गलातियों 5 - राना थारु नयाँ नियम

ख्रीष्टमे स्वन्त्रता

¹ ख्रीष्ट हमके बचाए लइहए, ताकी हमके मोशाको नियम कानुनको पालन करनके ताहीं गुलामी कता जीइनको जरुरी नाए होए; अपनो स्वन्त्रताके पक्डे रहाओ, और नियम कानुनको पालन करनके ताहीं अपनएके फिरसे गुलामी बनन मतदेओ।

² मए पावल, जो तुमके बताए रहो हओं, बोके सुनओ, कि अगर परमेश्वरके अग्गु धर्मी ठहिराए जानके ताहीं खतना करबाबैगे, तओ ख्रीष्ट जो करीहए, बोसे तुमके कुछु फिर फाइदा नाए होबैगो।

³ मए एक चोटी फिरसे तुमके कडासे कही रहो हओं, कि हर आदमी जो अपनो खतना करबात हए, बोके पुरा यहूदी समुहको नियम कानुनके पालन करनके चाहो।

⁴ तुम जो मोशाको नियम कानुनके पालन करनके धर्मी ठहिरन चाँहत हओ, तुम अपनएके ख्रीष्टसे अलग कररहे हओ, और परमेश्वरको अनुग्रहके स्वीकार करनसे इन्कार करदए हओ।

⁵ मए अइसे कहे सकत हओं, काहेकी हमके पबित्र आत्माके घेनसे पुरा आसरा हए, कि परमेश्वर हमके धर्मीके रुपमे स्वीकार करैगो, काहेकी हम ख्रीष्टमे भरोसा करत हएं।

⁶ अगर तुम ख्रीष्ट येशूके चेला हओ तओ जा बातसे कोइ फरक नाए पणत हए, कि तुमर खतना भओहए या नाए भओहए, पर जरुरी बात जा हए, कि हम ख्रीष्टके हमर मुक्तिदाताके रुपमे बिश्वास करत हएं। और हम परमेश्वर और दुस्रे आदमीनके प्रेम करत हएं।

प्रेमसे मोशाको नियम कानुन पुरा हुइजानो

⁷ तुम ख्रीष्टके सँग अपने सम्बन्धमे बहुत अच्छेसे उन्नति करत रहओ, अब कौन तुमके रोकदइ, कि सच्चाईके मत् मानओ।

⁸ जा शिक्षा परमेश्वरसे नाए आत हए, जौन तुमके अपनो सन्तान होनके बुलाइ।

⁹ होसियार रहाओ, काहेकी आदमी जो कहात हएं, बो सच्चो हए, कि थोरी खामिर मणो भओ चुनके फुलन बारो बनाए देतहए।

¹⁰ मए परमेश्वरमे भरोसा करत हओं, कि बा तुमके झुठो शिक्षनमे बिश्वास करनसे बचाए रहाबए; पर जो तुमके परेसान करत हए, बो चहुँ कोइ फिर होबए बो परमेश्वरसे दण्ड पाबैगो।

¹¹ हे मेरे बिश्वासी ददाभइयओ, मए परचार करत हओं, कि खतना जरुरी नाए हए, जैसेकी यहूदी समुहको नियम कानुन माँग करत हए और जहेमारे मोके यहूदीनके द्वारा सताओ मिल रहो हए; अगर मए ख्रीष्टको मृत्युके बारेमे परचार करनके छोडके जा परचार करतो, कि आदमीनके खतना करोजान चाहो। तओ मए यहूदी समुहनके ताहीं अपमानको कारण नाए हुइतो।

¹² तुमके झुटो शिक्षा देन बारे आदमी अपनएके नपुंसक बनाए लित्तो कहेसे ठिक हुइतो।

स्वतन्त्रता और भलाइ

¹³ हे मेरे बिश्वासी ददाभइयओ, तुमके परमेश्वरके द्वारा छुटकारा होनके ताहीं बुलाओ गओ रहए, और जहेमारे अब तुमके मोशाको नियम कानुनके पालन करनके जरुरी नाए हए; और अपनी शारीरिक इच्छनके अनुसार चलन बारे मतबनाओ, बल्कि एक-दुस्रेसे प्रेम करओ और एक-दुस्रेको सेवा करओ।

¹⁴ काहेकी सब नियम कानुनको निष्कर्ष एक बचनमे पुरो भओ हए, “तए अपनो परोसीसे अपनए कता प्रेम करिए।”

¹⁵ पर अगर तुम लगातार एक-दुस्रेसे लणत रहात हओ, और एक-दुस्रेके परेसान करतए रहात हओ कहेसे होसियार रहओ, तुम एकदुस्रेके बर्बाद मत् करओ।

पबित्र आत्मा और आदमीको स्वभाब

¹⁶ पर मए तुमसे कहात हओं, कि तुमके पबित्र आत्माको अगुवाईके अनुसार जीइनके जरुरी हए, तओ तुम बे खराब कामनके नाए करैगे, जो तुमर शारीरिक इच्छा करन चाँहत हए।

¹⁷ काहेकी बे चीज जो हमर शारीरिक इच्छा करन चाँहत हए, बे बेहीं चीज हएं, जो पबित्र आत्मा नाए चाँहत हएं, कि हम करएं। और अइसियए, पबित्र आत्मा हमसे बहे काम करबान चाँहत हए, जो हमर शारीरिक इच्छा नाए चाँहत हए, कि हम करएं, और जे दुनौ शक्ति लगातार एक-दुस्रेसे लणत रहात हएं; जहेमारे बे हरदम बो अच्छो काम नाए करपात हएं, जो तुम करन चाँहत हओ।

¹⁸ और अगर तुम पबित्र आत्माको अगुवाईके अनुसार चलत हओ, तओ मोशाको नियम कानुनके अधीनमे मत् रहाओ।

¹⁹ तुम सब जानत हओ, कि जो आदमी अपनी इच्छनके पिच्छु चलत हएं, बे जेहिं काम करत हएं, बे व्यभिचार करत हएं, अशुद्ध सोच-बिचार करत हएं, छाडा होत हएं।

²⁰ बे मूर्तिपुजा पुजत हएं, जादु-टोना करत हएं, अपने सँगीसे घृणा करत हएं, एक-दुस्रेसे लडाइ करत हएं, बे बेहीं चीजके पान इच्छा करत हएं जो दुस्रे आदमीनके ठिन हए। बे जल्दी गुस्साए जात हएं, अपने डगर निकारनके ताहीं दुस्रे आदमीनके तरे गिरात हएं, बे उइसे आदमीनके अस्वीकार करदेत हएं जोसे बे असहमत हएं, और सिर्फ उइसे आदमीनके सँग लगत हएं जोसे बे सहमत हएं।

²¹ बे एक-दुस्रेसे जलत हएं, दरुके नसामे होत हएं, अनैतिक मौजमजा और अइसियए सब मेलके खराब काम करत हएं। मए तुमके चेतावनी दइ रहो हओं, जैसे मए पहिले फिर तुमके चेतावनी दओ रहओं, कि अइसे-अइसे काम करन बारे आदमी परमेश्वरके राज्यको उत्तराधिकारी नाए होमंगे।

²² जब पबित्र आत्मा हमके अगुवाई करत हए, तओ बा हमके प्रेम करनके, आनन्दित रहानके, शान्तिमे रहानके, धिरज करनके, दया दिखानके, भलाइ करनके, भरोसा करनके,

²³ नम्रतामे रहानके और अपनएके अधिनमे करनके लायक बनात हए; अइसो कोइ नियम कानुन नाए हए, जो अइसियए चरित्रके बिरोध करत होए।

²⁴ और बे आदमी जो उद्धारकर्ता येशू ख्रीष्टसे सम्बन्धित हएं, बे अपने जीबनके पापमय खराब इच्छा और अभिलाषनके सँग क्रूसमे चढाए दइ हएं।

²⁵ काहेकी परमेश्वरको आत्मा हमके एक नयाँ जीबन दइ हए, जहेमारे आओ, हम अपने जीबनके सब क्षेत्रमे आत्माको अगुवाईमे जिमएं।

²⁶ हम एक-दुस्रेके सँग घमण्ड करन बारे, गुस्सा करन बारे और ईर्ष्या करन बारो काम नाए करन पणतहए।