इफिसियों 1 - राना थारु नयाँ नियम

नमस्कार

¹ मए पावल, जा चिट्ठीके लिखरहो हओं। परमेश्वर चाँहत हए, कि मए ख्रीष्ट येशूको चुनो भओ चेला बनओं। मए जा चिट्ठी एफिसस सहरमे रहान बारेनके ताहीं लिखरहो हओं, जो परमेश्वरके पबित्र आदमी हएं।

² मए प्राथना करत हओं, कि हमर दौवा परमेश्वर और प्रभु येशू ख्रीष्ट तुमके अनुग्रह करए और शान्ति प्राप्त करनमे तुम्री मदत करए।

ख्रीष्टमे आत्मिक आशिष

³ हमर प्रभु येशू ख्रीष्टको और दौवा परमेश्वरको प्रसंसा होबए, काहेकी ख्रीष्टके एकतामे होनके कारणसे परमेश्वर हमके ख्रीष्टके द्वारा स्वर्गको हर मेलके आत्मिक आशिषनसे आशिषित करी हए।

⁴ संसारको सृष्टिसे पहिलीयए, ख्रीष्टके सँग हमर एकताके कारण परमेश्वर हमके अपने होनके ताहीं पहिलीएसे चुनलै हए। ताकी हम बाके अग्गु पबित्र और बिना दोषके हुइपामएं।

⁵ परमेश्वरको प्रेमके कारणसे बा निर्णय लइ, कि बा येशू ख्रीष्टके द्वारा हमके अपनो सन्तान होनके ताहीं चुनैगो। परमेश्वर अपनो खुसी और आनन्द अनुसार अइसो करीहए।

⁶ जा अनुग्रह, बयान करन नाए सिकन बारो हए जहेमारे हम बाकी महिमामय अनुग्रहके ताहीं परमेश्वरके स्तुति करत हएं जो बा हमके सेँतएमे दइ हए। काहेकी बाको लौंणाके सँग हमर सम्बन्ध हए।

⁷ ख्रीष्ट मरत पेती हमर ताहीं खुन बहानके द्वारा परमेश्वर हमके छुटकारा करदइ हए, और परमेश्वर हमर पापनके क्षमा करदइ हए, और बाको अनुग्रह बहुत महान हए जो हमके मिलो हए।

⁸ परमेश्वरके ठिन बहुत ज्ञान और समझ हए और बे चीज बा हमके प्रशस्त करके दइहए।

⁹ परमेश्वर बहे करी, जो बा गुप्तमे धरी रहए, और हमके बो गुप्त योजनासे प्रकट करबाइ जो बा पहिलीयए ख्रीष्टके द्वारा पुरा करनके निर्णय लइ रहए।

¹⁰ जब जा योजनाके पुरा करनको समय आबैगो, तओ परमेश्वर बादर और पृथ्वीके सबए चिजनके ख्रीष्टके अधिनमे करैगो ताकी ख्रीष्ट सबए चिजनको मालिक होबए।

¹¹ परमेश्वर हम यहूदीनके फिर ख्रीष्टके सँगए जोडके अपने आदमी होनके ताहीं चुनलै काहेकी सुरुसे बाकी जहे योजना रहए। बा सब अपनी योजनाके अनुसार करत हए।

¹² हम यहूदी, पहिले आदमी हएं, जौन ख्रीष्टमे आसरा करे, और हम जहेमारे चुनेगए रहएं ताकी हम परमेश्वरकी महिमाके स्तुति दइ पामएं।

¹³ और तुमरसँग फिर जहे भओ हए। तुम बहे सच्चो सन्देश और मुक्तिको अच्छो समाचारके सुने हओ, जो जाके बारेमे बतात हए, कि परमेश्वर तुमके बचाए सकत हए। जब तुम ख्रीष्टमे बिश्वास करे, तओ परमेश्वर अपनो प्रतिज्ञा करोभओ पबित्र आत्मा तुमके दइ, जा दिखानके ताहीं कि तुम परमेश्वरके हओ।

¹⁴ काहेकी परमेश्वर हमके पबित्र आत्मा दइ हए। हम जा बातसे पक्का हुइपात हएं, कि परमेश्वर हमके उद्धारके ताहीं बो उत्तराधिकार देबैगो जो बा देनको प्रतिज्ञा करीहए और जा फिर कि बा हमके अपने आदमीनके रुपमे खरिदी हए ताकी बाको महिमाको स्तुति होबए।

आत्मिक ज्ञानके ताहीं प्राथना

¹⁵ जे सबकेमारे, जबसे मए, प्रभु येशूके उपर तुमर बिश्वास और परमेश्वरके पबित्र आदमी प्रति तुमर प्रेमको समाचार सुनो,

¹⁶ तओ मए हमेसा तुमर ताहीं परमेश्वरके धन्यबाद दओ और अपनो प्राथनामे तुमके सम्झो।

¹⁷ मए प्राथना करत हओं कि परमेश्वर, हमर प्रभु येशू ख्रीष्टको महिमामय दौवा, तुमके आत्मिक ज्ञान और समझ देबैगो और बोके औ जद्धा रुपसे चिन्हन्मे मदत करैगो, कि परमेश्वरके चिन्हन्को का अर्थ हए।

¹⁸ मए जा फिर प्राथना करत हओं, कि बा सच्चाईके सम्झनमे तुमर मदत करैगो ताकी तुम बाको महिमाको धनके जान पाबओ, कि बो आसरा जो तुमके दओगओ हए, जब परमेश्वर तुमके चुनी रहए। और ताकी तुम जानपाबओ, कि बे आशिष कित्ने महान और महिमामय हएं जौनको प्रतिज्ञा परमेश्वर अपने पबित्र आदमीसे करीहए।

¹⁹ मए चाँहत हओं कि तुम बो महान और बडो शक्तिके बारेमे जानपाबओ जो परमेश्वरके ठिनसे हमर ताहीं हए जो ख्रीष्टमे बिश्वास करत हए। जा बहे बडो शक्ति हए।

²⁰ जौन ख्रीष्टके मरे भएन मैसे उठाइ और बाके स्वर्गमे परमेश्वरको दाहिना हातमे सम्मानको ठाउँमे बैठिगओ।

²¹ बो ठाउँमे सब मेलके शासन, अधिकार, शक्ति और राज्य उपर, और जा युगको इकल्लो नाए पर आन बारे युगके फिर जित्ने नाउँ हएं, बे सबके उपर अधिकार करनके ताहीं ख्रीष्टके धरी।

²² और परमेश्वर सब चिजनके ख्रीष्टके अधिकारके अधिनमे करदइ हए और बाके मण्डलीनको भलाइके ताहीं हर चीजमे मुखिया बनाए दइ।

²³ मण्डली ख्रीष्टको शरीर हए, और जाके ख्रीष्टके द्वारा पक्को और पुरा बनाओ गओ हए, जो हर ठिहा सब चिजनके अपनएसे भरपुर करत हए।