हिब्रू 12 - राना थारु नयाँ नियम

परमेश्वरको सजाय

¹ हमर आसपिस अइसे बहुत आदमी हएं, जौनको जीबन हमके बिश्वासको अर्थ बतात हए। बहेमारे हमर डगरमे आन बारे बाधा और हमके फसान बारो पापके हम हटामएं और हमर दौडके धैर्यसाथ दौरएं।

² हमर बिश्वास सुरु करन बारो और पुरा करन बारो येशूके देखत रहाएं। बा भबिष्यमे पान बारो आनन्दके ताहीं कुछु जैसो नाए मानके क्रूसको कष्ट भोगी और मरीगओ, और हबए परमेश्वरको सिहासनमे दहिना हात घेन उँचो सम्मानको ठाउँमे बैठो हए।

³ जहेमारे येशूको उदाहरणके बारेमे बिचार करओ, बाके घृणा करन बारे पापी आदमीनसे बा इतनो बिरोध कैसे सहिहुइहए, ताकी तुम थकके हरेस नाएखाबओ।

⁴ तुमके पापके तागतनके बिरुद्धमे लडत पेती अपनो खुन बहाएदेनतक त नाए लडन पणो हए।

⁵ तुम बे उत्सहाके बचनके भुलिगए हओ जो परमेश्वर अपने बच्चनके रुपमे तुमसे कही रहए, “हे मेरे लौंणा जब परमप्रभु, तुमर करेभए गल्ती दिखाइ कहेसे ध्यान देओ, और जब बो तुमके डाँटए तओ हार मत् मानओ।

⁶ काहेकी जौनके परमेश्वर प्रेम करत हए बाके डाँटत फिर हए, और अपनो लौंणाके रुपमे ग्रहण करेभएनके बा सजाय देतहए।”

⁷ दौवाए सजाय दइहए करके समझके तुम दुख सहे करओ। परमेश्वर तुमर सँग लौंणा कता ब्यबहार करत हए। काहेकी हर दौवा अपने लौंणालौंणीयनके अपनो चाहो अनुसार काम करनके सिखाए करत हए।

⁸ पर अगर सबए जनै सहभागी भए बो सजाय तुम पाएनाए हओ कहेसे तुम अपने दौवाके खास लौंणा नाएहओ, और तुम नेहात्तओकमे परमेश्वरके लौंणालौंणीया नाए हओ।

⁹ और हमर शारीरिक दौवा फिर हमके सजाय दइ और हम बोको आदर करे। जहेमारे हमर आत्मिक दौवाके अधिनमे बैठन औ जद्धा महत्वपूर्ण हए, ताकी हम जीबन पाए सकएं।

¹⁰ काहेकी हमर शारीरिक दौवा त उनके ठिक लागो अनुसार कुछ देनके ताहीं हमके अनुशासनमे धरीं। पर परमेश्वर हमर भलाइके ताहीं हमके अनुशासनमे धरत हए, ताकी हम फिर बहे कता पबित्र हुइपामएं।

¹¹ हमके अनुशासनमे धरत पेती मन नाए पणत हए, बरु दुख दइ कता लगत हए। पर जासे सिख्जात हएं तओ हम शान्ति पातहए, काहेकी हम असल तरिकासे जीबन जीइन सुरु करत हएं।

¹² जहेमारे अपन थके भए हात उठओ, और अपने काँपनडटे घुँटोके मजबुत बनाओ।

¹³ और इतएउतए देखनसे अच्छो, बरु तुम बो सुधो डगरमे जाओ जो येशूके ठिन पुगात हए, ताकी हमर बीचमे जो आदमी आत्मिक रितिसे कमजोर हएं, बे आदमी डगर नाए भुलएं। पर उनको बिश्वास मजबुत हुइजाबए।

परमेश्वरके अस्वीकार नाए करनके चेतावनी

¹⁴ सबए आदमीनके सँग शान्तिमे बैठन और पबित्र जीबन जीइन कोसिस करओ, पबित्रता बिना कोइ आदमी परमप्रभुके नाए देखपएहए।

¹⁵ साबधान रहाओ, कि कोइ फिर आदमी परमेश्वरको अनुग्रह पानसे नाए छुटए ताकी तुमर बीचमे समस्या नाए आए। काहेकी अइसे आदमी तुमके बहुत जनैनके भ्रष्ट बनाए देत हए।

¹⁶ कोइ फिर व्यभिचारी या अब्राहामको नतिया एसाव कता अधर्मी नाए होबए, काहेकी बो बडो लौंणा रहए, और बोके खास हकदार होनको अधिकार रहए। पर बो जन्मसिध्द अधिकारको सम्मान नाए करी, तब्ही बो अपनो छोटो भइया, याकूबके एक पहार खानके ताहीं अपनो जन्मसिध्द अधिकार बेँचदइ।

¹⁷ तुमके पता हए, कि पिच्छु बो अपनो दौवासे आशीर्वाद पान ढुँणी, पर बो नाए पाइ। आँसु बहाएके बो आशिष चाहेसे फिर बोको करोभओ कामके बदलन ताहीं कुछु फिर नाए करपाइ।

¹⁸ तुम सीनै पहाड कता ठिहामे नाए आए हओ, जोके देखो और सुनो जाए सकत हए। हियाँ कोइ प्रचण्ड अग्नि, कारो बादर या आँधी नाए हए, और आदमी एक अइसो ठिहामे रहएं जब परमेश्वर उन्हएं अपनो नियम कानुन दइ।

¹⁹ बे त फुँको भओ तुरही और एक बडो अबाज सुनी रहएं। अइसो अबाज सुनत पेती बे अब फिरसे बो अबाज सुनन नाए पणए कहिके बिन्ती करी रहएं। काहेकी बे बहुत डराइगए रहएं।

²⁰ बे अइसे कहीं, काहेकी परमेश्वर उनके कहीभइ जा आज्ञा बे नाए सहे पाइं, बो जा रहए कि “अगर कोइ जंगली जानबर बो पहाडके छुइ कहेसे, बोके पत्थरसे मारके मारडरियओ।”

²¹ बो दृश्य बहुत डर लागन बारो हए। जहेमारे “मए त डरसे काँपरहो हओं,” कहिके मोशा अपनए फिर कही रहए।

²² पर तुम त सियोन पहाडमे आए हओ, जहाँ स्वर्गको यरूशलेम हए, जो जिन्दा परमेश्वरको सहर हए। जहाँ लाखओं स्वर्गदूत आनन्द मनाए करत हएं।

²³ तुम परमेश्वरको सबसे बडो सन्तानको मण्डलीके सभामे आए हओ, जौननको नाउँ स्वर्गमे लिखेहएं। बे स्वर्गमे रहान बारे बेहीं धर्मी आदमीनको आत्मा हएं जौननके अब सिद्ध बनाओ गओ हए। तुम अपनए परमेश्वरके ठिन आए हओ, जो सब चिजनके उपर न्यायी हए।

²⁴ तुम परमेश्वर और आदमीनके बीचमे नयाँ करार बाँधदेन बारो मध्‍यस्‍थकर्ता येशू ख्रीष्ट ठिन आए हओ, और छिँटो भओ खुनमे आए हओ, जौन हाबिलको खुन कता न्यायके ताहीं चिल्लानके सट्टामे माफीके बारेमे कहात हए।

²⁵ होसियार रहाबओ, और परमेश्वरको बात मानओ जौन तुमसे बोलत हए। काहेकी अगर पृथ्वीमे चेतावनी देन बारो मोशाके इन्कार करन बारे इस्राएल देशके आदमी परमेश्वरको दण्डसे नाए बचे कहेसे, स्वर्गसे चेतावनी देन बारो परमेश्वरके सुननसे इन्कार करे कहेसे हम नेहात्तओ बो दण्डसे नाए बचपामंगे।

²⁶ सीनै पहाडसे परमेश्वर मस्कत पेती धर्ती हालिगओ रहए। पर हबए त बा अइसे कहिके प्रतिज्ञा करीहए, “एक औ चोटी, धर्ती इकल्लो नाए, पर बादरके समेत मए हलामंगो।”

²⁷ “एक और चोटी” कहान बारो बचन जा दिखात हए, कि सृष्टि भए सबए हलाओ जाबैगो और मिटाओ जाबैगो, ताकी हलाए नाए पान बारे चीज स्थिर रहामएं।

²⁸ बहेमारे हलानए नाए पान बारो राज्य पाएके कारण धन्यबाद दमएं। जहेमारे हम भक्ति और डरसे परमेश्वरके ग्रहणयोग्य होन बारो आराधना चढामएं।

²⁹ काहेकी हमर परमेश्वर भसम करन बारो आगी कता हए।