गलातियों 2 - राना थारु नयाँ नियम

येशूसे चुनेभए चेला द्वारा पावलको स्वागत

¹ चौधा बर्ष पिच्छु मए बारनाबासके सँग यरूशलेम सहरमे गओ। और तीतसके फिर सँगमे लैगओ।

² और मए हुवाँ गओ, काहेकी परमेश्वर मोके जानके कही रहए। और जब मए हुवाँ रहओं, तओ मए अगुवनसे व्यक्तिगत रुपसे मिलो, और गैर-यहूदीनके अच्छो समाचारके बारेमे बताओ, ताकी अइसो नाए होए, कि जो मए करत रहओं या जो मए करतए आएरहो हओं, बोको कुछ परिमाण नाए निकरए।

³ पर मिर सँगी तीतस, जोकी एक ग्रीक भाषा मस्कन बारो रहए, बोको खतना कभी फिर नाए भओ रहए। पर यरूशलेम सहरके मण्डलीके अगुवा बोके स्वीकार करीं। बे खतना करबानके ताहीं बोके उपर कोइ दबाब नाए डारीं।

⁴ तीतसके खतना नाए भओके बारेमे एक मुद्दा बनिगओ, जब कुछ झुठे बिश्वासी ददाभइया हमर समुहसे गुप्त रुपसे आए। और हमर उद्धारकर्ता येशूमे भओ हमर स्वतन्त्रताके नाश करनके कोसिस करत रहएं। ताकी बे हमके फिरसे यहूदी समुहको नियम कानुनको गुलाम बनाए पामएं।

⁵ उनके अधीनमे होनके हम अस्वीकार करदए। जहेमारे कि तुम अच्छो समाचारको सच्चाईमे लगातार बने रहाबओ।

⁶ फिर यरूशलेम सहरकी मण्डलीके अगुवा जो सन्देश मए सिखात रहओं, बोके बदलनके ताहीं मोके मजबुर नाए करीं। मोके जा बातसे कोइ फरक नाएहए, कि बे अगुवा कौन हएं।

⁷ पर बे सब अगुवा बुझीगए, कि परमेश्वर जैसे पत्रुसके यहूदी आदमीनके अच्छो समाचार परचार करनके ताहीं छानी रहए, उइसी करके बो हमरे खतना करेभए गैर-यहूदी आदमीनके फिर अच्छो समाचार परचार करनके छानी हए।

⁸ काहेकी परमेश्वर, जौन पत्रुसके खतना करेभए यहूदी समुहके आदमीनके बीचमे एक चुनो भओ चेला होनके ताहीं छानी। बो हमके फिर गैर-यहूदी आदमीनके बीचमे चुनेभए चेला होनके ताहीं छानी।

⁹ और जे आदमी मण्डलीके खास अगुवा सम्झे जात रहएं, अर्थात् याकूब, पत्रुस (केफास) और यूहन्ना, बे कृपाको बो बरदानके पहिचानी जो मोके मिलो हए। बे मोके और बारनाबासके अपनो सहयोगी समझके हमके सहभागिताको दहिना हात दइं। बे जा बातके ताहीं सहमत भए, कि हम गैर-यहूदीके और खतना करेभए यहूदीनके बीचमे अच्छो समाचारके परचार करएं।

¹⁰ बे हमसे सिरफ जा बिन्ती करीं, कि हम यरूशलेम सहरमे गरीब बिश्वासीनके मदत करएं, और जा बहे रहए जोके करनमे मए बहुत खुसी रहओं।

एन्टिओखियामे पत्रुसको मतभेद

¹¹ जब एक दिन केफास सिरिया परदेशको एन्टिओखिया सहरमे आओ, तओ मए बोको सबके अग्गु बिरोध करो, मए अन्य बिश्वासीनके अग्गु बोके डाँटो, काहेकी बो सही काम नाए करत रहए।

¹² पत्रुस गैर-यहूदी बिश्वासीनके सँग खानु खाए करत रहए। जबतककी यरूशलेम सहरसे याकूबके घेनसे पठाए गए कुछ बिश्वासी एन्टिओखिया सहरमे नाए आए, पर जब याकूबके द्वारा पठाए गए कुछ बिश्वासी यरूशलेम सहरसे आए। तओ बो उनके सँग मोल-तोल करन और खानु खान बन्द करदइ, काहेकी पत्रुस बे खतना करेभए यहूदीनको समुहसे डरात रहए।

¹³ और बोके सँग एन्टिओखिया सहरके कुछ यहूदी बिश्वासी फिर कपटीको काम करीं, हियाँतककी बारनाबास फिर उनसे डरात रहए, और गैर-यहूदी समुहके सँग मोल-तोल करन बन्द करदइ।

¹⁴ पर जब मए देखो, कि बे जो करत रहएं, बो अच्छो समाचारको सच्चाईके सँग अन्तर बिरोधमे रहए तओ मए सार्बजनिक रुपसे केफाससे कहो, “तुम एक यहूदी समुह हुइके फिर गैर-यहूदी समुहनको रिति-रिवाजको पालन करत हओ। और यहूदी समुहनको रिति-रिवाजको पालन नाए करत हओ। पर अगर तुम, जोकी एक यहूदी हओ, अइसो करैगे, तओ फिर तुम गैर-यहूदी समुहनके हम यहूदी समुहनको रिति-रिबाजके पालन करनके ताहीं दबाब काहे डारत हओ?”

बिश्वास और काम

¹⁵ तुम और मए जनमसे यहूदी हएं। और बे यहूदी, गैर-यहूदी समुहसे “पापी हएं” कहिके कहान बारी बात नाए हए।

¹⁶ तओ फिर हम यहूदी बिश्वासीनके जानत हएं, कि मोशाको नियम कानुनको पालन करके कोइ फिर आदमी परमेश्वरके नजरमे धर्मी घोषित नाए करोजात हए। जहेमारे येशू ख्रीष्टमे इकल्लो बिश्वास करनके द्वारा धर्मी ठहिरत हए। काहेकी हम मोशाको नियम कानुन पालन करके नाए पर येशू ख्रीष्टमे बिश्वास करनसे धर्मी घोषित करेगए हएं।

¹⁷ काहेकी हम नियम कानुनके बनाइए रखानके अलाबा ख्रीष्टमे भरोसा करनके द्वारा परमेश्वरके सँग सही ठहिरे जात हएं, कुछ यहूदी हमके पापी मानत हएं, का जाको अर्थ जा हए, कि ख्रीष्ट हमसे पाप करबाइ हए? नाए! बिरकुलए नाए!

¹⁸ पर अगर मए बो चीजके घेन लौटके जातहओं जोके मए पहिले अस्वीकार करदओ रहओं, तओ मए सचमे पाप करंगो। अगर जा, कि पबित्र-शास्त्रके बनाए रक्खनके द्वारा एक आदमी परमेश्वरके सँग सही ठहिरो जाए सकत हए।

¹⁹ मए सम्झत हओं, कि मोशाको नियम कानुनको पालन करनसे मोके धर्मी घोषित नाए करोजाए सकत हए। जहेमारे मए अइसो मानत हओं, कि मए पबित्र-शास्त्रके ताहीं मरीगओ, ताकी मए परमेश्वरके ताहीं जिन्दा रहेपामओं।

²⁰ जा अइसो रहए, जैसे मए ख्रीष्टके सँग क्रूसमे मरीगओ, और अब मए जिन्दा नाए हओं, पर ख्रीष्ट मोएमे जीइत हए; जैसे मए अब जिइरहो हओं। अब मए परमेश्वरको लौंणामे भरोसा करके जीइ रहो हओं, जो मोसे इतनो जद्धा प्रेम करत हए, कि बा मेरे ताहीं अपनी ज्यान दइदइ।

²¹ मए जा बातके इन्कार नाए करपामंगो, कि परमेश्वर हमके अपनो अनुग्रहके कारण हमके बचाइ, काहेकी अगर आदमी पबित्र-शास्त्रको पालन करके धार्मिकताके पैते तओ ख्रीष्टके मरन नाए पणतो।