर राज्य करपाबए।” हियाँ कहोगओ हए कि परमेश्वर सब चीज आदमीके अधीनमे धर दइ हए। जाको अर्थ हए, कि अइसो कोइ चीज फिर नाए हए, जो बाके अधिनमे नाए हए। पर बर्तमान समयमे हम देखसकत हएं, कि सब चीज आदमीनके अधिनमे नाए हए।

⁹ पर सच्चाई जा हए, कि कुछ समयके ताहीं, येशू स्वर्गदूतसे कुछ छोटो करोगओ। परमेश्वरको अनुग्रहसे येशू संसारके सब आदमीनके ताहीं कष्ट भोगी और मरो। जहेमारे परमेश्वर येशूके महिमा और आदर दइ।

¹⁰ परमेश्वर सब चीज सृष्टि करी और सब चीज बहेके हएं। जहेमारे बहुत आदमीनके बाको महिमामे सहभागी होन लैजानके ताहीं परमेश्वर निर्णय करी, कि मुक्तिको संस्थापक प्रभु येशूके दु:ख-भोगके माध्यमसे सिद्ध बनानो सही हए।

¹¹ काहेकी पापसे शुद्ध बनान बारो और पापसे शुद्ध भए सबएनको दौवा अर्थात्, परमेश्वर एकए हए। जहेमारे येशू बिनसे, बिश्वासी भइया-बहिनीया कहानमे शर्मात नाए हए।

¹² जाके बारेमे ख्रीष्ट परमेश्वरसे अइसे कहात हए: “मए अपनो बिश्वासी ददाभइयनके तुमर करेभए काम कहामंगो, बिनके सभामे आराधना करनके ताहीं इकट्ठा भए समयमे मए तुमर प्रसंसा करंगो।”

¹³ और फिरसे दुस्रो चोटी ख्रीष्ट कहात हए, “मए बाके उपर अपन भरोसा धरंगो।” और फिरसे बा कहात हए, “मए, परमेश्वरके दएभए आदमी सँग हियाँ हओ, जे मिर लौंणालौंणीया हानी हएं।”

¹⁴ काहेकी परमेश्वर जौननसे लौंणालौंणीया कही, बे आदमी हएं। येशू हर किसिमसे हमरी हानी भओ और आदमी हुइके आओ, ताकी बाको मृत्युके माध्यमसे, मृत्युके उपर अधिकार भओ शैतानके नष्ट कर पाबए।

¹⁵ तभीमारे मरन पणहए कहिके डरके मारे जीबनभर कमैया कता हुइके जीइके आदमीनके येशू छुटकारा दइ।

¹⁶ काहेकी नेहात्तओ प्रभु येशू स्वर्गदूतनके नाए, पर अब्राहामको सन्ताननको वास्ता करत हए।

¹⁷ जहेमारे हर बातमे येशूके दुस्रो आदमी कता बनन पणो। उइसीयए बा परमेश्वरको दयालु और बिश्वासयोग्य प्रधान यहूदी पुजारी बनो। ताकी बाको बलिदानसे आदमी अपनो पापसे क्षमा पाए जामएं।

¹⁸ काहेकी ख्रीष्ट कष्ट और परीक्षा भोगी, और बा परीक्षामे पणेभए सब आदमीनके मदत करन जानत हए।