प्रेरित 5 - राना थारु नयाँ नियम

हननिया और सफिरा

¹ हननिया नाउँको एक आदमी और बोकी बैयर सफिरा कुछ सम्पति बेँचीं, जो उन्हिनको रहए,

² बो बेँचके लोगा-बैयर सल्लाह करके बोको दामसे कुछ हिस्सा अपन सँग धरलैं, और कुछ हिस्सा लाएके चुनेभए चेलन्के दइ दइं।

³ तओ पत्रुस कही, “ए हननिया, जौन शैतान तेरे मनमे पबित्र आत्मासे झुठ मस्कन बारो बिचार डारी हए और तए जो जमिन बेँचो हए बहे दामको एक भाग अपने ताहीं धरलओ हए।

⁴ का बो जमिन बेँचनसे अग्गु बो तेरी नाए रहए? और जब तुम बो जमिन बेँचे, का बो तुम्रीयए अधिकारमे नाए रहए? तरे मनमे जा गलत कामको सोँच कैसे आओ? तुम आदमीके त नाए, पर तुम परमेश्वरके ठगेहओ।”

⁵ जा बात सुनके हननिया भीमे गिरिगओ और बोको मृत्यु भओ। जा सुनके सबके बहुत भारी डर छैगओ।

⁶ तओ बे जवान उठाएके बोके लत्तासे लपेटके बोके बाहिर लैगए, और गाणदइं।

⁷ जा सब हुइगओ रहए तओ लगभग: तीन घण्टा पिच्छु बोकी बैयर भितर आइ। बोके अपनो लोगा मरीगओ कहिके पता नाए रहए।

⁸ पत्रुस बोसे पुँछी, “मोके बताओ, का तुम दुई जनै बो जमिनके उतकएमे बेँचे रहओ?” और बो कही, “हाँ, उतकएमे बेँचे हएं।”

⁹ तओ पत्रुस बोसे कही, “तुम प्रभुके आत्माके परीक्षा करनके कैसे मिलके सल्लाह करलए? देख, तेरो लोगाके गाडन बारे फाटकके मोखेमे हएं और बे तोके फिर अइसियए बाहिर लैजामंगे।”

¹⁰ और तुरन्त बो भिमे गिरिगै और बोकी फिर मृत्यु हुइगै। जब जवान लौंणा भितर आएके बोके मरी भइ पाइं, और बाहिर लैजाएके बोके लोगा सँग गाणदइं।

¹¹ तओ सारा यरूशलेम सहरके मण्डलीमे और जा बात सुनन बारे सबए आदमीनमे बहुत भारी डर छैगओ।

अचम्मके काम और चिन्हा

¹² अब चुनेभए चेलनके द्वारा बहुत चिन्हा और चमत्कारको काम जन्तनके बीचमे दिखाए जात रहएं, और ख्रीष्टमे बिश्वास करन बारे सबए एक मनके हुइके सोलोमनके बरन्डामे जमा होत रहएं।

¹³ जौन अभएतक येशूमे बिश्वास नाए करी रहएं, बिन मैसे कोइके फिर बिनके सँग भेँटनके हिम्मत नाए होत रहए, तहुँफिर आदमी चुनेभए चेलनको प्रसंसा करत रहएं।

¹⁴ और प्रभुमे बिश्वास करन बारेनको संख्या बढतए गओ। उन्मे लोग-बैयरको एक बडो समुह बनिगओ।

¹⁵ जो कुछ चुनेभए चेला करत रहएं बोके कारण आदमी बिमारीनके लाएके गल्लीमे गद्दा बिछाएके लिटाएदेत रहएं। बे पत्रुसको छाहीं इकल्लो पणजाए कहिके आसरा करेकर्त रहएं।

¹⁶ यरूशलेम सहरके आसपासके नगरमे फिर बहुत आदमी बिमार और भुतसे सताए भएनके चुनेभए चेलनके ठिन लैके आत रहएं और बे सब अच्छे होत जात रहएं।

चुनेभए चेलनके सतावट

¹⁷ प्रधान यहूदी पुजारी और बिनके सँग होन बारे सब, जो सदुकीनको समुह पन्थीके रहएं, चुनेभए चेलनसे गुस्सा होन लागे। तभीमारे बे उनके बिरुद्धमे काम करनको निर्णय लइं।

¹⁸ और चुनेभए चेलनके पकणके जेलमे थुन दइं।

¹⁹ पर प्रभुको एक स्वर्गदूत रातके जेलको फाटक खोलदइ, और बिनके बाहिर ल्याएके कही,

²⁰ “जाओ और मन्दिरके आँगनमे ठाणके सब आदमीनके जा अनन्त जीबनके बारेमे सुनाओ।”

²¹ चुनेभए चेला सुबेरे मन्दिर भितर घुसे और शिक्षा देन लागे। पर प्रधान यहूदी पुजारी और बोके सँग होन बारे सँगी आए, और यहूदी सभाघरके, और इस्राएल देशके सब अगुवनके इकट्ठा करीं। और चुनेभए चेलनके लानके आज्ञा दइं।

²² पर मन्दिरके लाख्बरिया हुना पुगके उनके जेलमे नाए पाइ, और आएके बताइं,

²³ “हम जेलके महा साबधानीसे ताला लगाओ भओ, और चौकीदारनके बाहिर ठाणे देखे। पर जब द्वार खोलके देखे, तओ हम भितर कोइके नाए पाए।”

²⁴ जब मन्दिरके चौकीदारनको हाकिम और मुखिया यहूदी पुजारी जा खबर सुनीं तओ सोँचमे पणिगए, कि जाको परिणाम का हुइहए।

²⁵ तओ कोइ एक जनै आएके बिनसे कही, “देखओ, तुम जौन आदमीनके जेलमे धरेरहओ बे मन्दिरके आँगनमे ठाणके आदमीनके शिक्षा दइ रहे हएं।”

²⁶ जब बे जा सुनीं, तओ मन्दिरको हाकिम चौकीदारनके सँग मन्दिरमे जाएके चुनेभए चेलनके, यहूदी सभाघरके अग्गुसे बिना जबरजत्ती करके लैके आओ। काहेकी बे डरात रहएं, कि आदमी उनके पत्थरसे मारके उनको हत्या करदेहएं करके।

²⁷ और प्रधान यहूदी पुजारी चुनेभए चेलनके यहूदी सभाघरके अग्गु ठणबाइ। बो बिनसे पुँछी,

²⁸ “का हम तुमके येशूके नाउँमे फिरसे कोइके कुछु मत् कहियओ कहिके आज्ञा नाए दए रहएं? तहुँफिर तुम त सारे यरूशलेम सहरमे अपनो शिक्षासे भर दएहओ। और तुम बाको खुनको दोष जबरजत्ती हमर उपर लगान चाँहत हओ।”

²⁹ तओ पत्रुस और चुनेभए चेला कहीं, “हम आदमीको नाए पर परमेश्वरको आज्ञापालन करत हएं।

³⁰ हमरे दौवा-पुर्खाको परमेश्वर येशूके मरो भओ मैसे जिन्दा करी, जौनके तुम क्रूसमे टाँगके मारडारे रहओ।

³¹ बहेके परमेश्वर अपन दहिना घेन सृष्टिकर्ता और मुक्तिदाता बनाइ हए। ताकी इस्राएल देशके आदमी अपनो खराब बिचार और खराब डगरसे परमेश्वर घेन घुमएं। और बाके द्वारा अपनो पापको क्षमा पाए सकएं।

³² जा सब बातके हम साँक्षी हएं, काहेकी परमेश्वर अपनो आज्ञापालन करन बारेनके दओ भओ पबित्र आत्मा फिर साँक्षी दइ रहो हए।”

³³ तओ जब सभाके सदस्य जा सुनीं तओ बे बहुत दिक्काइगए और चुनेभए चेलनके मारन चाही।

³⁴ पर नियम कानुन सिखान बारे पण्डित और जन्तामे माननीय गमलिएल नाउँ भओ फरिसीनको समुहके यहूदी सभाघरमे उठके चुनेभए चेलनके कुछ देरके ताहीं बाहिर जानके हुकुम दइ।

³⁵ और बे यहूदी सभाघरके आदमीनसे कहीं, “हे इस्राएल देशके आदमी, तुम जे आदमीनके का करन जाएरहे हओ? होसियार रहियओ!

³⁶ काहेकी आजके दिनसे पहिले थूदास फिर मए बडो आदमी हओं करके दाबी करी, और लगभग: चार सओ आदमी बोके पिच्छु लागे। पर बो मरिगओ; और बोके पिच्छु लागन बारे सब तितरबितर भए और सब मरिगए।

³⁷ जा आदमीके पिच्छु, जनगणनाको दिनमे गालील परदेशमे रहान बारो यहूदा देखा पणो, और बहुत आदमीनके अपन घेन करलै। और बो मरीगओ, और बोके पिच्छु लागन बारे फिर सब तितरबितर हुइगए।

³⁸ हबएको जा मामलामे मए तुमसे कहात हओं, कि जा आदमीसे अलग बैठियओ, और इनके छोड देओ, काहेकी यिनको योजना और जा काम आदमीसे हुइहए कहेसे जा अपनए मिटिजएहए।

³⁹ पर अगर जा परमेश्वरसे हए तओ तुम जाके रोक नाए पएहओ। नत तुम परमेश्वरके बिरुद्धमे लडन बारे कहिके ठहिरैगे।”

⁴⁰ तओ बे बक सल्लाह मानीं। और बे चुनेभए चेलनके भितर बुलाएके पिटीं, और अबसे येशूको नाउँमे कुछु मत् बुलियओ करके आज्ञा दइके बिनके छोडदइं।

⁴¹ तओ येशूके खातिर अपमान सहानके लायक ठहिरे करके आनन्द मनात बे यहूदी सभाघर मैसे निकरके गए।

⁴² और हर दिन चुनेभए चेला मन्दिरमे और घर-घरमे जाएके “येशूए ख्रीष्ट हए” करके अच्छो समाचार सिखान और परचार करनके नाए छोडीं।