इफिसियों 6 - राना थारु नयाँ नियम

अइयादौवा और बच्चा

¹ ए बच्चओ, अपन अइयादौवाको कहो भओ बात मानओ काहेकी प्रभुमे तुम एकजुट हओ।

² अपने दौवा और अइयाकी आदर करओ। जा प्रतिज्ञा सहितको पहिलो आज्ञा हए।

³ और तुमर जीबन लम्बो होबए और खुसीको जीबन होबए।

⁴ और हे दौवाओ, अपने बच्चनके मत् गुस्सबाबओ पर प्रभुको शिक्षा, और चेतावनी देतए, उनको पालनपोषण करओ।

कामदार और मालिकनके अर्ती

⁵ हे कामदारओ, जो आदमी संसारके अनुसार तुमर मालिक हएं, साबधानीसे उनको आदर, सम्मान करओ, दिखावा मत् करओ और जैसे ख्रीष्टको आज्ञा काँपतए मान्त हओ उइसीयए उनको आज्ञा फिर मानओ।

⁶ तुमके अपन मालिकको आज्ञापालन करन चाहो, तब्ही इकल्लो नाए जब बे तुमके देखत होमएं, पर तुम ख्रीष्टके दास हओ, जहेमारे तुमके अपनो पुरो मनसे बहे करन चाहो जो परमेश्वर चाँहत हए, कि तुम करओ।

⁷ उत्सहाके साथ एक सेवकके रुपमे अइसो काम करओ जैसेकी मानओ तुम आदमीनको नाए बल्कि प्रभुकी सेवा करत हओ।

⁸ काहेकी तुम जान्त हओ, कि जो कोइ जैसो अच्छो काम करैगो, चहुँ दास होए चहुँ स्वतन्त्र आदमी, बोको पुरुस्कार बो प्रभुसे पाबैगो।

⁹ अइसियए हे मालिकओ, तुमके कामदारनके धम्कि नाए देन चाहो, बल्कि तुमके अपनो कामदारनके सँग उइसे ब्यबहार करनके चाहो, जैसे मए उनसे कहो हओं, कि बे तुमरसँग ब्यबहार करएं। काहेकी तुम जान्त हओ, कि उनको और तुमर दुनौको मालिक स्वर्गमे हए, और बा कोइको पक्षपात नाए करत हए।

परमेश्वरके हात-हथियार

¹⁰ तुमर ताहीं मिर अन्तिम सब्द जा हए, कि आत्मिक रुपसे प्रभुको शक्तिशाली सामर्थसे मजबुत बनओ।

¹¹ जैसे एक सिपाही अपने सब युद्धके हथियारन्के पैँधत हए, उइसीयए तुमके फिर बे चिजनके प्रयोग करनके पणो, जो परमेश्वर तुमके दइ हए, ताकी जब शैतान तुमके धोखा देन कोसिस करए, तओ तुम बोके बिरुद्ध लडपाबओ।

¹² काहेकी हमर जा युद्ध आदमीनके बिरुद्ध नाए लडरहे हएं पर अधिकारीन्से और जा संसारके अन्धकारके सासकन्से और खराब आत्मिक शक्तिन्से हए, जो बादरमे हए।

¹³ जहेमारे परमेश्वरके सब हथियार बाँधलेओ ताकी जब खराब दिन आएं तओ जो कुछ सम्भब हए, बोके करडारन्के पिच्छु, तुम पक्कोसे स्थिर रहिपाबओ।

¹⁴ जहेमारे परमेश्वरको सच्चाईके अपनो करह्याँओँमे बेल्टके कता बाँधलेओ और जैसे लोहाके बनेभए कबच कोइ सैनिककी लडाइमे रक्षा करत हए, उइसीयए जब शैतान तुममे हमला करए तओ तुमर धर्मी ब्यबहार तुमर रक्षा करैगो।

¹⁵ परमेश्वरके सँग जो हमर शान्ति हए बोके बारेमे बतान बारो अच्छो समाचारमे भरोसा करओ, ताकी तुम मजबुत होनके ताहीं तयार रहिपाबओ। जा एक सैनिक कता होबैगो, जो अपने जुता पैंधके लडन्के ताहीं तयार हुइजात हए।

¹⁶ जैसे एक सैनिक ढाल लैके अपने उपर आन बारो सत्रुनको तिरसे अपनएके बचात हए, उइसीयए ख्रीष्टमे मजबुत बिश्वास करओ, ताकी ख्रीष्ट तुमके शैतान द्वारा नुक्सान पुगानसे बचाबए।

¹⁷ जैसे एक सैनिक अपने मुणके, लडाइमे बचानके ताहीं टोप लगाए होतहए, उइसीयए परमेश्वर तुमके शैतानसे बचाबए। जैसे एक सैनिक अपनएके बचानके ताहीं एक तरबार लेतहए, उइसीयए अपनएके बचानके ताहीं परमेश्वरको बचनके प्रयोग करए। जाके पबित्र आत्मा तुमके देतहए।

¹⁸ और हमके उइसीयए प्राथना करन चाहो जैसे पबित्र आत्मा हमके अगुवाई करत हए। और जगतए रहाओ और पबित्र आदमीनके ताहीं लगातार प्राथना करओ।

¹⁹ और मेरे ताहीं फिर प्राथना करके परमेश्वरसे कहियओ, कि बा मोके मस्कनके ताहीं सही शब्द देबए ताकी मए बिना डरको अच्छो समाचारके बारेमे जो सब आदमीनके ताहीं हए, बोको रहस्य परचार करपामओं।

²⁰ जाके ताहीं मए साँकरसे बँधो एक राजदूत कता सेवा कररहो हओं। प्राथना करओ, कि जैसे मोके मस्कन चाहो, उइसीयए बिना डरसे अच्छो समाचारके परचार करपामओं।

अन्तिम नमस्कार

²¹ प्रभुको संगतीमे, प्यारे बिश्वासी भइया और बिश्वासिलो सेवक तुखिकस तुमके जा सब बताएदेमंगे, ताकी तुम फिर जानलेओ कि मए कैसो हओं और का कर रहो हओं।

²² बोके मए तुमर ठिन जाकेमारे पठाओ हओं कि तुमके हमर हालचाल पता होबए, और बो तुमके प्रोत्साहित कर्पाबए।

²³ मए हमर दौवा परमेश्वरसे और प्रभु येशू ख्रीष्टसे प्राथना करत हओं, कि बे तुम बिश्वासी ददाभइयनके शान्ति देमएं। बे अइसे करएं, कि अपनए एकदुस्रेसे प्रेम करएं और ख्रीष्टमे निरन्तर बिश्वास करतए रहाएं।

²⁴ परमेश्वर बे सबके अनुग्रह दिखाबए जो हमर प्रभु येशू ख्रीष्टसे प्रेम करत हएं। बो प्रेम, जो कभी खतम नाए होतहए।