गलातियों 6 - राना थारु नयाँ नियम

सबके सँग भलाइ करएं

¹ हे मेरे बिश्वासी ददाभइयओ, तुम जो पबित्र आत्मासे अगुवाई करे जातहओ, तुमके अइसो करनके चाहो: अगर कोइ बिश्वासी पाप करी हए, तओ तुम मैसे कोइके पबित्र आत्माको अगुवाई हए कहेसे नम्रतासे बोके सही डगरमे लौटाएके लियाबओ। और अपना फिर होसियार रहाबओ, ताकी तुम फिर परीक्षामे नाए पणओ।

² हम मैसे जो फिर दु:खमे होए, तओ एक-दुस्रेके मदत करन चाहो, और अइसियए हम ख्रीष्टको नियम कानुनके पालन करत हएं।

³ अगर कोइ सोँचत हए, कि बो अगुवा हए, पर अगर बो सचमे अगुवा नाए हुइहए कहेसे बो अपनएके धोखा दइ रहो हए।

⁴ हर आदमी अपनो कामके जाँच करएं, कि “का हम अच्छे हएं?” अगर बो अच्छो काम करीहए, कहेसे बो अपनो काममे घमण्ड कर सकत हए। पर बोके अपनो कामको तुलना दुस्रे आदमीनसे नाए करन चाहो।

⁵ काहेकी हम मैसे सब जनै अपनो ब्यबहारको जिम्मेदार अपनए हएं।

जीबन एक खेत बोनो जैसो हए

⁶ बचनको शिक्षा पान बारे सबए, अपन सब असल चीज, बचन सिखान बारोसे बाँटचुट करन पणत हए।

⁷ अपनए-अपनएके धोखा मतदेओ, कोइ कभी फिर परमेश्वरके मुरख नाए बनाए पाबैगो, काहेकी आदमी जो कुछ फिर बोतहए, बहे काटत हए।

⁸ अगर कोइ आदमी अपनो शारिरीक इच्छाके पुरा करत हए, तओ बो मृत्यु पाबैगो। तओ जौन बो इच्छाके पुरा करत हए, जो पबित्र आत्मा चाँहत हए, बोके कभी फिर नाश नाए होन बारो जीबन मिलैगो।

⁹ हम भले काम करनमे निरास नाए होमएं, अगर हम कभी हार नाए मानंगे तओ परमेश्वरके समयमे इनाम पामंगे।

¹⁰ जहेमारे जहाँ तक मौका मिलए, हम सब आदमीनके सँग भलाइ करएं; खास करके सँगी बिश्वासीनके ताहीं।

अन्तिम चेतावनी और शुभकामना

¹¹ देखओ, मए तुमके अपनुवए हातसे कित्नो बणे-बणे शब्दमे लिखो हओं।

¹² यहूदी आदमीनके खुसी बनानके ताहीं बे तुमके खतना करनके दबाब करत हएं। बे जा करत हएं, ताकी ख्रीष्ट येशू क्रूस मरो, जा बातमे बिश्वास करके इकल्लो मुक्ति पातहएं करके परचार करनको कारण बिनके नाए सतामएं।

¹³ हियाँतककी बे खतना करेगए बिश्वासी फिर मोशाको नियम कानुनके पालन नाए करत हएं, पर बे चाँहत हएं, कि तुमर खतना करोजाए ताकी बे दुस्रे यहूदी समुहनके अग्गु घमण्डसे जा बताए पामएं, कि तुमर खतना उनके मारे भओ हए।

¹⁴ मेरे ताहीं, मए क्रूसमे हमर प्रभु येशू ख्रीष्टको मृत्युके अलाबा कभी कोइ फिर अन्य बातमे घमण्ड करन नाए चाँहत हओं, काहेकी जो कुछ फिर ख्रीष्ट करीहए, बो कामके करन संसारके कोइ फिर चीजको मोएमे अधिकार नाए हए, और मोएमे अब पृथ्वीके कामन्के रोकनको कोइ इच्छा नाए हए।

¹⁵ काहेकी नए त खतना, और नए त बेखतना कुछु जरुरी नाए हए, पर जरुरी जा हए, कि “का हम नयाँ सृष्टिमे परिबर्तन भएहएं?”

¹⁶ जो कोइ जा नियमके पालन करत हएं, परमेश्वर बे सब इस्राएल देशके आदमीनके उपर दया करए, और बे शान्तिसे रहाएं। बे परमेश्वरके द्वारा चुनेगए हएं।

¹⁷ अब कोइ मोके दुख नाए देए, काहेकी मेरे शरीरमे जो दाग हए, बे दाग जा दिखात हएं, कि मए येशूको एक चुनो भओ चेला हओं।

¹⁸ हे मेरे बिश्वासी ददाभइयओ, मए प्राथना करत हओं, कि हमर प्रभु येशू ख्रीष्टको अनुग्रह तुम सबके सँग रहाबए। आमेन।