गलातियों 3 - राना थारु नयाँ नियम

बिश्वासके द्वारा धार्मिकता

¹ हे गलातिया परदेसके बिश्वासीउ, कोइ जरुर तुमके भणकाए दइ हए। मए तुमके अच्छेसे सम्झाओ हओं कि येशू ख्रीष्टके क्रूसमे टाँगनको कारण का रहए।

² मए तुमसे एक प्रश्न पुँछन चाँहत हओं; का तुम पबित्र आत्मा, मोशाको नियम कानुनके पालन करके मिलो? नाए! बिरकुल नाए! तुमके पबित्र आत्मा मिलो काहेकी तुम बहे सन्देशमे बिश्वास करे जो तुम ख्रीष्टके बारेमे सुने।

³ का तुमर दिमाक नाए हए, का तुम पबित्र आत्माके द्वारा ख्रीष्टके सँग अपनो नयाँ जीबन सुरु नाए करेहओ? का तुम अपनी शक्तिसे अपनो जीबनके अन्त करन चाँहत हओ?

⁴ का तुमर सब दु:ख बेकार हुइगए? मए नेहात्तओ आसरा करत हओं, कि जा बेकार नाए होए।

⁵ परमेश्वर अब खुल्ला मनसे तुमके अपनो पबित्र आत्मा देतहए, और तुममे चमत्कारको काम करत हए, का जा जहेमारे हए, कि तुम मोशाको नियम कानुनके पालन करे? या जा जहेमारे हए, कि तुम ख्रीष्टके बारेमे अच्छो समाचारके सुने और बोमे बिश्वास करे?

⁶ अब अब्राहामके बारेमे सोँचओ, “बो परमेश्वरमे बिश्वास करत रहए, और जा बोके ताहीं धार्मिकता गिनोगओ रहए।”

⁷ तुमके जा सम्झन चाहो, कि जौन आदमी अब्राहाम कता परमेश्वरमे भरोसा करत हएं, बे अब्राहामके सन्तान हएं।

⁸ और परमेश्वर पबित्र-शास्त्रमे बहुत पहिले कही हए, कि परमेश्वर गैर-यहूदीनके बिश्वासके द्वारा अच्छो समाचारसे धर्मी ठहिराबैगो, जा होनसे पहिलीए परमेश्वर अब्राहामके जा अच्छो बचनके पबित्र-शास्त्रमे बताए दइ रहए, कि “तेरे द्वारा, सब जातिके आदमी आशिष पामंगे।”

⁹ परमेश्वर अब्राहामके बोको बिश्वासके मारे आशिष दइ, उइसीयए जो कोइ फिर येशू ख्रीष्टमे बिश्वास करत हए, बो नेहात्तओ अब्राहामके सँग परमेश्वरसे आशिष पाबैगो।

मोशाको नियम कानुन द्वारा सराप

¹⁰ जहेमारे जो आदमी जा सोँचत हएं, कि बे मोशाको नियम कानुनको किताबको पालन करके परमेश्वरके सँग सही ठहिराए जामंगे, नाए! बे एक सरापके अधीनमे हएं। काहेकी मोशाको नियम कानुनमे जा लिखो हए, “जो कोइ मोशाको नियम कानुनके सब पालन करनके छोडत हए, बो सरापित हए।”

¹¹ पर जा नेहात्तओ हए, कि मोशाको नियम कानुन पालन करनेसे कोइ फिर परमेश्वरके अग्गु धर्मी नाए ठहिराओ जाए सकत हए, पर जो कोइ फिर परमेश्वरमे भरोसा करत हए, परमेश्वर बोके धर्मी ठहिरात हए, और बो कभी फिर नाश नाए होन बारो जीबन पाबैगो।

¹² पर मोशाको नियम कानुनको नियम पालन करके जीइनो और परमेश्वरमे भरोसा करके जीइनो एक बरोबर नाए हए; जैसेकी पबित्र-शास्त्रमे लिखो हए, “जो आदमी मोशाको नियम कानुनके बातबैगो और पालन करैगो, बोके जाको पालन करनके द्वारा जीबन मिलैगो।”

¹³ पर ख्रीष्ट हमके बो सरापसे बचाइ हए, जो नियम कानुन लात हए। जब क्रूसमे ख्रीष्टको मृत्यु भओ, तओ बा हमरे पापसे आन बारो सराप अपने उपर लैलै और हमके छुटकारा दइ। काहेकी पबित्र-शास्त्रमे जा लिखो हए, “जो कोइ फिर क्रूसमे मरत हए, बो सरापित हए।”

¹⁴ ख्रीष्ट अइसो जाकेमारे करी, ताकी गैर-यहूदीनके बहे आशिष मिलए, जौनको प्रतिज्ञा परमेश्वर अब्राहामके सँग येशू ख्रीष्टके द्वारा करी रहए, और ख्रीष्टमे बिश्वासके द्वारा, हम परमेश्वरको आत्मा पामएं, जौनको परमेश्वर हमके देनके प्रतिज्ञा करी रहए।

मोशाको नियम कानुन और बाचा

¹⁵ हे मेरे बिश्वासी ददाभइयओ, मए साधारण जीबनसे उदाहरण दइ रहो हओं। जब दुई आदमी एक समझौता करत हएं, और बे जाको प्रमाणित करत हएं। तओ अइसो कोइ फिर नाए हए, जो बो समझौताके बदल पाबए।

¹⁶ अइसियए, परमेश्वर अपनो प्रतिज्ञा अब्राहाम और अपने सन्तानके सँग करी; पबित्र-शास्त्रमे जा नाए लिखो हए, “और बोको सन्तानसे,” पर जा एक आदमीके बारेमे बात करत हए, जब जा कहात हए कि “संसारके सब आदमी तिर एक सन्तानके माध्यमसे आशिष पामंगे” और जा आदमी ख्रीष्ट हए।

¹⁷ जौन बात मए तुमके कहान चाँहत हओं बो जा हए, कि परमेश्वर अब्राहामके सँग प्रतिज्ञा बाँधनके चार सओ तीस साल पिच्छु मोशाको नियम कानुन दइ, बो प्रतिज्ञाके प्रमाणित करनके ताहीं जो परमेश्वर करी रहए। पर हम जा नाए कहे सकत हएं, काहेकी अब मोशाको नियम कानुन हए। जहेमारे परमेश्वरको प्रतिज्ञाको कोइ मोल नाए हए। परमेश्वरको बो प्रतिज्ञा अभौफिर बलियो हए, और परमेश्वरके जाके पुरा करनके हए।

¹⁸ काहेकी परमेश्वर तुमके अपनो अनुग्रह जाकेमारे नाए देतहए, ताकी तुम मोशाको नियम कानुनके पालन करत रहओ। पर परमेश्वर जहेमारे अनुग्रह देतहए, काहेकी परमेश्वर जाको प्रतिज्ञा करी रहए। उइसीयए, परमेश्वर अब्राहामके आशिष दइ, काहेकी परमेश्वर अब्राहामसे जाको प्रतिज्ञा करी रहए।

मोशाको नियम कानुनको उदेश्य

¹⁹ परमेश्वर कौन उदेश्यसे इस्राएल आदमीनके मोशाको नियम कानुन दइ? बा त अपराधन्के मारे पिच्छु दइ हए, मोशाको नियम कानुनके तबतक रहिरहान रहए। जबतककी अब्राहामको बो सन्तान नाए आएजाए, जौनको बारेमे परमेश्वर प्रतिज्ञा करी रहए। परमेश्वर अपनो नियम कानुन स्वर्गदूतसे मोशाके दइ, जो परमेश्वर और आदमीनके बीचमे मध्यस्थ रहए।

²⁰ परमेश्वर अपनए अब्राहामके सँग एक बाचा करी रहए। जहेमारे, कोइ मध्यस्थको जरुरी नाए हए।

²¹ का जाको अर्थ जा हए, कि मोशाको नियम कानुन प्रतिज्ञनके बिरुद्ध हए? कभी फिर नाए! काहेकी नियम कानुन हमके कभी फिर नाश नाए होन बारो जीबन देत हुइतो कहेसे हमके जाके पालन करके परमेश्वर सँग धर्मी ठहिराए जाए सकत रहएं।

²² पर पबित्र-शास्त्र कहात हए, कि जा संसारके सब आदमी पापकी शक्तिके अधीनमे हएं। ताकी बो उपहार, जोके परमेश्वर बिश्वासके आधारमे देनके नयाँ करार करी रहए, बो उपहार बेहीं आदमी पामएं जो येशू ख्रीष्टमे भरोसा करत हएं।

²³ पर ख्रीष्टके आनसे पहिले, हमके यहूदीनको कैदमे धरो गओ रहए, और नियम कानुन हमके रखबाली करत रहए। और हमके कैदी कता धरे रहए, जबतककी परमेश्वर जा नाए प्रकट करए कि ख्रीष्ट कौन रहए, और हम बाके उपर बिश्वास करएं।

²⁴ जहेमारे ख्रीष्टके आनतक नियम कानुन हमर डगर दिखान बारो और हमर रेखदेख करनके ताहीं दओ गओ रहए, ताकी हम येशू ख्रीष्टमे बिश्वास करनसे परमेश्वरके अग्गु धर्मी ठहिर पामएं।

²⁵ जबकी हम ख्रीष्टमे अपनो भरोसा धरे हएं, तओ हमर मदत करनके ताहीं और हमके डगर दिखानके ताहीं नियम कानुनकी जरुरत नाए हए।

परमेश्वरको सन्तान

²⁶ “जब तुम ख्रीष्टके नाउँसे बप्तिस्मा लए हओ, और तुम सब ख्रीष्ट येशूमे बिश्वास करनके द्वारा तुम ख्रीष्टको नयाँ जीबनके पैंधलए हओ, जैसे एक आदमी नयाँ लत्ता पैंधलेत हए। जहेमारे तुम ख्रीष्ट येशूमे बिश्वास करे, तओ तुम सब परमेश्वरके सन्तान बनेहओ।

²⁷ और बे सब जो बप्तिस्मा लैडारी हएं, येशू ख्रीष्टके सँग एकतामे हएं, तुम नयाँ ख्रीष्टको जीबनके पैंधलए हओ, जैसे एक आदमी लत्ताके पैंधलेत हए।

²⁸ काहेकी हम सब येशू ख्रीष्टमे अपनो भरोसा धरे हएं, जाकेमारे परमेश्वर हम सबके एक बरोबर देखत हए। जहेमारे ग्रीक भाषा मस्कन बारे समुह और यहूदीमे कोइ अन्तर नाए हए; नए कोइ कमैया, नए छुटकारा बारे; नए कोइ पुरुष, नए बैयर; काहेकी तुम सब येशू ख्रीष्टमे एक हओ।

²⁹ और काहेकी तुम ख्रीष्टके सँग एक हओ, अब तुम अब्राहामके परिवारको हिस्सा हओ, और तुम परमेश्वरसे प्रतिज्ञा करो भओ आशिषके हकदार बनिगए हओ।”