प्रेरित 26 - राना थारु नयाँ नियम

¹ तओ राजा अग्रिपास पावलसे कही, “तोके अपन पक्षमे मस्कन अनुमति हए।” तओ पावल अपन बचाओके ताहीं मसकन लागो:

² “हे राजा अग्रिपास, जित्नो बातनमे यहूदी अगुवा मोके दोष लगात हएं, आज तुमर अग्गु मए अपनो बचाओके ताहीं बोलन पाएके मए अपनएके धन्य सम्झत हओं।

³ काहेकी तुम यहूदीनके सब चलन और बाद-बिबादको बात जानत हओं। जहेमारे मिर बयान धिरजसे सुनदेहओ करके मए बिन्ती करत हओं।

⁴ मए आदमीनके बीचमे और यरूशलेम सहरमे छोटेसे लैके जवानीतकको जीबन शैली यहूदीनके पता हए।

⁵ लम्बो समयसे उनके पता भइ बात हए, कि हमर धर्मको सबनसे कट्टर दल अन्तर्गत मए एक फरिसी हुइके छोटुवएसे जीबन बिताओ हओं। बे चाहंगे कहेसे जा बातको गवाही दए सकत हएं।

⁶ आज मए परमेश्वरद्वारा हमरे पुर्खनके दओगओ प्रतिज्ञाको आसराको कारण हियाँ दोषीके रुपमे खडा हओं।

⁷ हमरे बाह्र कुल जा आसरा प्राप्त करनके दिनरात एकए मनसे परमेश्वरके आराधना करत हएं। हे राजा अग्रिपास, जहे आसराके ताहीं यहूदी मोके दोष लगात हएं।

⁸ परमेश्वर मरे भए आदमीनके जिन्दा बनात हए कहिके तुम बिश्वास करत हओ, तहुँफिर तुम काहे कोइ फिर परमेश्वर, येशूके मरे मैसे जिन्दा करी हए कहिके बिश्वास नाए करत हओ?

⁹ होन ता, मए फिर नासरतको येशूके बिरोध करन पणत हए कहिके सम्झे रहओं।

¹⁰ और मए यरूशलेम सहरमे अइसियए बिरोध करो। मए मुखिया यहूदी पुजारीसे हुकुम पाएके प्रभु येशूमे बिश्वास करन बारे बहुतए पबित्र जनके जेलमे थुनबाओ। और उनके मारनको काममे फिर मदत करो।

¹¹ और बहुत चोटी यहूदी सभाघरमे, बिनके सजाए देन लग्बात रहओं और बिनके ख्रीष्टको बदनाम करन बारे, बनानके कोसिस करत रहओं। मए बिनसे इत्नो गुस्सानो रहओं, कि मए और दुस्रे देशके सहरमे जाएके फिर बिनके सतान लग्गओ रहओं।”

अपनो परिबर्तनके बारेमे पावलको बयान

¹² “अइसियए एक दिन मुखिया यहूदी पुजारीनसे अधिकार और आज्ञा पाएके मए दमस्कस सहर घेन जात रहओं,

¹³ तओ हे राजा, दुपहारके समयमे मए स्वर्ग मैसे सुर्यसे फिर बहुत उजियारो ज्योति देखो, जौन मिर और मेरे सँग यात्रा करन बारेनके चारौ घेन चमकत रहए।

¹⁴ जब हम सब धर्तीमे गिरे रहएं, तओ हिब्रू भाषामे मए अइसो कहात सुनो, ‘शाऊल, ए शाऊल, तए मोके कहे सतात हए? अगर तए मिर बिरुद्धमे लडैगो तओ तए अपनए बहुत दु:ख भोगैगो।’

¹⁵ मए कहो, ‘हे प्रभु, तुम कौन हओ?’ प्रभु कही, ‘मए येशू हओं जौनके तए सतात हए।

¹⁶ अब उठ, मए तोके मिर सेवक और मिर गवाही देन बारो आदमी बनान चाँहत हओं। जहेमारे मए तेरे ठिन देखा पणो हओं। तए मेरे बारेमे देखो भओ बात और मए तोके पच्छु दिखान बारे बात समेत दुस्रे आदमीनके सुनान पणैगो।

¹⁷ मए तोके तिरे अपने आदमीनसे और गैर-यहूदीनसे छुटकारा देमंगो। मए तोके बिनके ठिन पठामंगो।

¹⁸ ताकी बिनको आँखी खुलए, और बिनके अन्धयारोसे उजियारोमे और शैतानको शक्तिसे परमेश्वर घेन घुमाए पाबए। तओ बे परमेश्वर घेनसे पाप क्षमा पामंगे और मिर उपर बिश्वास करके बे परमेश्वरके चुने भए जनके सँग संगतीमे बैठन पामंगे।’

¹⁹ जहेमारे, हे राजा अग्रिपास, स्वर्गसे आओ भओ जा दर्शन प्रति मए आज्ञाकारी भओ।

²⁰ पर पहिले दमस्कस सहरमे, यरूशलेम सहरमे और सबए यहूदिया परदेशमे और अन्यजातिनके फिर, पाप करन छोडके परमेश्वर घेन घुमओ और दण्डसे बचनके ताहीं अइसे काम करओ। और तुम नेहात्तओ अपन मन बदलके पाप करन छोड देओ कहिके मए परचार करो।

²¹ जहेमारे यहूदी मोके मन्दिरमे पकणके मारन ढुँणीं।

²² पर आजको दिनतक मए परमेश्वरएसे मदत पाएरहो हओं। बहेमारे मए हिना भए छोटे-बणे सबएके गबाही देतए ठाणो हओं। अगमबक्ता और मोशाको कहो बचन नेहात्तओ पुरा होबैगो, करके कहान बारी बात बाहेक मए औ कछु फिर नाए कहो हओं।

²³ अगमबक्ता कहिडारी रहएं, कि ख्रीष्टके दुख भोगके मरन पणैगो, बा मरे भए मैसे जिन्दा होनमे सबसे पहिलो होबैगो और बा यहूदी और गैर-यहूदीनके परचार करैगो कि बे मुक्ति पाए सकत हएं।”

²⁴ पावल अपनो बचाओमे मस्कत पेती जे बात सुनके बडो हाकिम फेस्तस बडो स्वरमे चिल्लाएके कही, “ए पावल, तए पागल हुइगओ, तेरो बहुत ज्ञान तोके पगलबाएदइ हए।”

²⁵ पर पावल कही, “आदरणीय फेस्तस, मए पागल नाए हओं, पर सच्चाई और बुद्धिकी बात कहात हओं।

²⁶ राजा अग्रिपासके जे बातके बारेमे सब पता हए, बोसे मए जा बात निडर हुइके कहे सकत हओं। और मोके बिश्वास हए, कि जे बात बासे लुकी नैयाँ, काहेकी जे बात गुप्तमे नाए भओ रहए।

²⁷ हे राजा अग्रिपास, का तुम अगमबक्तनके उपर बिश्वास करत हओं? मए जानतहओं, तुम बिश्वास करत हओं।”

²⁸ उत्कएमे राजा अग्रिपास पावलसे कही, “का इत्का बातसे तए मोके ख्रीष्टियन बनान कोसिस करत हए?”

²⁹ पावल जबाफ दइके कही, “चहुँ थोरी समय या बहुत समय, मए परमेश्वरसे प्राथना करत हओं, कि आज मिर बात सुनन बारे तुम सब मेरी कता ख्रीष्टियन हुइजाओ।”

³⁰ तओ राजा अग्रिपास, बडो हाकिम फेस्तस, बरनिकी और हुवाँ बैठन बारे जितनो रहएं सबए उठिगए और चलेगए।

³¹ और बाहिर जात पेती बे आपसमे अइसे बात करीं, “जा आदमी कैदमे जान बारो या ज्यान सजाय पान जैसो त कुछु फिर काम नाए करीहए।”

³² राजा अग्रिपास बडो हाकिम फेस्तससे कही, “अगर जा आदमी न्याय पानके ताहीं रोमको महाराजा कैसर ठिन बिन्ती नाए करतो तओ छोडदेएसे फिर ठिक रहए।”