इफिसियों 2 - राना थारु नयाँ नियम

मृत्युसे जीबन

¹ पहिले जब तुम ख्रीष्टमे बिश्वास नाए करे रहओ, बो समयमे तुम मरे आदमीन कता रहओ। तुमर ठिन बो जीबन नाए रहए, जौन जीबन परमेश्वरके घेनसे मिलत हए। काहेकी तुम पाप करे और परमेश्वरके आज्ञाके पालन नाए करे।

² बो समयमे तुम जा संसारके आदमीनको तरिकाके पालन करत रहओ जो परमेश्वरके नाए जानत हएं और तुम शैतानको आज्ञापालन करत रहओ, अर्थात् बहे प्रधानके जो बादरमे दुष्टआत्मनमे शासन करत हए। जो अभौफिर बे आदमीनके कब्जामे करनके कोसिस कररहो हए जो परमेश्वरको आज्ञापालन नाए करत हएं।

³ हम फिर पापी स्वभाबके इच्छन्के पुरा करके जीइत रहएं, जो फिर हमर खराब इच्छा और बिचार हमसे कर्बान चाँहत रहए हम बहे करत रहएं। और बाँकी औ सबए कता, हम फिर स्वाभाबिक रुपसे बुरे रहएं और परमेश्वरको दण्डके अधिनमे रहएं।

⁴ पर परमेश्वर बहुत दयालु हए, बा अपनो महान प्रेमसे हमके प्रेम करी।

⁵ हम खराब काम और पापनके कारण मरे रहएं, बा ख्रीष्टके सँग हमर सम्बन्धके कारण हमके आत्मिक जीबन प्राप्त करनको लायक बनाइ हए और परमेश्वरको अनुग्रहएसे तुमर उद्धार भओ हए।

⁶ काहेकी बा हमके ख्रीष्ट येशूके सँग मरेभएन् मैसे जिन्दा करी और हम स्वर्गमे ख्रीष्ट येशूके सँग राज्य करनके लायक बनाइ।

⁷ परमेश्वर अइसो जाकेमारे करी ताकी आन बारो दिनन्मे बा संसारके आदमीनके दिखाए पाबए कि बाको अनुग्रह कित्नो महान हए। जो कुछ बा हमर ताहीं करीहए हमके जा अनुग्रह दिखाओगओ हए जो येशू ख्रीष्टके सँग एकतामे हएं।

⁸ काहेकी जब तुम बिश्वास करे तओ परमेश्वर अपने अनुग्रहसे तुमके बचाएलै, और तुम अपनए कोसिस करके बचे नाए हओ, बल्कि जा परमेश्वरको बरदान हए।

⁹ जा तुमर द्वारा करेगए कोइ अच्छे कामके कारण नाए हए और जहेमारे तुमर ठिन घमण्ड करनको कोइ कारण नाए हए।

¹⁰ काहेकी येशू ख्रीष्टके सँग एकतामे हुइके हम नयाँ आदमी हुइके अच्छो-अच्छो काम करएं कहिके परमेश्वर हमके बनाइ। और हमर ताहीं करन बारो बो, अच्छो काम परमेश्वर पहिलीयएसे तयार करे हए।

ख्रीष्टमे सबए जनै एक

¹¹ जहेमारे याद करओ, कि तुम जो गैर-यहूदीनके रुपमे जन्मे हओ और यहूदी आदमी तुमके जा कहिके तुच्छ बताइं, कि तुम खतना नाए कर्बात हओ, पर बे आदमी कर्बात हएं। उनको जा रिति उनको शरीरमे इकल्लो करोजात हए।

¹² तुम आदमी बो समय ख्रीष्टके नाए जान्त रहओ और तुम परमेश्वरके चुनेभए आदमी इस्राएल देश कता नागरिकके रुपमे सम्बन्धित नाए रहओ और तुम परमेश्वरके आदमीनके सँग बाको प्रतिज्ञामे फिर सामिल नाए रहओ, और तुम बिना आसरा और बिना परमेश्वरके, जा संसारमे रहात रहओ।

¹³ एक समय रहए, जब तुम परमेश्वरसे दुर रहओ, पर परमेश्वर बो खुनके माध्यम द्वारा तुमके अपने ढिँगै लाइ हए जो येशू ख्रीष्ट तुमर ताहीं बहाइ।

¹⁴ ख्रीष्ट अपनए हमर बीच शान्ति लाइ हए। बितेभए समयमे, जा अइसो रहए जैसे एक भित यहूदी और गैर-यहूदीनके अलग करदइ रहए। बे एकदुस्रेसे घृणा करत रहएं। पर अब ख्रीष्ट बो भितके गिराएदइ हए और दुई समुहनके एक करदइ हए।

¹⁵ अपनी मृत्युके द्वारा, बा मोशाको नियम कानुनके जाको सब नियम और बिधिन्के साथ खतम करदइ, ताकी बा यहूदीनको समुह और गैर-यहूदीनको समुहके बीच शान्ति करपाबए और अइसियए एक नयाँ समुह बनाए पाबए।

¹⁶ क्रूसमे अपनी मृत्युके द्वारा ख्रीष्ट दुई समुहके अलग करदइ और उनको मेलमिलाप परमेश्वरके कर्बाएदइ, अइसियए यहूदीके समुह और गैर-यहूदीनके बीचमे भओ दुस्मनाइ खतम करदइ।

¹⁷ और ख्रीष्ट आएके, परमेश्वरसे दुर रहे गैर-यहूदीनके और परमेश्वरके ढिँगै रहे यहूदीनके, दुनौ जनैके मेलमिलापको अच्छो समाचार परचार करी।

¹⁸ ख्रीष्टके कारण, हम सब एकए पबित्र आत्माके द्वारा दौवाके ठिन आएसकत हएं।

ख्रीष्ट हमर कोनेको पत्त्थर

¹⁹ तुम गैर-यहूदी, परदेशी और बिराने नाए रहे, पर तुम परमेश्वरके पबित्र आदमीनके सँग अइसियए अब तुम बिदेशी और प्रवासी नाए हओ, पर सन्तनके सँग तुम सँगी-नगरिक और परमेश्वरको परिवारके सदस्य हओ।

²⁰ चुनेभए चेला और अगमबक्तनको डरो भओ जगमे बनाओ भओ घर तुम फिर हओ। जगको मूल पत्थर येशू ख्रीष्ट अपनए हए।

²¹ ख्रीष्ट बो हए जो पुरो घरके एक साथ पक्णे रहात हए, और जाके परमेश्वरके ताहीं एक पबित्र मन्दिरके रुपमे बढात हए।

²² हे गैर-यहूदीके बिश्वासी, काहेकी तुम ख्रीष्टके सँग एकजुट हओ, जहेमारे तुमके फिर परमेश्वरके औरे आदमीनके सँग जोडो जाएरहो हए। ताकी तुम एक अइसो घर बन्जाबओ जहाँ पबित्र आत्माको शक्ति द्वारा परमेश्वर रहात हए।