कलस्सी 2 - राना थारु नयाँ नियम

¹ मए चाँहत हओं कि तुम जान लेबओ, कि तुमर ताहीं मए कित्नो मेहेनत करत हओं। और बिनके ताहीं फिर जो लाउडिकिया सहरमे हएं, और बे सबके ताहीं फिर, जौननसे मिर भेँटा नाए भओ हए।

² मए अइसो करो, काहेकी मए तुम सबके आत्मिक उत्सहा देन चाँहत हओं। और एक-दुस्रेके प्रती तुमर प्रेम तुमके एकजुटमे बाँधए। ताकी तुमरमे पुरा समझ होबए, जौनके ताहीं तुम परमेश्वरको रहस्य पता पाबओ, जो ख्रीष्ट अपनए हए।

³ बहे हए, जो परमेश्वरको बुद्धि और ज्ञान जानत हए, जो लुकाओ भओ सम्पति जैसो हए।

⁴ जा मए जहेमारे कहात हओं, कि कोइ आदमी तुमके अपनो झुठो शिक्षामे नाए फसाए पाबए।

⁵ काहेकी अगर मए तुमसे दुर हओं, कहेसे फिर मए तुमर बारेमे सोँचतए रहात हओं, और मए जा देखके बहुत खुसी हओं, कि तुम कित्नो नियममे रहात हओ, और ख्रीष्टमे तुमर बिश्वास कित्नो बलियो हए।

ख्रीष्टमे रहे रहाओ

⁶ जहेमारे जैसी तुम ख्रीष्ट येशूके प्रभु करके ग्रहण करलए हओ, उइसीयए बामे अपन जीबन बिताओ।

⁷ ख्रीष्टमे तुमर बिश्वास एक रुखा कता होन पणत हए, जोको जर बहुत गहिरो तक अँदो होत हए। याफिर एक अइसो घर कता होए, जौन एक मजबुत जगमे बनोगओ रहात हए। अपन बिश्वासमे मजबुत बने रहाबओ जैसो तुमके सिखाओ गओ रहए, और रोजदिन धन्यबाद देतए रहाओ।

⁸ ध्यान देओ, कि बेकम्मा और झुठी बातसे कोइ तुमके नाए फसाए पाबए, जौन ख्रीष्टके अनुसार नाए हुइके आदमीनको परम्परा और संसारकी शिक्षामे अधारित रहात हएं, और जौनके कारण हम आदमीनको दौवा भओ, जो शिक्षाके पिच्छु चलन नाए चाँहत हएं, बो कारण जहेहए।

⁹ काहेकी जब ख्रीष्ट आदमी बनो, तओ बा पुरो रुपसे परमेश्वर रहए। तभीमारे तुम जे आदमीनसे अपनएके धोखा मतदेओ,

¹⁰ और ख्रीष्ट सब शक्ति और अधिकारमे सबसे बडो हए। तहिमारे अगर तुम ख्रीष्टमे हओ, कहेसे तुमके कोइ फिर चीजको कमी नाए हुइहए।

¹¹ जब तुम ख्रीष्टमे बिश्वास करे, तुमर खतना आदमीनसे नाए करोगओ, जैसे यहूदी आदमीनके करत रहएं। पर बो खतना ख्रीष्टके माध्यमसे भओ, जो तुमर पापी स्वभाबके काटके दुर करे जैसो हए।

¹² जब तुमके बप्तिस्मा दओगओ तओ बो जा दिखात हए, कि तुमर पापी स्वभाबके दफ्नाओ गओ हए। अइसीयए जैसे ख्रीष्ट दफ्नाओ गओ रहए। और तुमके एक नयाँ स्वभाबके सँग जिन्दा कराओगओ जैसे ख्रीष्टके जिन्दा बनाओगओ रहए। अइसे जा कारणसे भओ रहए, काहेकी तुम बिश्वास करओ, कि परमेश्वर अपन शक्तिसे ख्रीष्टके मरे मैसे फिरसे जिइबाए दइ।

¹³ और तुम फिर अपन अपराध और अपन पापी स्वभाबको शक्तिसे स्वतन्त्र नाए रहओ। तओ परमेश्वर तुमके ख्रीष्ट सँग जीइबाइ, और हमर सब अपराधके माफ करी।

¹⁴ बा हमर बिरुद्ध लिखो भओ सब तमसुक और बिनको सब कानुनी दाबीके, रद्द करदइ हए। और जब येशू ख्रीष्टके क्रूसमे टाँगीं, तओ बा सब दाबिनके पुरा रुपसे हटाए दइ हए।

¹⁵ ख्रीष्ट येशू प्रधानतनके और सब अधिकारके शक्तिनके हराए दइ हए। और क्रूसमे मरके बा, जा प्रधानतनके और अधिकारके शक्तिनके सबके अग्गु लाज करबाए दइ, और बा इनसे जितिगओ।

¹⁶ जहेमारे कोइ तुमके धोखा नाएदेबए, और कोइ तुमके न्याय नाए करए, या पबित्र दिनके बारेमे तुमर कोइ फैसला नाए करए।

¹⁷ जे सब कानुन, छाहींके समान हएं, पर असली चीज ख्रीष्टके हएं।

^18-19 ख्रीष्ट शरीरको मुण हए, ख्रीष्टके माध्यमसे शरीरके सब अंग जुडे होत हएं और अंगके रेखदेख करत होतहए। जहेमारे जा परमेश्वर इच्छा अनुसार बणत हए, अपनएके अपमान करके और स्वर्गदूतनके आराधना करके कोइके अयोग्य बनान मतदेओ। अइसे आदमी दर्शनमे प्रबेश करत हएं, जौन उनको मानब सोँचके कारण मुरख घमण्डसे भरजात हएं। बे ख्रीष्टमे नाए रहिपात हएं।

ख्रीष्टके सँग जीइनो और मरनो

²⁰ काहेकी तुमर पापी स्वाभाव ख्रीष्ट सँग मरीगओ, तुमके और जे संसारके नियम पालन नाए करन पणैगो। जहेमारे काहे तुम अभौफिर जे नियम पालन करत हओ, जैसेकी संसार अभौफिर तुमके नियन्त्रणमे करेहए?

²¹ काहे तुम अइसे कहात हओ, कि “अइसे चीजके अपनो हातमे मत् पकणियओ,” या “अइसो खानु मत् खैयओ,” और “अइसो चीजके हात फिर मत् लगैयओ?”

²² जे सब नियम कोइ कामके नाए हएं, काहेकी जे आदमीनको आज्ञा और शिक्षा अनुसार हएं।

²³ जे नियम एक बुद्धिमान तरिका और अपनएके परमेश्वरको आराधना करनमे समर्पित दिखात हए। पर जा नियम आदमीनके बिनको खराब इच्छाके नियन्त्रण करनके मदत नाए करत हए।