प्रेरित 8 - राना थारु नयाँ नियम

मण्डलीमे सतावट और बिस्तार

¹ शाऊल स्तिफनसको हत्यामे पुरो रुपसे सहमत रहए। बहे दिनसे यरूशलेम सहरमे भए मण्डलीके बिरुद्धमे बहुत भारी सतावट सुरु भओ, और येशूसे चुनेभए चेला बाहेक बे सब यहूदिया परदेश और सामरियाके परदेश घेन छिदर-बिदर हुइगए।

² और परमेश्वरके आदर करन बारे कोइ-कोइ लोग आदमी स्तिफनसके लैजाएके गड्डामे गाणीं, और बोके ताहीं बहुत भारी बिलाप करीं।

³ तओ शाऊल घर-घरमे घुसके मण्डलीके सतान लागो रहए। बो बिश्वासी लोग और बैयरनके घिसियात लैजाएके जेलमे डारत रहए।

सामरियामे फिलिप

⁴ पर जो-जो बिश्वासी तितरबितर भए, बे अच्छो समाचार परचार करत फीरीं।

⁵ और फिलिप, सामरियाको एक नगरमे जाएके आदमीनके बीचमे ख्रीष्टको परचार करन लागो।

⁶ फिलिपको कहो भओ बचन सुनके और बोको करोभओ चमत्कारको काम देखके, भिड एक मनके हुइके बिनकी बातमे ध्यान दइं।

⁷ काहेकी जब फिलिप आदेश दइ तओ बहुत आदमीन मैसे भुत जोडसे चिल्लाएके निकरन लागे, और बहुत जनै पक्षघात, रोगी और लंगणा फिर अच्छे भए।

⁸ जहेमारे बो सहरमे बहुत आदमी खुसी भए।

जादु दिखान बारो सिमोन

⁹ सिमोन नाउँ भओ एक जनै आदमी हुवाँ रहए। बो अग्गुवएसे सामरिया सहरमे जादुगरी करके हुनाके जाति-जातिके आदमीनके अचम्मो करेपणे रहएं, और अपनएके कोइ बडो आदमी मानत रहए।

¹⁰ और अब छोटेसे लैके बणेतक सब बोके सम्मान करके अइसे कहात रहएं, “जा आदमी परमेश्वरको बो शक्ति हए, जोके महाशक्ति कहात हएं।”

¹¹ बहुत समय पहिलेसे आदमीनके अपनो जादुसे अचम्मो पणाए रहए, जहेमारे बे बोके बहुत मान्त रहएं।

¹² जब आदमी परमेश्वरको राज्य और येशू ख्रीष्टको नाउँमे अच्छो समाचारमे फिलिपको सन्देशको परचार सुनके बिश्वास करीं, तओ सबए लोग और बैयर बप्तिस्मा लैं।

¹³ सिमोन अपनए फिर फिलिपको सन्देशमे बिश्वास करी। बो बप्तिस्मा लइ और फिलिपके सँगए-सँग लाग गओ, और चिन्हा और बणे-बणे चमत्कारको काम करके देखके बोके अचम्मो लगत रहए।

¹⁴ सामरिया सहरके आदमी परमेश्वरको बचन ग्रहण करलै हएं, कहिके सुनके यरूशलेम सहरमे भए चुनेभए चेला पत्रुस और यूहन्नानके बिनके ठिन पठाइं।

¹⁵ हुवाँ पुगके बे समरिया परदेशके आदमी पबित्र आत्मा पामएं करके उनके ताहीं प्राथना करीं।

¹⁶ काहेकी पबित्र आत्मा अभएतक उन मैसे कोइके ठिन नाए आओ रहए, बे त प्रभु येशूके नाउँमे बप्तिस्मा इकल्लो लए रहएं।

¹⁷ तओ पत्रुस और यूहन्ना अपन हात प्रभुमे बिश्वास करन बारेनके उपर धरीं, और बे पबित्र आत्मा पाइं।

¹⁸ अब चुनेभए चेलनको हात धरन्से पबित्र आत्मा पाओ जात हए करके देखके सिमोन अइसे कहात बिनके रुपैया देन लागो,

¹⁹ “जा शक्ति मोके फिर देओ, और मए फिर जौनके उपर हात धरओं बे पबित्र आत्मा पामएं।”

²⁰ तओ पत्रुस कही, “तए और तेरे रुपैया नाश होएं, काहेकी तए परमेश्वरको बरदान रुपैयासे किनन्के बिचार करो।

²¹ जा सेवाकाइमे नए तेरो हिस्सा हए, नए तेरो अधिकार हए, काहेकी तेरो मन परमेश्वरके अग्गु सही नाए हए।

²² जहेमारे अपनो जा दुष्ट बिचार छोडके परमेश्वर घेन घुमके प्रभुसे प्राथना कर, सायद बा तेरो अइसो बिचारनके क्षमा करदेबए।

²³ अपनो दुष्ट कामसे घुम काहेकी मए देखतहओं, कि तए बहुत ईर्ष्‍यासे भरो भओ और पापको बन्धनमे पणो हए।”

²⁴ तओ सिमोन जबाफ दइके कही, “तुम मेरे ताहीं प्रभु येशूसे प्राथना करदेओ, और जो बात तुम मोसे कहेहओ, उन मैसे कोइ बात फिर मोके नाए लगए।”

²⁵ और इत्का कहिके पत्रुस और यूहन्ना गवाही दइके और प्रभु येशूको बचन सुनाएके, यरूशलेम सहरमे लौटिगए और बे सामरिया परदेशके बहुत गाउँमे अच्छो समाचार परचार करीं।

इथियोपिया देशको बडो हाकिम

²⁶ तओ पिच्छु प्रभुको एक स्वर्गदूत फिलिपसे कही, “उठके दक्खिन घेन बो डगरमे जा, जो यरूशलेम सहरसे गाजा सहरमे जातहए। हुवाँ जंगली इलाकाको डगर हए।”

²⁷ तओ फिलिप उठके चल्दइ, और तओ इथियोपिया देशको एक आदमी आनडटो रहए, जो नपुंसक और इथियोपिया देशकी महारानी कन्दाकी बणी पद अधिकारी और सब सम्पतिको कोषाध्यक्ष रहए। बो यरूशलेम सहरमे आराधना करन गओ रहए।

²⁸ बो अपनो रथमे बैठके अगमबक्ता यशैयाकी किताबके जोड-जोडसे पढतए अपनो देशमे लौटके जानडटो रहए

²⁹ तओ पबित्र आत्मा फिलिपसे कही, “जा और बो रथके सँगए-सँग नेँग।”

³⁰ फिलिप दौरके रथ ठिन पुगो और बोके अगमबक्ता यशैयाकी किताबके पढत सुनी, और पुँछी, “तए जो पढरहो हए का जाके सम्झत फिर हए?”

³¹ तओ बो कही, “जब तक कोइ मोके नाए सम्झएहए तबतक मए जाके नाए बुझ पएहओं।” और बो फिलिपसे बिन्ती करी, कि रथमे चढके बोके ठिन बैठए। तओ फिलोप बो रथमे चढके बैठिगओ।

³² और पबित्र-शास्त्रको जो खण्ड बो पढन डटो रहए, बो जा रहए, “जैसी भेंणा काटनके लैजाओ जातहए, बो भेंणा ऊन कतरन बारेनके अग्गु चुप रहतहए; उइसीयए जब आदमी बाके पिडा दइं तओ बा अपनो मुँहुँसे कोइ शब्द नाए निकारी।

³³ बाके अपमानित करोगओ और बाके न्याय नाए मिलो। और बाको सन्तानको बयान कौन करैगो? काहेकी पृथ्वीमे बाको कुछ सन्तान होनसे अग्गु, आदमी बाके मारीं।”

³⁴ तओ बो नपुंसक फिलिपसे पुछी, “मए तोसे बिन्ती करत हओं, जा बात अगमबक्ता कौनके बारेमे कहात हए, अपने बारेमे या कोइ औ दुस्रेके बारेमे?”

³⁵ तओ फिलिप मस्कनके सुरु करके पबित्र-शास्त्रको बहे भाग लैके येशूसे मुक्ति मिल्त हए कहिके अच्छो समाचार परचार करी और जहेमारे बो अधिकारी बुझी और येशूमे बिश्वास करी।

³⁶ और बे नेँगतए-नेँगत डगरके किनारे पोखरी ठिन आए पुगे। तओ बो नपुंसक कही, “देख हियाँ पानी हए, अब मोके बप्तिस्मा लेनके ताहीं कोइ रोक सिकैगो?”

³⁷ फिलिप बोसे कही, “अगर तए सारा मनसे बिश्वास करत हए कहेसे बप्तिस्मा लए सिकत हए।” बो जबाफ दइ, “येशू ख्रीष्ट परमेश्वरको लौंणा हए करके मए बिश्वास करत हओं।”

³⁸ तओ बो रथ रोकनके आज्ञा दइ, और फिलिप और नपुंसक दोनए पोखरीमे गए, और फिलिप बोके बप्तिस्मा दइ।

³⁹ बे पोखरी मैसे बाहिर निकरके आए, तओ प्रभुको आत्मा फिलिपके पकणके लैगओ। और नपुंसक बोके फिरसे नाए देखन पाइ, और परमेश्वर बोके बचाएलै कहिके खुसी होत अपनो देशमे लौटके चलो गओ।

⁴⁰ तओ फिलिप अपनएके अश्दोद सहरमे पाइ, और जब तक बो कैसरिया सहरमे नाएपुगो तबतक बो गाउँ-गाउँमे अच्छो समाचार परचार करतए एक ठिहासे दुस्रे ठिहा अपनो यात्रा जारि रक्खी।