हिब्रू 13 - राना थारु नयाँ नियम

अन्तिम अर्ती

¹ हम ददाभइया और दिदी-बहिनीया कता एकदुस्रेन्के प्रेम करतए रहामएं।

² याद करओ, परदेशीनके फिर पाहुननके रुपम सत्कार करन पणत हए। काहेकी अइसियए कोइ-कोइ बिना पता पाएके स्वर्गदूतन्के स्वागत करी हएं।

³ अपना फिर बिनके सँग जेलमे पणो समझके जेलमे होन बारेनको ख्याल करओ और अपना दुखमे पणोकता अत्याचारमे पणे आदमीनके सम्झओ। जैसेकी तुम उनके सँग दुखमे हओ।

⁴ सबनको बेहा आदरणीय होबए, और बेहामे एकदुस्रेके प्रति बिश्वासयोग्य रहाबओ। काहेकी व्यभिचार और सब मेलके अनैतिक काम करनके और दुस्रेन्को लोगा या बैयर सँग बिगडन बारेनके परमेश्वर सजाय देबैगो।

⁵ अपने जीबनके धनके लालचसे अलग रखाओ। तुमर सँग भओ चीजमे सन्तुष्ट रहाओ, काहेकी परमेश्वर अपनए कही हए, “मए तुमके कभीनाए छोडंगो और नाए त्यागंगो।”

⁶ जहेमारे सहास करके हम कहात हएं, “प्रभु मिर सहायक हए, मए नाए डरामंगो काहेकी कोइ आदमी मोके कुछु नाए करपएहए।”

⁷ अपन अगुवाको याद करओ, जौन परमेश्वरको बचन तुमके सुनाइ हए। बिचार करओ, कि बे कैसे जीबन बिताइं और मरे, तुम फिर उन्हीनकता परमेश्वर प्रतिको बिश्वास दिखाओ।

⁸ येशू ख्रीष्ट आज, कल और रोजए दिन एकए हानी होतहए। बा कभी फिर नाए बदल्थए।

⁹ हमके जे सब नयाँ और फरक शिक्षाके पिच्छु नाए लागनके हए, जौन गलत डगरमे लैजात हए। खान बारी बातके बारेमे नियमके मानके नाए, पर परमेश्वरको अनुग्रहसे तुमर हृदय मजबुत होबए। जे नियमके पालन करन बारेनको भलो नाए भओ हए।

¹⁰ यहूदी पुजारीनको आराधना करन बारो तम्भुमे सेवा करन बारो यहूदी पुजारीनको हमर बेदीको बलिदानसे खानको अधिकार नाए हए।

¹¹ प्रधान यहूदी पुजारी पुरानो करारके अनुसार पापबलिके ताहीं हर साल जानबरको खुन महापबित्र ठाउँमे पाप क्षमाके ताहीं लैजात रहएं, पर बोको शरीरके आदमी बैठन बारे ठाउँसे बाहिर लैजाएके जलात हएं।

¹² जहेमारे, येशू फिर आदमीनके अपने खुन द्वारा पबित्र करनके ताहीं यरूशलेम सहरके बाहेर बो दुख उठाइ और मरो।

¹³ जहेमारे आबओ, बलिदानकी रिति-रिबाजके छोड देओ ताकी येशूके ठिन जाए पामएं। और जैसे बा बेज्जत सहो, उइसीयए हम फिर बेज्जत सहिके आदमी बैठन बारे ठाउँसे बाहिर बाके ठिन जाएं।

¹⁴ काहेकी जा संसारमे हमर स्थायी सहर नाए हए, बल्कि पिच्छु हम आन बारो दिनको घरको आसरा करत हएं।

¹⁵ जहेमारे आओ हम येशू द्वारा लगातार परमेश्वरको प्रसंसा अपनो ओँठसे करएं। जहे बाके ताहीं हमर बलिदान हए।

¹⁶ भलाइ करन और जो कुछ तुमर ठिन हए, आवश्यकतामे पणेभएनसे बाँटचुट करन मतभुलओ, काहेकी अइसियए बलिनमे परमेश्वर खुसी रहात हए।

¹⁷ अपने अगुवनकी बात मानओ, उनको काम तुमर जीबनके रेखदेख करनो और उनके सेवाके बारेमे उनके हिसाब बुझानके होत हए। तुम बिनको आज्ञा पालन करओ ताकी बे अपन काम खुसीसे करएं, दुख मानके नाए। अगर तुम उनके दुखी बनाबैगे कहेसे जासे तुमके कुछु फाइदा नाए होबैगो।

¹⁸ हमर ताहीं प्राथना करतए रहाओ, काहेकी हमके जरुर पता हए, कि हमर बिबेक शुद्ध हए, और हम हर समय सही काम करन चाँहत हएं।

¹⁹ प्राथना करनके ताहीं मए तुमके औ फिर उत्साहित करत हओं, ताकी मए जल्दीयए तुमर ठिन फिरसे आएपामओं।

आशीर्वाद

^20-21 और अब, शान्तिको परमेश्वरको अनुग्रह, जो प्रभु येशूके मरो मैसे जिन्दा करी। बाको इच्छा पुरा करनके ताहीं तुमके चाहन बारो सब चीजसे सजाबैगो। बाके मन पणन बारो सब चीज येशू ख्रीष्टको शक्तिसे तुममे उत्पन्न करबाबैगो। येशूए भेंणनको बहुत अच्छो बकरेहेरा हए कहान बारी बात सदाकालको प्रतिज्ञाको चिन्हा बाको खुनसे दिखात हए। बाके सदासर्वदा महिमा मिलए। आमेन।

²² हे मेरे बिश्वासी ददाभइयओ, मए तुमसे बिन्ती करत हओं, कि हौसलाको जा बचनके धिरजसे सुनओ, काहेकी मए तुमर ताहीं छोटकरीमे लिखो हओं।

²³ तुम जा जानलेओ, कि हमर भइया तिमोथी जेलसे छुटीगओ हए और अगर बो जल्दीए आइगओ तओ मए बोके सँग तुमके भेँट करबामंगो।

²⁴ अपने सब अगुवनके और सबए पबित्र आदमीनके नमस्कार कहाओ। इटालिया परदेशमे रहान बारे बिश्वासी तुमके नमस्कार पठाइ हएं।

²⁵ परमेश्वरको अनुग्रह तुम सबए रहोरहाबए। आमेन।