हिब्रू 1 - राना थारु नयाँ नियम

स्वर्गदूतसे जद्धा लौंणा महान

¹ प्राचीन कालसे हमर दौवा पुर्खनके सँग अगमबक्तनसे बहुत चोटी और कैयौं मेलसे परमेश्वर बोली रहए।

² पर जा आखिरी दिनमे बा अपन लौंणाके द्वारा हमसे बोली हए। परमेश्वर अपन लौंणा द्वारा संसारको सृष्टि करीहए और परमेश्वर अपन लौंणाके सब बातको जिम्मा देनके ताहीं बाके छानी।

³ बा परमेश्वरको महिमाको प्रतिबिम्ब और परमेश्वर जैसो स्वभाबको सित्माओंको प्रतिरुप हए, और सब बिश्वके अपन शक्तिशाली बचनसे सम्हारत हए। जब ख्रीष्ट आदमीनको पापके क्षमा करोजाए कहिके अपन काम खतम करी, तओ जाएके बा महिमित परमेश्वरको दहिना हात घेन स्वर्गमे उच्च आदरको ठाउँमे बैठिगओ।

येशू स्वर्गदूतनसे महान

⁴ तभीमारे परमेश्वर अपन लौंणाके स्वर्गदूतनसे फिर बडो नाउँ दइ, जोसे हम जान सकत हएं, कि परमेश्वरको लौंणा स्वर्गदूतनसे औ जद्धा बडो हए।

⁵ कोइ स्वर्गदूतनके परमेश्वर अइसे नाए कही, “तए मिर लौंणा हए, आज मए घोषणा करत हओं कि तए मेरो लौंणा हए।” और बोके पिच्छु बा अपन कोइ फिर स्वर्गदूतके अइसे नाए कही, “मए बोको दौवा होमंगो, और बो मिर लौंणा होबैगो।”

⁶ और परमेश्वर अपन बडो लौंणाके संसारमे पठानसे अग्गु बा फिरसे कही, “मिर सब स्वर्गदूत बाके आराधना करएं।”

⁷ स्वर्गदूतनके बारेमे परमेश्वर कहात हए, “मिर इच्छा अनुसार मए स्वर्गदूतनके हावा कता, और आगीको ज्वाला कता बनाए सकत हओं।”

⁸ पर अपन लौंणाके बारेमे परमेश्वर कहात हए, “हे परमेश्वर, तुमर राज्य सदासर्वदाके ताहीं रहाबैगो, और तुम अपनो राज्यमे न्यायसे राज्य करैगे।

⁹ ठिक काम करनके तुमके मन पणत हए, और खराब कामके तुम घृणा करत हओ। बहेमारे मए, तुमर परमेश्वर तुमके तुमर, सँगीन मैसे छानो हओं। मए तुमके बडो आनन्दसे अलग करो हओं।”

¹⁰ परमेश्वर अपन लौंणाके बारेमे अइसो फिर कही हए, “हे प्रभु, सुरुवातमे तुम संसारके सृष्टि करे, और बादरमे भए सब चीजके तुम बनाए।

¹¹ बे त नाश हुइ जामंगे, पर तुम सदासर्वदा जिन्दा रहे रहाबैगे। बे लत्ता कता पुराने हुइ जामंगे,

¹² चदरा कता उनके तुम लपेटत हओ, लत्ता बदले कता बे बदल जामंगे। पर तुम कब्ही नाए बदलत हओ, और तुम सदासर्वदा जिन्दा रहे रहाबैगे।”

¹³ परमेश्वर कभु कोइ स्वर्गदूतनसे अइसे नाए कही, “तए मिर दहिना हात घेन साम्मनको ठाउँमे बैठ, जब तक मए तिर दुश्मनके पुरा रुपमे तिर अधिनमे नाए लियामओं”

¹⁴ स्वर्गदूतनको उदेश्य का हए तओ? बे त परमेश्वरको सेवा करन बारे इकल्ले हएं। परमेश्वर बिनके मुक्ति पान बारेनके रेखदेख करनके ताहीं पठात हए।