हिब्रू 11 - राना थारु नयाँ नियम

बिश्वासको उदाहरण

¹ बिश्वास करनको मतलब आसरा करोभओ बातमे निर्धक्क होनो और नाएदेखो भओ बातमे पक्का भरोसा करनो हए।

² हमर पुर्खनको अइसियए बिश्वास रहए और सिरफ जहेमारे परमेश्वर उनसे खुसी रहए।

³ बिश्वासएसे हम जान्त हएं, कि सब सृष्टिको रचना परमेश्वरको बचनसे भओ हए। जहेमारे हम देखसकन बारो चीज बनानके ताहीं परमेश्वर नाए दिखान बारी चीज इस्तमाल करी।

⁴ बिश्वाससे आदमको लौंणा हाबिल परमेश्वरके अपनो ददा कयिनसे जद्धा ग्रहणयोग्य जानबरको बलिदान चढाइ, और बहेसे परमेश्वर हाबिलके धर्मी आदमीके रुपमे ग्रहण करी। हाबिलको चढाओ भओ बलिदान द्वारा परमेश्वर खुसी भओ कहिके दिखाइ। और हाबिल मरो, तहुँफिर परमेश्वरमे बिश्वास करनके बारेमे अभौफिर बो हमके सिखात हए।

⁵ हनोक नाउँ करोभओ आदमीको बिश्वाससे परमेश्वर बोके जिन्दएमे स्वर्गमे उठाए लैगओ। जहेमारे कोइ फिर बोको मरो भओ शरीरके नाए पाइ। स्वर्गमे उठाए लैजानसे अग्गु हनोक परमेश्वरके खुसी बनाइ, अइसे पबित्र-शास्त्रमे लिखो हए।

⁶ परमेश्वरमे बिश्वास करेसे इकल्लो हम परमेश्वरके खुसी बनाए पामंगे। काहेकी परमेश्वर ठिन आन बारेनके बिश्वास करन पणतहए, कि परमेश्वर हए और बाके नेहत्तओ ढुँणन बारेनके बा इनाम देबैगो।

⁷ बिश्वाससे नोआ नाउँ करोभओ आदमी कभीनाए देख भओ बहियाके बारेमे परमेश्वरसे चेतावनी पाएके बाको बडो आदरके साथ आज्ञापालन करके अपनो परिवारके बचान बारो पानीजहाज बनाइ। और नोआ बिश्वाससे पहिले, और संसारके बिश्वास नाए करन बारे आदमी दोषी ठहिरे और बिश्वाससे परमेश्वर नोआके धर्मी घोषित करी।

⁸ बिश्वासएसे अब्राहाम नाउँको आदमी परमेश्वरको कहो भओ बात मानी। परमेश्वर बोके बुलाएके अपनो प्रतिज्ञा करोभओ देशमे जा कहिके अढाइ। कहाँ जानके हए कहिके पतए नाए पाएके बो अपनो देश छोडके गओ।

⁹ परमेश्वरको प्रतिज्ञा करोभओ ठाउँमे अब्राहाम बिदेशी कता तम्भु टाँगके बैठो। अब्राहामके सँग बोको लौंणा इसहाक और नतिया याकूब फिर परमेश्वरसे बहे प्रतिज्ञा पाइं और उइसीयए तम्भु टाँगके बैठे।

¹⁰ काहेकी बो हरदम रहान बारो जगमे बनो सहरमे रहानके ताहीं असियात रहए, जोके बनान बारो और निर्माण करन बारो परमेश्वरए हए।

¹¹ बिश्वाससे अब्राहामकी बैयर सारा फिर अपनो उमर ढलको समयमे गर्भधारण करनके शक्ति पाइ। काहेकी परमेश्वर अपनो प्रतिज्ञा पुरा करत हए कहिके अब्राहाम बिश्वास करी रहए।

¹² बुढो हुइके मरनको अवस्थामे अब्राहामसे बादरको तारा कता बहुत और समुन्दरके रेता कता अनगिन्ती सन्तान भए।

¹³ जे सबए आदमी जो परमेश्वरमे भरोसा करीं, बे चिजनके प्राप्त करे बिना मरिगए जोको वादा परमेश्वर करी रहए। पर बे परमेश्वरको भबिष्यमे करन बारो काम बुझके खुसी भए। और बे जा फिर बुझलैं, कि हम जा धर्तीमे परदेशी और अन्जान हएं।

¹⁴ अइसे बात कहान बारे आदमी जा प्रष्ट दिखात हएं, कि बे अपने ताहीं एक देश ढुणरहे हएं, जो उनको होबैगो।

¹⁵ जौन देशसे बे निकरके गए रहएं, बे बहे देशके बारेमे सोँचतए नाए रहे, अगर बे सुँचते कहेसे उनके अपनो देशमे लौटनके मौका मिल्जैतो।

¹⁶ पर बे औ अच्छो देश अर्थात्, एक स्वर्गीय देशको इच्छा करत हएं। जहेमारे, बिनको परमेश्वर हओं कहान बारी बातमे परमेश्वर गर्ब करत रहए, काहेकी बा बिनके ताहीं एक सहर तयार करदइ हए।

¹⁷ बिश्वाससे अपनो परीक्षा होत अब्राहाम अपनो लौंणा इसहाकके बलि चढानके ताहीं तयार रहए। और परमेश्वर अब्राहामसे जा लौंणाके बारेमे प्रतिज्ञा करी रहए तहुँफिर अपनो इकल्लो लौंणाको बलि चढान बो तयार भओ।

¹⁸ परमेश्वर बोसे कही रहए, “मए बचा करोअनुसार इसहाकसे तिर बंश अग्गु बढैगो।”

¹⁹ परमेश्वर आदमीनके मरे भए मैसे फिरसे जिन्दा करन सकत हए कहान बारी बात अब्राहाम सोँची। और एक तरिकासे, इसहाकके मृत्युसे जिन्दा भओ कता फिरसे पाइ।

²⁰ बिश्वाससे इसहाक अपने दुई लौंणा याकूब और एसावको भबिष्यके बारेमे आशिष दइ।

²¹ जब याकूब मरन लागो रहए तओ बिश्वाससे बो योसेफको दुनौको लौंणाके आशिष दइ। और अपनो लट्ठीको सहारा लैके झुकके परमेश्वरको आराधना करी।

²² बिश्वासएके भरमे योसेफ अपना मरन समयमे निर्धक्क हुइके इस्राएल देशमे रहान बारे मिश्रदेश छोडके जामंगे कहिके कही रहए। और मिस्रदेश छोडके जान लगंगे, तओ बो उनके अपनो हड्डी फिर सँगए लैजैयओ कहिके कही रहए।

²³ जब मिश्रदेशको राजा इस्राएलीनको लौंणनके जन्मतए खीना मारनके हुकुम दइ, तओ बिश्वास द्वारए मोशा जन्मनके बाद बक अइयादौवा बोके तीन महिनातक लुकाएके रक्खीं। और बे अपनो बच्चामे कुछ खास बात देखके बे राजाको हुकुम नाए मानके फिर डरए नाए मानीं।

²⁴ मिश्रदेशको राजाकी लौंणीया मोशाके पालि रहए। मोशा बडो हुइके, बिश्वासए द्वारा बो नाए चाही, कि आदमी बोके राजकुमारीको लौंणा कहामएं।

²⁵ एकघरिके ताहीं पापको सुख भोगनसे बरु परमेश्वरके आदमीनके सँग दुख भोगनो मोशा छानी।

²⁶ मिश्रदेशको धनसम्पतिसे ख्रीष्टके ताहीं निन्दित होनके बो महिँगी सम्पति मानी। काहेकी बो अपनो इनाम पानको डगर देखन डटो रहए।

²⁷ राजाको गुस्सासे नाए डराएके बिश्वासए द्वारा बो मिश्रदेश छोडी, काहेकी कठिनाइको सामना करनके बाबजुत फिर बो नाए लौटो। काहेकी बोके अइसो लागत रहए, कि बो अदृश्य परमेश्वरके देखी होए।

²⁸ बिश्वासए द्वारा मोशा इस्राएल देशके आदमीनके फाटकमे बलिको खुन छिर्कनके और यहूदीनको निस्तार तेवहार माननके आज्ञा दइ। ताकी बणे लौंणनके बिनाश करन बारो दूत, इस्राएलके बडो लौंणनके छुइ नाए पाबए।

²⁹ बिश्वासएके भरमे इस्राएल देशके आदमी सुक्खा जमिनमे नेँगो कता लाल समुन्दर पार करीं। पर मिश्रदेशमे रहान बारे आदमी उइसी करके समुन्दर पार करन कोसिस करत पेती डुबके मरिगए।

³⁰ इस्राएल देशके आदमी परमेश्वरमे बिश्वास करोके कारणसे सात दिन तक यरीहो सहरके पर्खालके परिक्रमा करत पेती पर्खाल भतक्गए।

³¹ बिश्वासएके भरमे राहाब वेश्या होएसे फिर परमेश्वरको आज्ञा नाए मानन बारेनके सँग नाश नाए भइ। काहेकी लुक्के यरियो सहर देखनके गएभए इस्राएल देशके जासुसनके बो शान्तिसे स्वागत करी।

³² जासे जद्धा मोके कहान जरुरी नाए हए। काहेकी गिदोन, बाराक, शिमशोन, यिप्ता, राजा दाऊद, शमूएल अगमबक्ता जैसे आदमी और अगमबक्तनके बारेमे कहातए रहानके मेरे ठिन समय नाए हए।

³³ बिश्वासए द्वारा बे राज्य कब्जा करीं और न्यायके साथ राज्य करीं। परमेश्वरसे प्रतिज्ञा करीभइ बातके फिर पाइं। बघटा फिर उनके नाए खाइं।

³⁴ और आगी उनके नाए जलाए पाइ, तरबार उनके नाए काटपाइ। बे कमजोर रहएं और मजबुत हुइगए। युद्धमे शक्तिसे लडके अपने सबए दुश्मनको फौजके भगाइं।

³⁵ बिश्वासएसे कुछ बैयर अपने मरे भए आदमीनके जिन्दा पाइं। कितने आदमी त मार खातए-खात मरिगए, पर बे जेलसे छुटनके ताहीं अपनो बिश्वास त्यागन नाए मानीं, ताकी बे मरके फिरसे जिन्दा हुइके औ अच्छो जीबन पाए सकएं।

³⁶ कितने आदमीनके गिल्ला सहान पणो, कोर्रा खान पणो और कितने आदमीनके बँधके कैदी होन पणो।

³⁷ बिन मैसे कुछ आदमीनके पत्थर मारेके मारडारीं। कुछ आदमीनके आरासे चिरके दुई तुक्डामे काटीं, कुछके तरबारसे मारीं। कुछ आदमी गरीब रहएं और बिनके कष्ट दइं और उनके सँग गलत ब्यबहार करीं। और बे भेंणाबक्राके खलरी लगाएके इतएउतए फिर्तरहात रहएं।

³⁸ जा खराब संसार बे बिश्वासीनके ताहीं योग्यको नाए रहए। बे मरुभूमि, पहाड, गुफा और पृथ्वीके झज्झा होतए उनके घुम्तए रहान पणत रहए।

³⁹ बे सबए, बिश्वास करेभएके कारणसे परमेश्वर उनसे खुसी रहए करके दिखाइ, तहुँफिर परमेश्वर उनसे प्रतिज्ञा करीभइ बात बे कोइ नाएपाइं।

⁴⁰ काहेकी परमेश्वरके ठिन उनके ताहीं इकल्लो नाए, पर हमर ताहीं फिर एक असल योजना हए। परमेश्वर उनके हमसे इकल्लो सिद्ध बनानके चाँहत हए।