कलस्सी 3 - राना थारु नयाँ नियम

परमेश्वरके नजरमे नयाँ जीबन जीइनो

¹ जब परमेश्वर ख्रीष्टके मरो मैसे जिन्दा करी, तओ तुम फिर पापी स्वभाबमे मरके जिन्दा भए हओं। तुम बो चीजमे मन लगाओ, जौन चीज परमेश्वर तुमर ताहीं स्वर्गमे धरेपणे हए। जहाँ परमेश्वरके ठिन, ख्रीष्ट सबसे सम्मानित ठाउँमे बैठो।

² पृथ्वीके नाए पर स्वर्गमे, परमेश्वर तुमर ताहीं जो धरी हए, बोके ताहीं इच्छा करओ।

³ काहेकी तुम अपने पापी स्वाभावके ताहीं मरिगए हओ, और तुमर जीबन ख्रीष्टके सँग परमेश्वरमे लुको हए।

⁴ जब ख्रीष्ट, जो तुमके नयाँ जीबन देत हए, जब बा जा पृथ्वीमे लौटके आबैगो, तओ तुम फिर बाके सँग दिखाइ देबैगे, और तुम बाके महिमामे सहभागी होबैगे।

⁵ जहेमारे बो खराब काम करनके छोडदेबओ, जो तुमर पापी स्वभाबसे जुडे हएं और जो पृथ्वीमे हएं, जैसेकी व्यभिचार, अशुद्धता, कामुकता, खराब इच्छा। और लालची मतबनओ, जो मूर्तिपुजा करो कता हए।

⁶ काहेकी आदमी जे खराब काम करत हएं, कहेसे नेहात्तओ परमेश्वर बिनके कडा दण्ड देबैगो।

⁷ और तुम फिर, जब जे खराब काममे जीबन जीइत रहओ, तओ तुम फिर जहे काम करत रहओ।

⁸ पर अब तुमके जे सब बातके छोडन पणैगो, जैसेकी गुस्सा, क्रोध, हिंसा, बदनाम और दुस्रेके बारेमे गलत बात बतानो।

⁹ एकदुस्रेसे मत् ठगओ, काहेकी तुम अपने पुरानो पापी स्वभाब, और सब खराब कामके छोडदए हओ।

¹⁰ तुम एक नयाँ आदमी बनिगए हओ, जा नयाँ स्वभाब जाको सृष्टिकर्ताके रुपमे औ जद्धा बढतए जाबओ, तओ बाके औ अच्छेसे बुझपाबैगे।

¹¹ जहेमारे एक ग्रीक और यहूदीनके बीचमे कोइ भेदभाब नाए हए। नए खतना करोभओ, नए त बिना खतनाको; नए असभ्य, नए त बिदेशी; नए नोकर, नए त बो जो नोकर नाए हए। पर ख्रीष्ट इकल्लो एक हए जो महत्त्वपूर्ण हए, और बा अपन सब आदमीनमे रहात हए।

ख्रीष्टियन जीबन

¹² जहेमारे जबकी परमेश्वर तुमके अपने पबित्र आदमी होनके ताहीं चुनी हए, और तुमसे प्रेम करत हए, तभीमारे तुम सब करुणा, भलाइ, नम्रता और धैर्य धारण करओ।

¹³ एकदुस्रेके सहिके प्रेम दिखाओ, कोइको बिरोधमे कोइ बात हए कहेसे क्षमा करओ। जैसे प्रभु तुमके क्षमा करीहए, उइसी तुम फिर एकदुस्रेके क्षमा करओ।

¹⁴ और जे सबसे जरुरी काम जो तुमके करन चाहो बो जा हए, कि एक-दुस्रेसे प्रेम करओ।

¹⁵ और बो शान्ति जो ख्रीष्ट देतहए, बोके तुमर विचारमे नियन्त्रण करनके देओ, काहेकी तुम सब एकए शरीरके अंग हओ, और जहेमारे तुमके एकदुस्रेके सँग शान्तिसे रहानके ताहीं बुलाओ गओ हए।

¹⁶ हर समय ख्रीष्टके सन्देशके बारेमे सोँचओ। ताकी जा बे सबके नियन्त्रण करए, जो तुम करत और सोँचत हओ। और सिद्ध ज्ञान सहिँत एकदुस्रेके सिखाओ, और सल्लहा देओ। और अपने-अपने मनमे धन्यबादके सँग परमेश्वरके ताहीं भजन, स्तुति और आत्मिक गीत गाओ।

¹⁷ जो बात तुम बोलत हओ या करत हओ, सब चीज प्रभु येशूके नाउँमे करओ, और प्रभु येशूके माध्यमसे दौवा परमेश्वरके धन्यबाद देओ।

ख्रीष्टियन परिवार सम्बन्धी शिक्षा

¹⁸ हे बैयर आदमी, तुम अपने लोगाके अधीनमे होन चाहो, काहेकी प्रभुके पिच्छु लागन बारेके ताहीं अइसियए करन ठिक हए।

¹⁹ हे लोग आदमी, अपने-अपने बैयरसे प्रेम करओ, और बिनके सँग दयासे ब्यबहार करओ।

²⁰ हे बालका, सब बातमे जैसे जो कुछ फिर तुमर अइयादौवा तुमसे करनके ताहीं कहात हएं, उइसीयए करओ, काहेकी प्रभु जासे खुसी होत हए।

²¹ हे दौवओ, अपने बालकाके दिक्क मत् लग्बाबओ अइसो नाए होबए, कि बे बो काम करन बन्द करदेमएं जोसे परमेश्वरके खुसी होतहए।

²² हे कमैयओ, जो जा संसारमे मालिक हए, सब बातमे बोको आज्ञाके पालन करओ, आदमीनके खुसी करन बारो हानी दिखानके ताहीं नाए, पर इमान्दारीसे और परमेश्वरके डरसे करओ।

²³ और जो कुछ तुम करत हओ, पुरो मनसे करओ, जा समझके कि आदमीनके ताहीं नाए, पर प्रभुके ताहीं करत हओ।

²⁴ याद करओ, कि प्रभु तुमके इनाम देबैगो, जो जहेहए, कि ख्रीष्ट तुमके बे आशिष मैसे तुमर बाँट देबैगो जौनके बा अपने सब आदमीनके ताहीं तयार करीहए।

²⁵ काहेकी जो फिर खराब काम करन बन्द नाए करैगो, परमेश्वर बोके दण्ड देबैगो, परमेश्वर कोइके पक्षपात नाए करत हए।