हिब्रू 10 - राना थारु नयाँ नियम

ख्रीष्टको बलि सदादिनके ताहीं

¹ मोशाको नियम कानुनमे भओ पुराने नियम, आन बारो समयको छहीं इकल्लो हए, ख्रीष्ट हमरे ताहीं करोभओ अच्छो चीजको वास्तबिकता नाए हए। पुरानो नियममे बलि घरि-घरि और साल-सालमे चढान पणत रहए, पर बे परमेश्वरको आराधना करन आएभए आदमीनके पुरा रुपसे शुद्ध नाए करपात रहए।

² अगर मोशाको नियम कानुन बिनके सिद्ध बनाए पैतो कहेसे बलि चढान बारो काम बन्द हुइजैतो। परमेश्वरको आराधना करन बारे आदमी अपनो पापसे नेहात्तओ शुद्ध हुइते, और बे पापको दोषी भओ महसूस नाए करते।

^3-4 पर सच्चो बात जा हए, कि उनको चढाओ भओ बो बलि हर साल उनके पापको दोषी हएं कहिके याद करबात रहए। काहेकी बर्धा और बक्राको खुन पाप करेभए आदमीनको दोषके नाए मिटाए पात हए।

ख्रीष्टको बलिदान पुग्नो

⁵ जहेमारे संसारमे आत पेती ख्रीष्ट परमेश्वरसे कही, “आदमीनसे, तुम बलिदान और भेँटी नाए चाहे, पर तुम मोके बलिदानके ताहीं शरीर दए हओ।

⁶ होमबलिनमे और पापबलिनमे तुम खुसी नाए भए।

⁷ तओ ख्रीष्ट परमेश्वरसे कही, ‘हे परमेश्वर, पबित्र-शास्त्रमे मेरे बारेमे लिखो कता तुमरी इच्छा पुरी करन मए आओ हओं।’”

⁸ मोशाको नियम कानुन जा सिखात हए, कि पापके कारण बलि और भेँटी चढानके जरुरी हए। पर ख्रीष्ट काहे जे बातनको उल्लेख करी और कही, कि परमेश्वर बे चीज नाए चाँहत हए?

^9-10 और पिच्छु बा अइसे कही, “हे परमेश्वर, तुमरीयए इच्छा पुरा करनके मए आओ हओं।” और परमेश्वरको इच्छा अनुसार, येशू ख्रीष्ट अपनी शरीरके एकए चोटी बलिके रुपमे चढाइ, जाके द्वारा, परमेश्वर हमके पबित्र बनाइ। अइसियए करके ख्रीष्ट सुरुको करारके बलिके खारेज करत हए, ताकी बा दुस्रो करारके सुरु कर पाबए।

¹¹ और पुजारी रोजए दिन बेदीके अग्गु ठाणके आदमीनको दोष मिटानके ताहीं अइसो रितीरिबाज करत हएं। बे लगातार एकए मेलको बलिदान चढाए करत हएं, जौन कभी फिर पाप मिटाए नाए पातहए।

¹² पर ख्रीष्ट अपनो शरीर आदमीनको पाप उठाए लैजानके ताहीं एकए चोटी बलि भओ, जो सदामानके ताहीं प्रभावशाली हए। जा काम निभटके पिच्छु बा परमेश्वरको दहिना हात घेन उँचो सम्मानके ठाउँमे बैठो।

^13-14 ख्रीष्ट अपनो शरीर बलिदानके रुपमे एकए चोटीमे परमेश्वरके दइ, और जहेमारे बाके आदमी पबित्र भए हएं, और बे सदा दिनके ताहीं नेहात्तओ धर्मी भए हएं। और परमेश्वर बाके दुस्मनके बाको पाउँमे नाए लान तक ख्रीष्ट आज फिर हुनै असियाए रहोहए।

¹⁵ पबित्र आत्मा फिर, जा सत्य हए कहिके हमके गवाही देतहए; काहेकी परमेश्वर पहिले कही रहए,

¹⁶ “बे दिन पिच्छु बिनके सँग बाँधन बारो मिर करार जहेहए, परमप्रभु कहात हए, कि बिनको ह्रदयमे मए मिर नियम कानुन धरदेहओं, और बिनके मनमे फिर मए बो लिख्देहओं।”

¹⁷ परमप्रभु फिरसे कहात हए, “बिनको पाप और बिनके दुष्ट काम मए अब नाए सम्झंगो।”

¹⁸ और परमेश्वर हमर पाप और खराब काम क्षमा करत हए। और अब कुछु फिर बलिदान चढानके जरुरी नैयाँ।

कोसिस करनके सल्लाहा

¹⁹ जहेमारे हे बिश्वासी ददाभइया और दिदिबहिनियओ, येशू हमर ताहीं अपनो जीबन खुनको बलिदान करके कारणसे हम स्वर्गको महापबित्र ठाउँमे सहाससे घुस पातहएं।

²⁰ जब ख्रीष्ट मरो, तओ बा हमके अनन्त जीबन देनके नयाँ डगर खोलदइ। बा पर्दासे छिरके डगर खोली, बोको अर्थ जा हए, कि बा एक बलीके रुपमे अपनएके चढाएके अइसे करी।

²¹ और परमेश्वरके आदमीनमे राज्य करन बारो हमर सँग एक जनै महान पुजारी भओके कारणसे,

²² बा अपनो खुन द्वारा हमर मनके पबित्र बनाइ, ताकी हमके पता होबए, कि हम अब दोषी नाए हएं। बा हमके पबित्र बनाइ हए कहिके दिखानके ताहीं हमर शरीरके पानीमे धोइ। बहेमारे मेरे भइयओ, अपने पुरा मन और मजबुत बिश्वाससे परमेश्वर ठिन जामएं।

²³ हम जो आसरा करेहएं बोके मजबुतसे पाकणे रहमएं, काहेकी बाको करोभओ प्रतिज्ञा बा पुरा करैगो कहिके हम परमेश्वरमे बिश्वास करपामएं।

²⁴ हम एकदुस्रेनके प्रेम और भलाइ करनकी बातमे एकदुस्रेके उत्सहा करे रहामएं।

²⁵ कित्नोनके संगतीमे नाए जानके बानी होत हए, पर हम एकए सँग इकट्ठा होनके नाए छोडएं। पर हमएं एकदुस्रेके उत्सहा और चेतावनी देन पणत हए। काहेकी हम जानत हएं, कि प्रभु जल्दीए फिरसे लौटके आनडटो हए।

²⁶ हमके बे काम करन पणत हए, और अगर अच्छो समाचारको सच्चाई पता पाएके फिर हम जानबुझके पाप करे कहेसे, हमर पाप उठाए लैजानके ताहीं औ कुछु बलि नैयाँ।

²⁷ पर बे, परमेश्वरको न्यायके ताहीं डरातए आसरा करन पणत हए, और बे बाको दुश्मन होनके कारणसे पज्रत आगिमे भसम हुइ जामंगे।

²⁸ मोशाको नियम कानुनके नाए मानन बारो आदमीनके, दुई या तीन जनै साक्षी हएं कहेसे बो आदमीके बिना दयाको मरन पणत हए।

²⁹ अगर मोशाको नियम कानुन अनुसार सजाय उइसीयए रहए कहेसे, जौन परमेश्वरको लौंणाके स्वीकार नाएकरैगो बोके औ जद्धा सजाय होबैगो। बो परमेश्वरको लौंणाको पाउँसे कुल्चदइ हए, जौनके बो आदर नाए करत हए। बो ख्रीष्टको खुनके अशुद्ध मानत हए, जौन परमेश्वर बोके पबित्र बनानके ताहीं नयाँ करार सुरु करी। बो पबित्र आत्माके अपमान करी, जोसे बो अनुग्रह पाइ रहए।

³⁰ बिनके बहुत कडा दण्ड दओ जाबैगो, काहेकी जे बात परमेश्वर कही हए। बा कही, “बदला लेनको काम मिर हए, दण्ड मए देमंगो।” अइसो फिर कहोगओ हए, “परमेश्वर अपने आदमीनको न्याय करैगो।”

³¹ जिन्दा परमेश्वरको हातसे सजाय पानके बहुत डर लगन बारी बात हए।

³² सुरुको दिनके सम्झओ जब तुम ख्रीष्टके बारेमे सुरुक चोटी सिखे रहओ। याद करओ, कि तुम कैसे इमान्दार रहे, जबकी डर लगन बारो दुख रहए।

³³ कितने चोटी तुम बेज्जत और कष्ट सहातए सबए आदमीके अग्गु तुम हेल्हा भए और कितने चोटी अइसे दुख पान बारेनके सँग सामिल होनके ताहीं तयार भए।

³⁴ कैदीनके उपर तुम दया दिखाए, अपनो सम्पति लुटत पेती फिर आनन्दसाथ सहे, काहेकी तुम जानत रहओ, कि तुमर सँग अभौफिर परमेश्वरसे प्रतिज्ञा करेभए चीज हएं, जौन औ जद्धा उत्तम हएं और सदामानके ताहीं रहिरहामंगे।

³⁵ जो होएसे फिर प्रभुमे भरोसा करन बारो हिम्मत मत् छोडओ। याद करओ, कि जा तुमर ताहीं बडो इनाम लाबैगो।

³⁶ तुमके बिश्वासमे स्थिर रहिके आसरा देखन जरुरी हए। तओ तुम परमेश्वरको इच्छा पुरा करपाबैगे और परमेश्वरसे प्रतिज्ञा करेभए सबए चीज पाबैगे।

³⁷ काहेकी पबित्र-शास्त्रमे लिखो हए, “अब एकघरिमे आन बारो जरुर आबैगो, और देर नाए करैगो।”

³⁸ “जो परमेश्वरमे भरोसा करैगो, बोके परमेश्वर धर्मी ठहिराबैगो, और बे कभी नास नाए होन बारोको जीबन पाबैगो। और अगर बो मोके अस्वीकार करैगो कहेसे तओ मए बोसे खुसी नाए होमंगो।”

³⁹ पर हम परमेश्वरके इन्कार करन बारे और नाश होन बारेन मैसे नाए हएं। पर हम बे आदमीन मैसे हएं जो बिश्वासे प्राण बचाएगए हएं।