प्रेरित 6 - राना थारु नयाँ नियम

सात जनैको चुनी

¹ बे दिनन्मे चेलनको संख्या बढतए गओ, तओ हिब्रू भाषा मस्कन बारे आदमीनके बिरुद्धमे ग्रीक भाषा मस्कन बारे यहूदी चेला गनगन करन लागे, कि प्रत्येक दिन खान बारी चीज बाँटत पेती बिनके बिधुवनको वास्ता नाए भओ।

² तओ बाह्रऔ चुनेभए चेला यरूशलेमके अन्य बिश्वासीके अपने ठिन बुलाएके कहीं, “हम परमेश्वरको बचन परचार करन छोडके खबान-पिबानको सेवामे रहान ठिक नाए हए।

³ जहेमारे हे बिश्वासी ददाभइया, तुमर बीचसे पबित्र आत्मा और ज्ञानसे भरेभए सात आदमीके चुनओ, जौनके बारेमे सबके पता हए। हम जा खान बारी बातको जिम्मा बिनके देमंगे।

⁴ पर हम त प्राथनामे और बचनको परचार करन और शिक्षा देन बारो सेवामे लगे रहामंगे।”

⁵ जा बात सारी मण्डलीनको समुहके अच्छी लागी, और बे स्तिफनस नाउँको एक लोगके जो बिश्वास और पबित्र आत्मासे भरो रहए। और फिलिप, प्रखरस, निकनोर, तीमोन, पर्मिनाश और एन्टिओखियामे रहान बारो निकोलाउसके फिर चुनीं जो यहूदी मतमे आइगओ रहए।

⁶ और इन्के चुनेभए चेलनके अग्गु लाइं और बे प्राथना करके अपनो हात बिनके उपर धरके काम करनके ताहीं बिनके नियुक्त करी।

⁷ और परमेश्वरको बचन फैलतए गओ और यरूशलेम सहरमे चेलनको संख्या बहुत बढतए गओ। और बहुत यहूदी पुजारी फिर येशू ख्रीष्टमे बिश्वास करन बारो शिक्षाके स्वीकार करीं।

स्तिफनसको पकणाओ

⁸ स्तिफनस अनुग्रह और शक्तिसे भरके आदमीनके बीचमे बणे-बणे चमत्कारको काम और चिन्हा दिखाओ करत रहए।

⁹ पर कोइ आदमी स्तिफनसके बिरोध करीं। बे बो यहूदी सभाघरको सदस्य रहए, जोके दासत्व-मुक्त कहोजात रहए, बे आदमी कुरेनी सहरके और अलेक्जेन्ड्रिया सहरके रहएं, और किलिकिया परदेश और एशिया परदेशसे फिर रहएं। जे आदमी स्तिफनसके सँग बाद-बिबाद करन लागे।

¹⁰ तओ बो जो कुछ फिर कही, बे बोको कुछ जबाफ नाए दइ पाइं। काहेकी पबित्र आत्मा बोके बहुत बुद्धिमानीसे मस्कनमे मदत करी।

¹¹ जहेमारे दासत्व-मुक्त आदमी कुछ लोग आदमीनके, स्तिफनसके बारेमे झुट बोलनके ताहीं उस्काएके, “हम जा आदमीके मोशा और परमेश्वरके बदनाम करत सुनेहएं” कहिके कहानके लगाइं।

¹² बे स्तिफनसके बिरुद्ध करनके ताहीं जनता, यहूदी अगुवनको समुह और मोशाको नियम कानुन सिखान बारेनके उस्काइं और बे आएके स्तिफनसके पकणीं और बोके यहूदी सभाघरके अग्गु लैगए।

¹³ हुवाँ बे झुठी गवाही देन बारोके ल्याइं, जौन स्तिफानस उपर जा आरोप लगाइ रहएं, और कहीं कि, “जा आदमी, पबित्रस्‍थान और मोशाको नियम कानुनके बिरुद्धमे बदनाम करन नाए छोडत हए।

¹⁴ काहेकी हम बोके जा कहात सुनेहएं, कि जहे नासरतको येशू जा मन्दिरके भत्काए देबैगो, और बे रिति रिबाजके बदल देबैगो जो मोशा हमके सौँपी रहए।”

¹⁵ यहूदी सभाघरमे बैठे बे सब बोके देखीं, और बोको चहेरा स्वर्गदूतको चहेरा कता चमकन डटो रहए।