प्रेरित 25 - राना थारु नयाँ नियम

बडो हाकिम फेस्तसके अग्गु पावलको मुद्दा

¹ फेस्तस, बडो हाकिमके रुपमे यहूदिया परदेशमे आएके तीन दिन पिच्छु बो कैसरिया सहरसे यरूशलेम सहरमे गओ।

² मुखिया यहूदी पुजारी और यहूदी समुहके अगुवा पावलके बिरुद्धमे दोष लगाइं।

³ और बे पावलके डगरएमे मार डारनके षड्यन्त्र बनाएके बडो हाकिम फेस्तससे बिन्ती करीं, कि कृपया करके पावलके यरूशलेम सहरमे पठाए देओ।

⁴ तओ फेस्तस उनके अइसे जबाफ दइ, “पावल कैसरिया सहरके जेलमे थुनो हए, और मए अप्ना फिर जल्दीयए हुवाँ जामंगो।

⁵ जहेमारे तुम मैसे कोइ सासक हुवाँ मिर सँग जान चाँहत हए कहेसे पठाएदेओ। अगर पावल कुछु खराब काम करी हए कहेसे बे हुनै बोके दोष लगामएं।”

⁶ फेस्तस यरूशलेम सहरमे आठ-दास दिनसे जद्धा नाएबैठके कैसरिया सहर घुमिगए, और बोके दुस्रो दिन न्याय-आसनमे बैठके बो पावलके लानके हुकुम करी।

⁷ जब पावल आओ तओ यरूशलेम सहरसे आएके यहूदी अगुवा बोके आसपिस ठाणीगए, और पावलके बिरुद्धमे इतएउतएको दोष लगाइं। पर बे कोइ फिर दोषको प्रमाण नाए दइ पाइं।

⁸ पावल अपनो पक्षमे बोलतए कही, “मए यहूदीनको नियम कानुनके बिरुद्धमे, मन्दिरके बिरुद्धमे, और रोमको महाराजा कैसरको बिरुद्धमे कछु अपराध नाए करो हओं।”

⁹ तओ बडो हाकिम फेस्तस यहूदी अगुवनके खुसी बनानके ताहीं पावलसे पुँछीं, “का तए यरूशलेम सहरमे जाएके हुवाँ मिर अग्गु जे बातके बारेमे इन्साफ करओं करके चाँहत हए?”

¹⁰ तओ पावल कही, “मए रोमको महाराजा कैसरको न्याय-आसनके अग्गु ठाणो हओं, और जा बहे स्थान हए जहाँ मिर न्याय होन पणैगो। यहूदी समुहके बिरोधमे मए कुछु खराबी नाए करो हओं, बो तुमके अच्छेसे पता हए।

¹¹ अगर मए अपराधी हओं, और मए ज्यान सजाय पानको लायकको काम करो हओं कहेसे मरनके ताहीं मए इन्कार नाए करंगो। अगर जे मोके लगाइभइ दोषमे कुछु सच्चाई नाए हए, तओ कोइके हियाँ अधिकार नाए हए, कि मोके जे यहूदी अगुवनके हातमे सौँपएं। मए बिन्ती करत हओं, कि मिर न्याय रोमको महाराजा अपनए करए।”

¹² तओ फेस्तस सल्लाहकारनसे सल्लहा लैके कही, “तए रोमको महाराजा ठिन न्याय करनको माँग करो हए। उइसो हए कहेसे, मए तोके रोमको महाराजाके ठिन पठाएदेहओं।”

राजा अग्रिपाससे बडो हाकिम फेस्‍तसको सल्लाह

¹³ कुछु दिन पिच्छु फेस्तसके नमस्कार करन राजा अग्रिपास और बोकी छोटी बहिनीया बरनिकी कैसरिया सहरमे आए पुगे।

¹⁴ बे बहुत दिन कैसरिया सहरमे बैठके पिच्छु, फेस्तस पावलको मुद्दा राजाके अग्गु अइसे करके सुनाइ, “हाकिम फेलिक्स द्वारा थुनोगओ एक कैदी हियाँ हए,

¹⁵ जौनके बारेमे, मए यरूशलेम सहरमे रहात पेती, मुखिया यहूदी पुजारी और यहूदी अगुवनको समुह बोके बिरुद्धमे दोष लगाएके बोके दण्ड देन पणैगो करके अनुरोध करी रहएं।

¹⁶ पर मए बिनसे कहो, कि आदमीनके दोष नाए लगानतक रोमी सरकारको दण्ड देनको चलन नैयाँ। दोष लगाएभए आदमी, दोष लगान बारे आदमीनके अग्गु अपनो बात सुनानके मौका पान पणत हए।

¹⁷ जहेमारे जब यहूदी समुहके अगुवा मेरे ठिन हियाँ कैसरिया सहरमे आए, मए देर नाए करके दुस्रो दिन न्याय आसनमे बैठके आदेश दओ, कि पावलके अदालतमे लैके आओ।

¹⁸ जब बिरोधी ठाणे, तओ मए सोँचो जैसो बिनको मुद्दामे कोइ खराब बातको दोष बे लगान नाएपाइं।

¹⁹ तओ बिनको मतभेद बिनको धर्मके बारेमे और मरो येशूके बारेमे रहए; तओ पावल दाबी करत रहए, कि बा हबए फिर जिन्दा हए।

²⁰ और मोके पता नाए रहए, कि जा बातके जाँच-बुझ कैसे करओं। जहेमारे मए पावलसे पुछो रहओं, कि जाके बारेमे न्याय पानके ताहीं यरूशलेम सहरमे जान चाँहत हए?

²¹ तओ पावल रोमको महाराजा कैसरको फैसला नाए होनतक हिरासतमे धरओ करके बिन्ती करी रहए। बहेमारे मए बोके रोमको महाराजा ठिन नाए पठानतक पहरा देनके हुकुम दओ।”

²² जा बयान सुनके राजा अग्रिपास, बडो हाकिम फेस्तससे कही, “जा आदमीको बात मए अपनए सुनन पैतो तओ ठिक रहए।” तओ बो कही, “कल तुम सुनियओ।”

पावल राजा अग्रिपासके अग्गु

²³ दुस्रो दिन राजा अग्रिपास और बरनिकी बडो सम्मानमे सेनापति और सहरके मुखिया आदमीनके सँग यहूदी सभाघरमे घुसे। और फेस्तसको हुकुम पाएके पावलके सभामे ल्याइं।

²⁴ बडो हाकिम फेस्तस कही, “राजा अग्रिपास और सब आदमी जो हियाँपर हम्रे सँगमे हएं, तुम जा आदमीके देखत हओ जौनके बारेमे सारा यहूदी, जा आदमी अब औ जिनको लायक नाए हए करके, यरूशलेम सहरके और हियाँके आदमी फिर मोसे बिन्ती करी रहएं।

²⁵ पर ज्यान सजाय देनकता, मए जामे कुछु दोष नाएपाओ हओं। और जा अपनए फिर महाराजाके ठिन न्यायके ताहीं कही रहए, जहेमारे मए जाके पठानके फैसला करो।

²⁶ जाके बारेमे मोके फिर महाराजाके लिखन बारो बात कुछु नैयाँ। जहेमारे मए जाके तुमर अग्गु लाओ। और खास करके, हे राजा अग्रिपास, तुमर अग्गु लैके आओ हओं। और तुम जाको जाँचबुझ करदए कहेसे मए कुछु लिखन बारी बात पामंगो कि कहिके आसरा करेपणे हओं।

²⁷ काहेकी कैदीको बिरुद्धमे कोइ दोष नाए बातएके बोके पठान मोके सही नाए लागो।”